9
1 Ege Iesu akaidari yabi daratagerda, “Ka wabi agekar detagreda, wader le pe able gergerge ekedi ya mena idid waurder nade wi ya wadasmerare Adira Basalaia watabakiamu au kelarkelar.
Iesu Epigemelu
MRK 9.2-13
2-3 6 gerger barukda, Iesude yabi natakridare Peteru, Zemis a Zone yabi a wige abi irmirdare au aremarem paserem ge nole lekak irdireder. Nade wi ga dasmele, ege Iesu epigemelu; abra wali akaidari zoromzorom zarzerzarzer baidari - nole netat le able gesepge tabara wali waikaidari able zarzerzarzer obaidari.
4 Wige dasmerdare Elaiza a Mose Iesui mir detagelei.
5 Peterude akaidari Iesui detagri, “Erwerle, audebele ikeredi ki peki dale. Ki umele 3 mud dauridere - netat mara, netat Elaizara a netat Mosera.
6 Peteru a neis memegle yaba geum barkidare. Ableluglam Peteru e nole umerkak dawer e nalu mir waditauti.
7 Baz tikada bakmerikda yaba mud. Bazlam kodomir teosmeda, “Kara nasnas werem pedali. Abi asrawem.”
8 Nade wi erkep etardare, wige dasmerdare Iesu tebteb ikeireder.
9 Nade wi tabidare paserlam, Iesude yabi daratagerda, “Wa nole netat le detagridare nalu lu ge wawa dasmerdare.” No pe ikeredi nade ya Lera Werem eudlam wekiam wi umele ya le wadaratagerlare.
10 Wige abra mir dasorda, wige no tabara batagelare nalu agekar lu ikeredi 'eudlam ekiamda'.
11 Wige eudige Iesui itmerda, “Naluglam Aotarlegize detauteda Elaiza kikem watatabakiamu?”
12 Iesude yabi daratagerda, “Agekar Elaiza kikem tabakiamuda ko gair lu wadararsirare. A mipe nalu pemi etagada nako Lera Werem dali muige Zogoziawalige? Mi etageda e asiasi wadigi a abi wadituaklare!
13 Ka wabi detagreda, Elaiza emetu tabakiamuda, ege legize abim adud tonar ikelare nalu ge wi laglag urder, able mokakalam able orwairorwair pe mimi abra ad detagreda.”
Iesude Demoni Able Weremlam Adem Ismeda
MRK 9.14-29
14 Nade wi takomertidare wader memegle nardarda, wige erdardare au kub lera yabi daramuareta, a wader Aotale memeglekem basaredlare.
15 Ege legize erdarda, wi bazigmuarti a korider abim bamri ko abi watigareda.
16 Iesude tabara memegle nautmerda, “Wa naluglam pewa tabasardeda?”
17 Ege kimiar ge le kub ge dawer abi akaida abi detagri, “Erwerle, ka kara werem marim tigardi e umerkak mir waditaut ableglam abra dimoni abidoge dali.
18 Nade abi dimonide wairser, epe abi obatawerder sepem, epe abra sik tege obapaitlare, e tabara tirig waikupamater a abra gem lid obatrer. Ka mara memegle daramosa ko able dimoni waismerdarda, wi umerkak waikaidarda.”
19 Iesude yabi daratagerda, “Wa owaturkak le uridli! Ka na niainiai yaka wabidoge nawar? Ka na niainiai yaka okasosok wabialam digier? Wa able werem kei karim tigardare.”
20 Wige able werem tagareda Iesui ikwarda. Nade able dimonide Iesui erdari, ege able le deskerder kei itimder a kei itimder, a eudi sepge abi, sepge epitrer a sik abra tege bapaitlare.”
21 Iesude able lera bab itmeri, “E na niainiai able orwairorwair wadawer?”
Ege abi ikaidari, “Able kerkerlam nade e kebi werem wadali.
22 Mitkar kerkerge dimonide abi waiker ko abi waipiti e abi obatawerder urem a niem. Ma kerbi omarge; mai umele kerbi upiditidarare?”
23 Iesude eudige abi detagri, “Ma umele iker! Na lera pe owatur daragriwerteda e umele gair lu waiker.”
24 Ege keko able wermira bab erer ekri, “Kara owatur ikeredi, epe no kebile ikeredi. Ma kari upinati ya waiakai kara owatur waiakai aule obai!”
25 Iesude dasmeri lera kub etamier; ege au kelarkelar dimoni detagri, “Asorkak a mirkaka dimoni, ka mari kelarkelar detagri ma adem teosmer able kebilelam a mage nole ko bakiamu abidoge bau!”
26 Ege dimonide sasmir dimri, eudige able kebile aler deskerdi, a adem teosmeda. Gaie le ge urder eudige natkareta, “E eumida!” ableglam able kebile mokakalam dali eudle.
27 Ege Iesude able kebilera tag derpeida a abi agisida ege akaida ekeida.
28 Keubu, nade Iesu tebteb bakiamuda badari able metage, abi memeglegize titmerda, “Ki naluglam nole ki able dimoni adem ismerdarda?”
29 Iesude yabi daratagerda, “No erkepasamide umele able orwairorwair lu adem waismer.”
Iesude Tabara Eud Ko Detauter
MRK 9.30-32
30 Wi able uteb dikaireta wige nakasir Galilaiage. Iesu nole lagkak dawer umerkak nerut le umele obaida e nade dawer,
31 ableglam e tabara memegle nerwerlare. Iesu yabi daratagerda, “Able Lera Werem ya waiperare a waigardare able le wanakwarare ya wi abi waipitare. Neis a netat gerger ya obakare e ko ya eudlam wekiam.”
32 Wige nole akmerkak urder e nalu detauter, wige geumge bakerer abi waitmerda.
Nete Aukakale Dali?
MRK 9.33-37
33 Wi taba Kapanamge bakarki. Nade wi bakiauda metage barti, ege yabi nautmerdi, “Wa naluglam pewa gabge tabasardeda?”
34 Wige nole mir natkareta ableglam nade wi gabge tarakasir wige tabasaredlare nete aukakale dali.
35 Iesu akaida emrida a 12 memegle tababim darabgerda. E yabi daratagerda, “Nete laglag kikem wadawer e tababu obakai keubu watadawer gair lege a e wadawer gair lera memegle.”
36 Iesude eudige netat kebi omaskir erpeidari a ikaidari eipuge ikeidari taba memeglege. Ege eudige akaidari abi gasu erpeidari a yabi daratagerda,
37 “Ese netide karim able netat kebiwerem waseserder pe able kebiomaskir uridli, e kari ko naseseredli a pako able Le ge kari taramarikda.”
Netide Pe Dorge Ikeli Merbi Asaredkak E Merbim Dorge Ikeli
MRK 9.38-41
38 Zonede abi detagri, “Erwerle, ki kimiar dasmerlare e mari neige dimoni adem iser. Ki abi detagerda, “Ma ge ekwei ma nole able lu ko iker” ableglam e nole merbidoge ikase.”
39 Iesude yabi daratagerda, “Wa nole ko abi daisumdarawem e ge wekweiwa able lu akerkak. Na lelut nadgireda kari neige umerkaka waditaut adud mir karim.
40 Netide Pe Dorge Ikeli Merbi Asaredkak E Merbim Dorge Ikeli.
41 Netide mari gebgeb ni nakwarli ariem ableglam wa Kerisora uridli e ya tabara bodomalam watirpei.
Mirem Wader Le Nakelare Wit Waikelare
MRK 9.42-50
42 E ya aukaka seksek lu waikerider ese netide waditager netat able kebilelam e wit waikai pe abra owatur karidoge dikeredi. E ya audebele waikereder ese idid bakir obamri able le taboge a abi gurem obatimed.
43 Ese mari tagide mari wanakai ma wit ikai mage abi adem ismi. E debele ikeredi ma idid ge bau no netat tagtag. Ese mara neis tag wanakereder mai bakiamu Urasamkak.
44 [Pe nade, “Yaba uk umerkak obaum a ur umerkak obasamare.”]
45 Ese mari teteride mari wanakai ma wit ikai mage abi adem ismi. E debele ikeredi ma idid ge bau no netat teterteter. Ese mara neis teter wanakereder mai bakiamu Urasamkak.
46 [Pe nade, “Yaba uk umerkak obaum a ur umerkak obasamare.”]
47 Ese mari ponide mari wanakai ma wit ikai mage abi adem bataured. E debele ikeredi ma Adi Basalaiage bau no netat poniponi. Ese mara neis poni wanakereder mai bakiamu Urasamkak.
48 Pe nade, “Yaba uk umerkak obaum a ur umerkak obasamare.”
49 Gair le ya solsol waturder urger watabatitilare.
50 Sol pe debelu dali. Ese waiakai lagkak obai, netat lelut ya umerkak waikai solsol ko obai. Wa mokakalm uridwa solise pe debe solsol lewer waikereder; wa mapodan uridwa wader lekem.”