7
1 Abele gaire lu iobaru, Iesu Galilaiaem ekas: E nole la kak Iudaiaem ekas, abelelam Iudaia le giz deraimerare abi ipitare.
2 Maike Iudaia le giz ra uetpur, abele nerazi meta uetpur.
3 Abara keimer giz abi detautare, kega, Ge dekaer, a Iudaiaem bakeam, ueakai mara kaimeg giz dasmerare gaire lu ma ikeli.
4 Ege nole le dorge mudige ikeli, ese E lagelag E natomertare. Ese mama ikeli abele gaire lu, mama natomertare gesepem.
5 Ege abara keimer giz nole abi oatur kak.
6 Iesu uiabim detautare, kega, Kara kerker ge nole tabarki; a peirdi uaba kerker.
7 Geseb nole umer kak uabi derarti; epe kari derarti, abelelam kaka uiaba adud dorge giz natomertare.
8 Uaba bakeauare abele uetpurem: peirdi kaka nole bakeam abele uetpur; abelelam kara kerker nole tabarki.
9 E emetu detager abele mer uiabim, E Galilaiem emri.
10 Abara keimer giz emetu uetpurem bakeamuda, E ko bakeam, epe E gumik ekas, nole paret kak ekas.
11 Iudaia le giz, uetpur ge, abi deraimerare, a detautare, kega, E nade?
12 Gaire le lakub abim basardare: uader detaut, kega, E debele; a uader, kega, Nolea, E gaire le didmirki.
13 Epe nole le abi paret kak detautare, uiaba Iudaia le giz geum.
14 Uetpur ge eipu, Iesu zogo metaem bakeamuda, a okadaraskeda.
15 Iudaia le giz damreda, a detaut, kega, Nalu le abele jauali umele, a nole ereuer kak?
16 Iesu uiabim detaut, kega, Nole karielam kara ereuere, epe abielam, kari namarida.
17 Ese nerute le lagelag abara lag ikeli, E ereuer akmer, nako Adelam, nako kaka detaut karbabu.
18 Abele le tababu detaut, E deraimer tababu baospili: abele le deraimer ko abi despereda, abi emarida, E dali ageakar, nole barbar tonar abi dog.
19 Nako, Mose nole gelar uabi ikuar, a nole nerute uabielam gelar irmili? Epe nako uaba deraimer kari uanapitare?
20 Gaire le lakub abim detaut, kega, Demoni mari dog: niti de mari naraimeli mari uanapit?
21 Iesu uiabim detaut, kega, Kaka emetu nerute dorge ikeli, a uaba uridili damreda.
22 Mose peritom uabi ikuar, (epe nole Mosealam, mamoro kerem lelam;) uaba le peritom sabath ge.
23 Ese nerute le peritom erpei sabath ge, ueakai nole Mose ra gelar datupida; nako uaba kari urker abelelam kaka le idigiri sabath ge?
24 Nole erkepse irmi irmili pone, mamoro erkepse irmi irmili barkak itmer.
25 Eko uader le Ierusalemlam detaut, kega, Nako E dali uiaba deraimerare ko ipitare?
26 Dasmer, E paret kak mer detautili, a uiaba nole nerute mer abi detaut, Nako, gaire kole umele, kega, Keriso kar idali?
27 Epe meriba umele E nagelam; a Keriso tabarki, nole le umele E nagelam.
28 Iesu ereretiki zogo meta ge, E okadeskeda a detager, kega, Uaba kari umele, a uaba umele kaka nagelam; kaka nole karbabu tabarki, E ageakar, kari namarida, a uaba abi umer kak.
29 Kaka abi umele; abelelam kaka abielam, E kari namarida.
30 Uiaba deraimerare abi terpeirare: a nole le abim tag itirimuda, abelelam abara kerker nole tabarki.
31 Gaire lekublam abi oituli; uiaba detager, kega, Ese Keriso tabarki, nako, E ko ikeli gaire atamelam tumem E ikeli?
32 Gaire Faresaio asoli uiaba lekub abim basardare abele gaire lu; gaire zogo kemle a gaire Faresaio namarida gaire asesered le abi terpeirare.
33 Iesu uiabim detaut, kega, Teupai kaka uabi dog emri, kerker maike kaka abim bakeamulu, kari namarida.
34 Uaba ko kari naraimereda, a nole kari ardar kak: abele uteb kaka bakeamulu, uabu umer kak ko bakeam.
35 Gaire Iudaia le giz mer atager, kega, Nagedim E bakeam, a meriba nole abi ardar kak? nako, E ko bakeam uiabim gaire le bamarida Helene dog, a gaire Helene okadeskeda?
36 Nalu abele mer, E detagereda, kega, Uaba kari naraimereda, a nole kari ardar kak: abele uteb kaka bakeamulu, uaba umer kak ko bakeam?
37 Keubu gerger, abele au gerger uetpur ge, Iesu tekueilu, a ereretikri, a detager, kega, Ese nerute le niap, karim tabakeam ko aree.
38 Abele le karim oituli, mokakalam zogo jauali detager, kega, Edede ni ko babusdarie abi nerkeplam.
39 E detager abele Lamar Zogolam, uiaba gaire le abi oituli ko erpei abele. Lamar Zogo nole tabarki; abelelam Iesu nole eded akaida.
40 Uader lekublam asoli abele mer, uiaba detager, kega, Ageakar, E perofeta pedali.
41 Uader datager, kega, E Keriso. A uader detager, kega, Nako, Keriso osmeda Galilaialam?
42 Nako, nole zogo jauali detager, kega, Keriso tabarki Dauidalam, a Bethelemalam, abele Dauida ra uteb?
43 Abielam gaire le lakub barsardare.
44 Uader uiaba lagelag abi terpei, a nole le abim tag itirimuda.
45 Gaire asesered le akomeda gaire zogo kemle pako Faresaio giz; uiaba uiabim detaut, kega, Nalugelam uaba nole abi tegaret?
46 Gaire asesered le detager, kega, Nole le mer egali mokakalam.
47 Gaire Faresaio uiabim detaut, kega, Nako emetu uabi didmirki?
48 Nako, nerute le abim oituli gaire opolelam, a gaire Faresaiolam?
49 Abele nosik le gelar umer kak, ko eumida.
50 Nikodemo uiabim detaut, (E Iesuim bakeam ki ge, E nerute uiabielam),
51 Nako, meriba gelar ra tonar ko kekiam bodomalam ikuar, a nole kekiam le itmer abele lu E ikeli?
52 Uiaba detaut, a abi detager, kega, Nako ma Galilaialam? Deraimer, a dasmer: nole perofeta dikedida Galilaialam.
53 Uiaba uridili tabara uteb bamarida.