19
1 Ege Iesu eseamulu uader abara mer, ege E dikaelu Galilaia, a bosi Iudaia sep ge apek Ioridano.
2 Gaire lekub abim irmilare; epe E uiaba nadgirare abele uteb ge.
3 Ege gaire Faresaio giz abim tabakeuare, a uiaba abi mirem, kega, Nako gelar nagri nerute le dituaki abara kosker a gaire luglam?
4 Ege E uiabi etkalu, kega, Nako uaba nole etage, abele le detagem le gizlam, E ikeli neis le kimiar pako kosker,
5 E uiabi detager, Abele lu kimiar dekaerti abara aba pako abara apu, a abara kosker ekpi; iaueakai neis le netat gem?
6 Peike nole ko neis le, epe neis le netat gem. Dasmer, uader le Ade daratkaprida, nole le atakeamur kak.
7 Ege uiaba abim daratagerare, Nalugem Mose de mer tigri ko ikuar abele jauali kosker abi dituaki?
8 Ege E uiabi detager, Ege uaba nerkepu au kelarkelar, abelelam Mose uabi ikuar ko dituaki uaba kosker; epe nole mokakalam gizlam.
9 Kakanali uabi detager, kega, Ese le dituaki tabara kosker a nole ko kak, a ko ispi nerute kosker, E kogem; ese le ispi abele amuam kosker, E dali kogem.
10 Ege abara kaimeg giz abim daratagerare, Ese tonar abkoreb kimiar a kosker, debele nole ispili kak.
11 E uiabi detager, Umer kak gaire le uridili egaret abele mer, a uader le tepteb abkoreb ikuar.
12 Abelelam uader eunuka umele kebi ueremlam, a uader eunuka uiaba tababu eunukaem abele kotor baselaialam. Ese le umele egaret, debele E egaret.
13 Ege egardare abim gaire kebile giz, iaueakai abara tag dikmerik uiaba tum ge, a esorerapare, ege abara kaimeg giz uiaba daraisumdarare.
14 Ege Iesu uiabi detager, Nole aisumdar kak, karim tabakeuare: abelelam uiaba ike abkoreb mokakalam kotor baselaia ge.
15 E uiabi dikmerik abara tag, ege E adem bakeam abele utebelam.
16 Dasmer, nerute le abim tabakeam, kega, Debe merkem ae, nalu debe lu kaka ikeli, iaueakai kaka nagri eded aseamur kak?
17 E abim etkalu, Nalu ma kari babeid kaka debele? nole nerute le debele, epe Ade tepteb: ese ma lagelag eded, ma mamor asesered gaire gelar giz.
18 E abim detaut, Nade? Ege Iesu abim etkalu, kega, Ma nole le ipiti eumilu, Ma nole eruam, Ma nole bes ageakarem,
19 Ma mamor omare mabi abera a apuera; Ma ko abi omare abele le emeri mai kes, mokakalam ma omare marim.
20 Ege abele makeriam abim detaut, Ka umele asesered gaire lu uridili kebi ueremlam; a nalu lu kaier kaka nole ikeli?
21 Iesu abim detager, Ese ma lagelag debele kemerkemer, mara tonar ma bakeam a ko terapei gaire mara lu, ma uiabi nakuarare gaire lu kak le, iaueakai mara lu nagri kotor ge gaire debe lu giz, a ma tabakeam, kari narmili.
22 Ege abele makeriam asoli abele mer, E adem bakeam au okasosok; abelelam gaire abara lu.
23 Iesu detager abara kaimeg giz, Ageakar kaka uabi detager, Au beber lu giz ra apu a bao kotor baselaia ge.
24 Kaka uabi detager, Kamela umele bao abele nila neb ge, epe lu giz ra apu umer kak erdali Ade ra baselaia.
25 Abara kaimeg giz aserare, a uiaba aukase damred, a uiaba mer, kega, Ese mokakalam, nete le umele eded?
26 Iesu uiabi dasmer, a uiabi detager, Le giz umer kak abele lu; epe Ade umele gaire lu uridili.
27 Ege Peteru de abim detaut, kega, Dasmer, keriba dikaer gaire lu uridili, a keriba mari narmili; nalu keriba lu nagri?
28 Ege Iesu uiaba detager, Ageakar kaka uabi detager, Uaba kari narmili, ese Le la Uerem egimuru taba opole bao ge a zorom ge, abele ko ditimedlu, a uaba ko bagiri opole bao ge tuelf, a mer atager Isaraela ra nosik tuelf.
29 Ese nerute le dikaer meta, pako keimer giz, a berbet giz, pako aba, a apu, pako kosker, a omasker giz, a ged giz, kara neilam, E nagri dordor gaire lu mokakalam netate handed, a ko nagri eded aseamur kak.
30 A gaire le kekiam, a ko keubu; a uader le keubu, a ko kekiam.