4
1 E iako degerati ko ereuerem keper tauer ge, gaire le netate gedim abim, abelelam E nar atiem, a emri, uiaba uridili tauer ge bamer.
2 Gaire mer E uiabim ereuerem mer babisdarie, E uiabidaratagerare abara okadeskeda, kega,
3 Uaba aserauem; Dasmer, nerute amorda le bakeam ko emor:
4 E dikri, a uader kep gab dege abi, epe ebur giz kotorlam tabakeuda abele eroare.
5 Uader kep tumem neidge abi, kebi seb ge; sobkak omeili, abelelam lerkar seb ge:
6 Gerger eupamada, a eueri, a eumili, abelelam nole sip kak.
7 Uader kep lu eipu daradara ge omeili, a detarapi, abelelam nole turum kak.
8 Uader kep debe seb ge abi, a omeili, a esali, a turum turum; a turum therti nagri, a sikesti; a uan handed.
9 E uiabim detagereda, kega, Le grip nagri ko asoli, debele E asoli.
10 E tepteb emri, gaire le abi dog emri, pako tuelf le, abi itmer tonar abele mer babisdarie.
11 E uiabim detagereda, kega, Gaire mu tonar Ade ra baselaia uabi dekuarare ko opaserertem; emetu ikeli abele gaire lu abkoreb uiabim nogle giz:
12 Abelelam ui ko dasmerare, epe nole asmer kak; a asoli, epe nole asor kak; uiaba depegelam, a uiaba uit ko detue.
13 E uiabim detagereda, kega, Nako, uaba nole asmer kak abele mer babisdarie? epe nako uaba ko umele gaire mer babisdarie uridili?
14 Abele amorda le, emor Ade ra mer.
15 Abele uader le gab ge, abele mer uiabi dog emor; uiaba asereda, epe Satana tabarki, abele mer uiabi nerkep ge emor ekadari.
16 Abele uader tumem neid ge emor; uiaba abele mer asereda, a sobkak sererge erperida;
17 Epe nole sip kak muige uiaba nerkep ge, abelelam nole niaiem ekue; menaba asiasi a dedkoli abele merlam tabarki, sobkak uiaba bakesmiri.
18 Abele uader le eipu daradara ge emor; uiaba abele mer asoli,
19 Epe gaire dikiapor lu lag geseb ge uiabi nerkep ge badari, pako geseb lu okardarem, pako uader lu lag, abele mer etarapi, epe nole turum kak.
20 Ege uader emor debe seb ge; uiaba abele mer asoli, a mamor erpeili, a turum turum, uader therti, a uader sikesti, a uader uan handed.
21 E uiabim detagereda, kega, Nako, lamepa ikedi kumete lokod ge, a laulau lokod ge? epe nole tum ge ikedi lamepa uteb?
22 Epe nole lu ispili, a nole opasereret kak; pako nole mud ge lu, a nole akmer kak.
23 Ese nerute le grip nagri ko asoli, debele E asoli.
24 E uiabim detagereda, kega, Uaba mamoro aserauem; abele tonar uaba detare, ko uabim detare; a ko uabi daisuerare le asereda.
25 Le nagri, ko abi ikuar; le nole nagri kak, ko ekada abele lu abi dog.
26 E detagereda, kega, Ade ra baselaia mokakalam le kep dikri seb ge;
27 E ko uteid, a ekeamlu ki ge a gerger, abele kep uai omeida, a bataile, E nole umer kak nagelam.
28 Tababu seb ge omeili; uai kekiam, sik keubu, epe turum agiag.
29 Turum agiag, epe namarida ko tigri, kerker ge nurabi.
30 E detagereda, kega, Na lu meriba ko abkoreb Ade ra baselaia? na lu abkoreb abele babisdarie?
31 Abele mokakalam sinapi kep, emetu emor, kebikebi kep tumem gaire kep uridili geseb ge emor,
32 Emetu emor, E omeida, a aule tumem gaire lu ekekri, epe gaire au tam disiri; a gaire ebur epereda mudi ge igiredi.
33 E Ade ra mer uiabim detagereda, mokakalam gaire mer babisdarie, abkoreb uiaba umele asoli.
34 E nole uiabim atager kak, ese nole mer babisdarie; uiaba mud uteb ge, E uiabim, abara kaimeg giz, gaire tonar mer detaut.
35 Abele gerger kikem, E uiabim daratagereda, kega, Minaba atiem nerut apekem.
36 Uiaba emetu le lakub emarida, uiaba abi egared nar ge atiem. Uader kebi nar abi doakri.
37 Au ui tabarki, a gaire zauber nar etatkoi, a mitkar.
38 E amaz ge kor ge uteidi: uiaba abi itir, a abi detager, kega, Kole, mama laglag ki nabaume?
39 E tekue, uag daisumda, a gur detager, kega, Bamer, debe meda. Iako uag ekeamulu, ege metalu.
40 E uiabim daratagereda, kega, Nalugelam uaba geum mokakalam? nako uaba nole oatur kak?
41 Uiaba au geumu, a mer atagere, kega, Nete dali, uag a gur abi asoli?