24
1 Ege Iesu osmelu adem abele zogo metalam, epe abara kaimeg giz abim tabakeuare, a abi etomeret uader gaire meta giz abele zogo meta ge.
2 A Iesu uiabi detager, Nako uaba nole asmer kak gaire lu uridili? Ageakar kaka uabi detager, Nole nerute baker igi tumem nerute baker, iako uababuare ueseamulu.
3 E emri abele Oliua paser, ege abara kaimeg giz abim tabakeuare uiaba tepteb, a uiaba kega, Ma keribi detagerare, Na kerker tabarki abele gaire lu? a nalu atamelam ma tabarki, pako abele geseb ra mop?
4 Ege Iesu etkalu uiabim kega, Mamoro nole nerute le uabi didmirik.
5 Abelelam gaire le tabarki kara nei ge, kega, Kakanali abele Keriso; uiaba ko didmirik gaire le.
6 Uaba aserare abele barseda, pako ares ra mer; uaba nole okasosok, abelelam abkoreb bakedida peike gaire lu uridili, a nole tabarki abele mop ge.
7 Abelelam nerute ged bakeuare barseda nerute ged, pako nerute baselaia a nerute baselaia, iaueakai memeig tabarki pako gim gim a demali nerute uteb a nerute uteb.
8 Peike gaire lu uridili abele ditimeda gaire lu asiasi.
9 Ege uiaba uabi namarkare abele asiasi, pako uiaba uabi deres eumida; a gaire ged uridili uabi derar kara neilam.
10 Abele kerker gaire le asareda, nerute le mirem nerute le, a uiaba ueku uek.
11 A gaire perofeta bes tabarki, a uiaba didmirik gaire le.
12 Gaire le la nerkep gebgeb, abelelam au kale omeid abele adud tonar.
13 Epe abele le niaiem tekue mena bakedida mop ge, E ko eded.
14 A ko etomeret debe baselaia ra mer gaire ged narid, ko ikeli ageakarem gaire ged narid; iaueakai bakedilu abele mop ge tabarki.
15 Ese uaba erdali abele derar lu a dedkolare, mokakalam Daniela perofeta detaut, E tekue abele zogo uteb (le etage mamor dikiapor:)
16 Uaba Iudaia le abele kerker, uaba derar gaire paser:
17 Abele le meta tumge nole ko tabu bao ais nerute lu tabara metalam:
18 Abele le sumez ge nole ko akomeda tabara am uali ais.
19 Uaiai gaire kosker kem kem pako kosker uerem uerem abele kerker!
20 Uaba esorerapare iaueakai uaba nole derar abele zeru urut, pako abele sabath ge:
21 Abelelam abele kerker bakedida au asiasi, nole abkoreb ditimeda gaire lu detagem abele geseb ge bakedida, peirdi nole mokakalam keubu gerger.
22 Ese nole teupai abele kerker, umer kak nerute le eded: epe sobkak eseamud abele kerker uiabielam emetu depegemerdare.
23 Ese nerute le uabi detager abele kerker, Dasmer, Keriso ike, pako pedali; uaba nole abi asoli.
24 Abelelam gaire Keriso bes tabarki, pako perofeta bes, uiaba ikerare gaire au atamelam pako adigir; iaueakai didmirik uader le emetu depegemelu, ese umele.
25 Dasmer, kaka kekiam uabi detomerta.
26 Iaueakai ese uiaba uabi detager, Dasmer, E penoka sumez ge; uaba nole bakeuare abim: Dasmer, E muige uteb ge, uaba nole uiabi asoli.
27 Abelelam mokakalam perper bilba abele naiger pek, a ko datki abele ziai pekem; mokakalam Le la Uerem ko tabarki.
28 Abelelam abele uteb nagri eud le, gaire aeto abi dog.
29 Ese emetu eseamud abele asiasi abele kerker, ege abele lem au kupikup nole be kak, abele meb nole meb gerib kak, a uer giz nabuda abele kotorlam, kotor ge demali gaire ares lu.
30 Ege erdali abele kotor ge abele atamelam Le la Uerem: a gaire nosik le abele geseb ge au ebazuer, a uiaba erdali Le la Uerem tabarki gaire baz abele kotor ge, pako abele adigir a au zorom zorom.
31 E namarkare tabara angela giz pako abele maber au bumer, a uiaba taraisare foa uag peklam uader le emetu depegemelu, ditimeda kotor paikai a bakedilu nerute paikai.
32 Uaba dikiaporare abele mer babisdarie abele suke; Ese kerkar omeida abara girikupi tam, pako au lamalam; uaba umele urueri urut maike:
33 Mokakalam uaba, ese uaba erdali gaire lu uridili, uaba umele E maike abele gab te ge.
34 Ageakar kaka uabi detager, Nole eseamud abele nosik, mena bakedilu gaire lu uridili.
35 Eseamulu abele kotor ge, pako abele geseb ge, epe kara mer giz nole aseamur kak.
36 Ege abele kerker pako abele haua ge nole le asmer kak, a angela giz kotor ge nole umer kak, ege kara Aba tepteb.
37 Mokakalam Noa ra kerker, abkoreb Le la Uerem ko tabarki.
38 Abelelam mokakalam abele kerker mega ogiri nole tabarki, uiaba eroli a ereli, a uiaba kosker ispida pako namarid, bakedilu abele kerker Noa balu abele tabara nar ge,
39 A uiaba umer kak abele mega ogiri tabarki, a uiaba uridili ais adem eseamulu; mokakalam Le la Uerem ko tabarki.
40 Abele kerker neis le emri sumez ge; nerute le ais, a nerute le ikedi.
41 Neis kosker edatimiri abele uteb saito edatimiri; nerute kosker ais, a nerute kosker ikedi.
42 Peike, uaba nole ute kak, abelelam uaba umer kak na haua ge uaba Opole tabarki.
43 Uaba dasmer abele lu, ese tarim le ra boai umele abele haua ge eruam le tabakeam abele ki ge, E umele asesered, E nole dikaer tabara meta ko daiui.
44 Abele lu uaba mamor derser; abelelam abele haua ge uaba nole akiapor kak, Le la Uerem tabarki.
45 Nete abele ageakar memeg le pako debe akiapor, abara opole E ikosi a sirdam gaire memeg le, E uiabi ikuar uiaba leuer gaire haua abkoreb?
46 Uerkab abele memeg le, ese abara opole tabarki, a abi erdali mena ikeli abkoreb.
47 Ageakar kaka uabi detager, E abi ikosi ko sirdam abara gaire lu uridili.
48 Ese abele adud memeg le E tababu detager tabara nerkepu, Kara opole uapum tabakeam;
49 E ipit tabara kaimeg memeg le, a ko eroare pako ereli okakise uader le turtur ereli;
50 Abele memeg le ra opole tabarki abele gerger nole asesere kak, pako abele haua E nole asmer kak,
51 E au bodomalam ikuar abim, a ko abi ikuar abara uteb kemem gaire bes le giz; nagri au ebazuer pako tereg ikupamaretlare.