18
1 Iesu emetu detaut abele gaire mer, E pako abara kaimeg giz bakeuare dodo datuparare, nei Kederon, E pako abara kaimeg giz abele gedubem tabarki.
2 Iuda, abi keserkeser, umele abele uteb: abelelam Iesu gaire bakeam abele uteb, kemem abara kaimeg giz.
3 Iuda taraisare gaire ares le, a gaire tarim le, uiabielam gaire zogo le, a gaire Faresaio, a kei tabarkare gaire lamepa kem, a gaire be kem, a gaire ares lu.
4 Iesu umele gaire lu ko abim tabarki, E maiem bakeamulu, a uiabim detager, kega, Netede uaba deraimerare?
5 Uiaba abi detaut, kega, Iesu Nazaret le. Iesu uiabim detaut, kega, Kai nali. Iuda, abi keserkeser, uiabi kemem bako.
6 Emetu Iesu detager, kega, Kai nali, uiaba bazik bakeuare, a seb ge bakesmer.
7 E iako uiabim eutumer, kega, Netede uaba deraimerare? Uiaba detaut, kega, Iesu Nazaret le.
8 Iesu detaut, kega, Kaka emetu uabi detagereda, kega, Kai nali: ese uaba kari naraimeli, uiabi namarkare, ko bakeuare:
9 Ueakai bakedida abara mer, kega, Nole nerute le abi uiabielam mama kari nakuar.
10 Simona Peteru nagri tebur ausos tulik, E iselu, a etaueriklu tarim zogozogo le ra memeg le, a abara tuter laip dikiam. Nei abele memeg Maliko.
11 Iesu Peteru detager, kega, Mabara tebur ausos tulik iako sorge dasiri: nako, kaka nole are kak abele tanelu Baba de kari nakuar?
12 Kole ra ares le giz, a Iudaia tarim le, Iesu terpeirare, a abi didbarare.
13 Kekiam uiaba abi tegaret Anaem; abelelam E Kaiafa ra naiuet, tarim zogo le abele urut ge.
14 Abele Kaiafa Iudaia giz daratagerare, kega, Debele netate le ko eumilu ab ged ra kes.
15 Simona Peteru, a nerute kaimeg giz abi irmilei: tarim zogozogo le opasereret abele nerute kaimeg giz, E Iesu dog balu tarim zogo le ra meta ge;
16 Peteru meta te ge tekueilu. Abele nerute kaimeg giz tarim zogo le opasereret, iako teosmelu, a neur te asesered detaut, a Peteru muige tegaredilu.
17 Neur te asesered Peteruim detager, kega, Nako, ma nole nerute abara kaimeg giz? E detaut, kega, Kaka nole.
18 Gaire memeg le a gaire kole bako, a ur etoamerdare zirulam; a uiaba gebaugare: Peteru ui kemem, bako gebaugare.
19 Tarim zogo le Iesu eutumer uiabielam abara kaimeg giz, pako ereuer tonar.
20 Iesu abi detaut, kega, Kaka paret kak gesepem detaut; kaka sunago ge ereuerem, a zogo meta ge, Iudaia giz netate uteb ge; kaka nole nerute lu mude ge detaut.
21 Nalugem ma kari nautumer? uiabi nautumerare, gaire le kara mer aserare, kaka uiabi detagereda: dasmer, uiaba umele gaire mer kaka detaut.
22 E emetu abele ge detaut, nerute tarim le abele tekueilu Iesu tagu detapi, a detager kega, Nako, ma detaut mokakalam zogo kemleem?
23 Iesu abi detaut, kega, Ese kaka adud mer detaut, detomerti nalu adud: ese debe mer, nalugelam ma kari napit?
24 Ana abi didbari a emarida Kaiafaem, zogo tarim le.
25 Simona Peteru ekueilu ge bauger. Uiaba abi detager, kega, Nako, ma nole nerute abara kaimeg giz? E asared, a detaut, kega, Kaka nole.
26 Nerute zogo tarim le la memeg le, boai abele le Peteru abara laip dismilu, detaut, kega, Nako, kaka nole mari nasmer abi dog gedub ge?
27 Peteru iako asared: epe sobkak kimiar faul ereretikri.
28 Uiaba Iesu Kaiafaelam tagaret kot metaem, abele banege. Uiaba nole barot abele kot meta, ueakai uiaba nole uit kak, ko paseka eroli.
29 Pilato uiabim eosmeda, a detager, kega, Nako uaba mer ko aisare le idali?
30 Uiaba abi detaut, kega, Ese E nole adud ikeli, keriba nole abi emarik marim.
31 Pilato uiabim detaut, kega, Uaba abi egardare, a abi eutumer abkoreb uaba gelar. Iudaia giz abi detaut, kega, Nole keribim abkoreb ko le ipit eumida:
32 Ueakai Iesu ra mer bakedida, E emetu detager, a natomertare tonar eud E ko eumilu.
33 Pilato iako balu kot metaem, a Iesu dabgeri, a abi detager, kega, Nako, ma Iudaia giz ra Opole?
34 Iesu detaut, kega, Nako, mabu detager abele, ege nerute le mari natageri?
35 Pilato detaut, kega, Nako, kaka Iudaia le? Mara ged, a zogo tarim le giz mari namarida karim: nalu ma ikeli?
36 Iesu detaut, kega, Kara baselaia nole geseplam: ese kara baselaia geseplam, gaire kara kaimeg giz ko bares, ueakai nole kari emarik gaire Iudaiaem: peirdi, kara baselaia nole abele ge lam.
37 Pilato abi detager, kega, Nako, ma opole? Iesu detaut, kega, Ma detager kaka opole. Abelelam kaka naosmeda, abelelam kaka gesepem tarabu, ueakai kaka ko ageakar ageakarem. Gaire le uridili ageakalam kara kodo mer asoli.
38 Pilato de abi detaut, kega, Nalu ageakar? Emetu abele detager, E iako osmeda uiabim gaire Iudaia le, a uiabim detager, kega, Kaka nole uit ardar kak abi dog.
39 Epe uaba tonar ka ko uabim amariklu nerute le paseka kerker ge: nako, uaba lagelag ka ko uabim emarida Iudaia giz Opole?
40 Uiaba iako au ereretikri, a detager, kega, Nole E dali, debele Barabasa. Ege Barabasa nerute eruam le.