3
1 Ege fifitin urut abele kerker ge, Tiberio Kaisara emeri opole, Ponotio Pilato Iudaia sirdam, Heroda ge Galilaia opole, pako Filipo ra narbet Ituria opole pako nerute ged Trakoniti, pako Lusanio Abilene opole,
2 Ana gako Kaiafa uiaba zogo le giz, ege Iehoua ra mer abim tabakeam Ioane, Sakaria ra uerem, sumez ge.
3 Epe E bakeamulu nerute apek Ioridano ge, natomertare tonar obazgeda a bapataiso, ueakai uit adem dikri;
4 Mokakalam mer detali jauali ge Isaia perofeta, kega, Abele kodo mer ereretikri sumez ge, ueakai paret Iehoua ra gab, adem dirup.
5 A mitkar muimui uteb uridili, a gaire paser pako daip uridili nolea aule kak; gaire lu barbar ko barditug, pako uteb no baker ko ikeli debe gab.
6 Gaire le uridili dasmer azigmoaret Adelam.
7 Ege E uiabi detaut, kega, gaire le lakub abim tabakeuare uiaba lagelag bapataiso, Mama tabo ereg ra omasker ae, nete etomeret uabim debele derser Iehoua ra urker niaiem?
8 Debele uaba turum nagri abkoreb obazgeda, a uaba nerkep nolea dikiapore, kega, Aberahama keriba aba; abelelam kaka uabim detaut, Ade umele depegeli baker peike ko Aberahama ra omasker.
9 Abara tulik mena ikedili lu giz ge: ese gaire lu uridili nolea turum kak, ei uaesem urem uadikri.
10 Ege gaire le giz abi itimerare, kega, Nalu lu ki akerare?
11 Ege E uiabim daratagerare, kega, Ese le nagri neis am uali, debele am uali kak le uaikuar; pako le nagri leuer, abkoreb ikeli mokakalam.
12 Ege telona giz bakeauare abim, kega, Keriba lagelag bapataiso, Ereuerem le ae, nalu lu ki akerare?
13 Epe E uiabim detaut, kega, Uaba nole au kase dikiapore lu bodomalam uabim.
14 Ege uader ares le giz abi itimerare, kega, Nalu ki akerare? Epe E uiabim detaut, kega, Uaba nole urker nerute le, pako uaba nole bes mer nerute le; uaba mamoro emeri naokaili uaba bodomalam.
15 Abele ged ge dekailare, gako nerkep ge uiaba dikiaporare Ioaneim, nako Keriso pedali;
16 Ege Ioane de daratagerare, kega, Kai uabi bapataiso ni ge; ia nerute le tabakeam aule kari tumge, nole abkoreb kaka detue abara teter gab mukub: E uabi bapataiso abele Lamar Zogo, gako abele ur:
17 Abara tag nagri pat, E dirup abara kon etkemed; a E ais azirig metaem gaire kon nole puip kak, ege kon ra gegur E disirkilu abele ur umer kak esameilu.
18 Uader abara gaire mer okadeskeda etomeret abele ged.
19 Ege Ioane abi barditug Heroda opole, epe Herodialam Filipo ra kosker abi narbet, pako gaire lu adud Heroda ikeli;
20 Ege abele lu etami okakis gaire lu uridili, E abi namarid Ioane abele au dubar meta ge.
21 Ege E bapataiso abele ged uridili, a ko Iesuim bapataiso, E esorerapare, ege abele kotor nakesmulu,
22 Epe abele Lamar Zogo uatabu abi tumge, abara roai mokakalam dibadib ise, ege abele kodo mer kotorlam, kega, Mama kara Uerem idali; kaka mari sererege.
23 Ege Iesu, abara urut thirti tote, gaire le dikiaporare E Iosefa ra uerem, a ko Heli ra uerem,
24 A Matata ra uerem, a Leui ra uerem, a Meleki ra uerem, a Iana ra uerem, a Iosefa ra uerem,
25 A Matatia ra uerem, a Amosa ra uerem, a Nauma ra uerem, a Eseli ra uerem, a Nanga ra uerem,
26 A Maata ra uerem, a Matatia ra uerem, a Semei ra uerem, a Iosefa ra uerem, a Iuda ra uerem,
27 A Ioana ra uerem, a Resa ra uerem, a Zorobabela ra uerem, a Salatiela ra uerem, a Neri ra uerem,
28 A Meleki ra uerem, a Adi ra uerem, a Kosama ra uerem, a Elemodama ra uerem, a Eru ra uerem,
29 A Iose ra uerem, a Eliezara ra uerem, a Iorima ra uerem, a Matata ra uerem, a Leui ra uerem,
30 A Simeona ra uerem, a Iuda ra uerem, a Iosefa ra uerem, a Ionana ra uerem, a Eliakima ra uerem,
31 A Melea ra uerem, a Menana ra uerem, a Matata ra uerem, a Natana ra uerem, a Dauida ra uerem,
32 A Iese ra uerem, a Obeda ra uerem, a Boasa ra uerem, a Salemona ra uerem, a Naasona ra uerem,
33 A Aminadaba ra uerem, a Arama ra uerem, a Eseroma ra uerem, a Faresa ra uerem, a Iuda ra uerem,
34 A Iakobo ra uerem, a Aberahama ra uerem, a Tara ra uerem, a Nakora ra uerem,
35 A Saruka ra uerem, a Ragau ra uerem, a Paleka ra uerem, a Hebera ra uerem, a Sala ra uerem,
36 A Kainana ra uerem, a Afasada ra uerem, a Sema ra uerem, a Noa ra uerem, a Lameka ra uerem,
37 A Metusela ra uerem, a Enoka ra uerem, a Iareda ra uerem, a Malelila ra uerem, a Kainana ra uerem,
38 A Enosa ra uerem, a Seta ra uerem, a Adamu ra uerem, a Ade ra uerem.