15
1 Ege idim ge gaire kole zogozogo le giz, a au le giz, a aotale giz, pako gaire tarim le giz ko mer atagere; uiaba emetu Iesu didbare, uiaba abi egared, a Pilato nakuar.
2 Pilato abi eutumer, kega, Nako mama Iudaia le giz ra Opole? E abi detaut, kega, Eko mama detager.
3 Zogozogo le giz gaire mer abi okadiridili.
4 Pilato iako abi eutumer, kega, Ma nole ataut kak? dasmer gaire mer uiaba mari naridili.
5 Epe Iesu nole ataut kak; abelelam Pilato au damred.
6 Uetpur kerker E uiabim emarida nerute le didbar, uiaba laglag.
7 Nerute le nei Barabasa, didbare gaire le opole basardare, uiaba le ipit eumilu abele kerker opole asaredelam.
8 Gaire le uridili uiaba elele ereretikri, a ditimeda abim eutumer ko uiabim ikeli mokakalam ababur ge ikeli.
9 Pilato uiabim detaut, kega, Nako, uaba laglag kaka uabi dakuarare Iudaia le giz ra Opole?
10 Abelelam E umele uiaba, gaire kole zogozogo le giz, Iesu nakuar kurablam.
11 Gaire kole zogozogo le giz gaire le namarida, ko detager, kega, Barabasa keribim emarik.
12 Pilato iako uiabim detaut, kega, Nalu lu uaba lagelag kaka ikeli abim, abele le uaba nei atker Iudaia le giz ra Opole?
13 Uiaba iako ereretikri, kega, Abi satauroem.
14 Pilato uiabim detagereda, kega, Nalu adud Eikeli? A uiaba elele ereretikri, kega, Abi satauroem.
15 Pilato lagelag gaire le lakub ra nerkep ko sererge, E Barabasa uiabim namarida, a emetu Iesu damrik, E abi ikuar ko satauroem.
16 Gaire ares le abi kebi metaem tegared, nei Praitorio, a ares le nosik taraisare.
17 Uiaba abi mamam am uali amer, zegerzeger lager euer aperem, a abi kerem dameare;
18 A ditimeda ko abi detager, kega, Uaiai, Iudaia le giz ra Opole!
19 Uiaba abara kerem pater de ipit, a abi mosu iduare, a kokomamu, a abi erkepsam.
20 Uiaba emetu abi neg degarare, uiaba mamam am uali igi, a abara am uali ami, a abi adige tegared ko satauroem.
21 Uiaba nerute le Kurene namarida abara satauro kodrom, Simona nei, E uiabi dog maike bakeuda sumezlam, abele le Alesandero a Rufa ra aba.
22 Uiaba abi tegared abele uteb Gologotha, tonar abele, Kerem lid ra uteb.
23 Uiaba abi ikuar uaina etaperet okakis muro: epe E nole erpei kak.
24 Uiaba emetu abi satauroem, uiaba abara gaire am uali uaderapei, a luglug ikeli, nete de ekadare.
25 Opem abele haua thri, uiaba abi satauroem.
26 Abele jauali detali abara tonarlam etomeret, kega, IUDAIA LE GIZ RA OPOLE.
27 Neisi eruam le kemem abi dog satauroem; nerute le abi tuter tag, a nerute le abi ber tag.
28 Bakedida iski abele zogo mer emeret detali, kega, Netat abim babei kemem uite le giz.
29 Gaire le satauro seb ge nakasir desauersili, a kerem dirilare, kega, Ma zogo meta ezageri, a thri gerger ko ikeli,
30 Ma mabu idigiri, a sataurolam uatabu.
31 Mokakalam gaire kole zogozogo le giz abi desauersili, a aotale giz, kega, E uader le idigir, a nole umer kak tababu idigiri.
32 Debele Keriso, Isaraela le giz la Opole, peidi uatabu sataurolam, keriba abi dasmer, a oituli. Abele neisi le kemem abi satauroem abi desauersili.
33 Opem haua sikes, kupkup ged ge uridili bakedilu abele nain haua.
34 Abele nain haua Iesu au ereretikri, kega, Eloi, Eloi, lama sabakethani? tonar abele, Kara Ade, kara Ade, nalugem ma kari nakaerti?
35 Uader le bako, aserare, uiaba detagereda, kega, Dasmer, E Elia dabgeri.
36 Nerute le koreder, sap uinega akmei, a pater ge dasirilu, a abi ikuar ko eree, a detager, kega, Sina; mi dasmer, Elia ko uatabu abi tatkurda.
37 Iesu emetu au ereretikri, Epe namarid tabara lamar.
38 Abele uali demed zogo meta muige tababu batoat, kotorlam a giz ge,
39 Abele kerem le, asesered netate handed ares le, abim opem tekue, erdalu tonar abara eumida, E detager, kega, Ageakar, Ade ra Uerem idali.
40 Gaire kosker giz tekue muriz ge dasmer; uiabi dog Maria Magadalena, a Maria kebi Iakobo ra apu, a Iose, a Salome;
41 Uiaba, Iesu irmilare E Galilaia ge, a abim dorge ikeli; a gaire kosker abi kemem irmilare Ierusalemaem.
42 Kikem, abele derser gerger, sabath iuaokaer,
43 Iosefa Arimathia le tabarki, le umele, a ekosili, E nerute le Ade ra baselaia naokaili; E saserim Pilatoim bakeam, a Iesu ra gem damos.
44 Pilato karom ese E eumida: E kerem le, asesered netate handed ares le, dabgeri, a abi eutumer, kega, Nako, emeret E eumida?
45 E asoli kerem lelam, E Iesu ra gem nakuar abim Iosefa.
46 E uali lino mog terapei, a E tatkurda, a uali lino de abi sopem, a baker kur daiui abi azeriklu; a au baker erparik gab dimilu.
47 Maria Magadalena, a Maria, Iose ra apu dasmer abele uteb abi ikedilu.