22
1 Ege Iesu ko etomeret uader mer babisdarie uiabim, kega,
2 Kotor baselaia abkoreb nerute opole, E derser leuer sererege tabara uerem,
3 E namarkare tabara memeg le uiabim gaire le emetu aserare abele mer tigri, Ua tabakeuare leuer aroem; a uiaba nole lakak tabakeuare.
4 E ko namarkare uader abara memeg le, a mer kega, Dasmer, kaka emetu derser gaire leuer; kara kau emetu ipitare, a gaire ebur debe kemkem narsare, kaka emetu derser gaire lu uridili, ua tabakeuare leuer aroem.
5 A uiaba baokarid, a uiaba keubu bamarkare, nerute le tabara ged, a nerute le tabara lu bodomalam;
6 A uader le uiaba erpeirare abara memeg le, a uiaba dedkolare, pako ipit eumilu.
7 Abele opole asoli E au urker, E uiabi namarkare gaire tabara ares le, uiaba narsare gaire le dedkolare abara memeg le, a ko digeare uiaba uteb.
8 E uiabim detager tabara memeg le, Emetu derser leuer, a nole abkoreb uiaba le emetu mer namarid.
9 Dasmer, uaba bakeuare gaire au gab, a gaire le uridili uaba erdali, uaba etomeret abele leuer.
10 Ege abara memeg le tabakeuare gaire au gab, a uiaba etami uader le, adud a uader le debele; abele leuer uteb mitkar lelam, uiaba eidi leuer eroare.
11 Abele opole tabalu abele meta, E uiabi dasmer uiaba eidi leuer eroare, E erdali nerute le nole nagri am uali abkoreb leuer aro am uali;
12 E abim detaut, Makanali ae, nalugelam ma tabakeam badare abele meta, ma nole nagri abele leuer aro am uali? Ege E nole mer kak.
13 Abele opole abi detager tabara memeg le, Uaba didbare abara teter pako abara tag, abi ais batauered adige abele kupikup ge; nagri au ebazuer pako abele tereg ikupamaretlare.
14 Abelelam uader le no aserare, a neis neis le mamor irmilare.
15 Ege Faresaio giz tabakeuare, a uiaba mer atager, Nalu lu meriba abi mirem abi merlam?
16 A uiaba namarkare abim uiaba kaimeg giz kemem pako Herodiano giz, abi kega, Ereuer le ae, keriba umele ma le ageakar, mama ereuerem Ade ra gab pako ageakar, ma nole geum nerute le: abelelam ma nole dikiapore nerute le.
17 Dasmer, ma keribi etomeret, Nako ma dikiapor? Abkoreb ko ikuar Kaisaraim zegu lu, a nole?
18 Iesu opasereret uiaba nerkep adud, a uiabi kega, Uaba bes le giz, nalugelam uaba kari mirem?
19 Kari natomertare mani abele zegu lu. Ege uiaba abi ikuar nerute denari.
20 E uiabi detager, Nete ra op abele, pako abele jauali?
21 A uiaba abi detagerare, Kaisara ra op. Ege E uiabi detager, Dasmer, Kaisara ra lu Kaisaraim ikuar; Ade ra lu Adim ikuar.
22 Uiaba aserare, epe uiaba au kase damereda, a uiaba abi dikaer, a adem bakeuare.
23 Peike abele kerker Sadukaio giz abim tabakeuare, uiaba dikiaporare nole le ko eded akaid eudelam: uiaba abi itimerare,
24 Kega, Ereuer le ae, Mose keribi mer tigri, Ese eumilu nerute le, a nole uerem kak, abara keimer ko ispi abara kosker, iaueakai nagri kusi abi keimerlam.
25 Keribi dog emri sefen gaire uerem: a narbet uerem ispi abara kosker, E eumilu a nole uerem kak, abara keimer ko ispi abara kosker:
26 Mokakalam nerute keimer, mena bakedida sefen le giz.
27 Abele kosker keubu eumilu.
28 Dasmer, ese keubu gerger tabarki, nete le uiabielam ais abele kosker? abelelam uiaba kosker uridili.
29 Ege Iesu etkalu uiabim, kega, Uaba didmirik, abelelam uaba asmer kak abele jauali zogo, pako Ade ra adigir.
30 Abelelam keubu gerger tabarki uiaba ko eded akaida eudlam, nole kosker aspili kak, a nole kimiar aspili kak, uiaba mokakalam Ade ra angela giz kotor ge.
31 Abele ko eded akaida eudlam, nako uaba nole atager kak Ade ra mer uabim, kega,
32 Kaka Aberahama ra Ade, a Isaaka ra Ade, a Iakobo ra Ade? Abele Ade nole eud le giz ra Ade, epe mamor eded le giz.
33 Gaire lekub aserare, ege uiaba abi damreda abara giz merlam.
34 Gaire Faresaio giz aserare Sadukaio le nole abi mer kak, ege uiaba etamiare abele uteb ge.
35 Ege nerute uiaba gelar ereuer le, abi itimer mirem kega,
36 Ereuer le ae, na gelar aule?
37 Ege Iesu abi etkalu, Ma abi omare abele Opole mara Ade mara nerkep kemerkemer, a mara lamar kemerkemer, a mara akiapor kemerkemer.
38 Abele gelar kekiam, pako aule.
39 Mokakalam abara neisem, Ma abi omare abele le emri mai kesi, mokakalam ma omare mabu.
40 Peike neis gelar giz abele gelar uridili, pako abele gaire perofeta giz.
41 Faresaio giz netate gedim, ege Iesu de uiabi nautumerare,
42 Kega, Nako uaba dikiaporare abele Keriso? nete ra uerem? Ege uiabi abi detagerare, Dauida ra Uerem.
43 E uiabi detager, Dasmer, Nako Dauida nei atker Lamarlam, E abara Opole, kega,
44 Abele Opele abi detager kara Opole, Ma emri kara tuter tag, mena kaka ikeli uader le marim kurabkurab mokakalam lu detager mara teter?
45 Dasmer, ese Dauida E nei atker Opole, a nalugelam E ko nei atker abara uerem?
46 Ege nole nerute le umele abim etkalu, a ditimedlu abele gerger nole nerute le ko saserim itimer abim nerute lu.