୬
ହନ୍କ ଆଡଃ ଏଙ୍ଗାଆପୁକ
୧ ଏ ହନ୍କ, ପ୍ରାଭୁଆଃ ନାଗେନ୍ତେ ଆପେୟାଃ ଏଙ୍ଗାଆପୁକକେ ମାନାତିଙ୍ଗ୍କପେ, ଚିୟାଃଚି ନେଆଁଁଗି ଠାଉକାତେୟାଃ ତାନାଃ ।
୨ “ଆପେୟାଃ ଏଙ୍ଗାଆପୁକକେ ମାଇନ୍କପେ” ନେଆଁଁ ବାନାର୍ସାରେ ମେସାକାନ୍ ମିଆଁଦ୍ ପାହିଲା ଆନ୍ଚୁ ତାନାଃ ।
୩ “ଜେ'ଲେକାଚି ଆପେୟାଃ ବୁଗିନାଃ ହବାଅଃଆ ଆଡଃ ଆପେ ନେ ଅତେରେ ପୁରାଃ ସିର୍ମାପେ ଜୀହୁଦଃଆ ।”
୪ ହେ ଆପୁକ, ଆପେୟାଃ ହନ୍କକେ ଆଲ୍ପେ ଖିସ୍ଇଚିକଆ, ମେନ୍ଦ ଇନ୍କୁକେ ପ୍ରାଭୁଆଃ ଇନିତୁ ଆଡଃ ଚେନେତାଅତେ ଜାତ୍ନାଅକପେ ।
କିରିଙ୍ଗ୍ୟାଁକାନ୍ ଦାସିକ ଆଡଃ ଗୁସିୟାଁକ
୫ ହେ କିରିଙ୍ଗ୍ୟାଁକାନ୍ ଦାସିକ, ଆପେ ଖ୍ରୀଷ୍ଟ୍କେ ମାନାତିଙ୍ଗ୍ତାନ୍ ଲେକାଗି, ମନ୍ସୁରୁଦ୍ରେ ବରତେ ଏକ୍ଲାଅଃତାନ୍ଲଃ ଅତେରେନ୍ ମାନୱା ଗୁସିୟାଁକକେ ମାନାତିଙ୍ଗ୍କପେ ।
୬ ଗୁସିୟାଁ ଆପେକେ ନେଲ୍ପେତାନ୍ ଇମ୍ତା ଆଇଃକ୍କେ ସୁକୁଇଚି ନାଗେନ୍ତେ ଏସ୍କାର୍ କା କାମିକେଦ୍ତେ, ଖ୍ରୀଷ୍ଟ୍ଆଃ କିରିଙ୍ଗ୍ୟାଁକାନ୍ ଦାସିଲେକା ଆପେୟାଃ ସବେନ୍ ମନ୍ସୁରୁଦ୍ଲଃ ପାର୍ମେଶ୍ୱାର୍ଆଃ ମନେ ଲେକା କାମିପେ ।
୭ ଆପେ ହଡ଼କଆଃ ଏସ୍କାର୍ ସୁସାର୍ତାନାଲେ ମେନ୍ତେ କା ଉଡ଼ୁଃକେଦ୍ତେ, ପ୍ରାଭୁଆଃ ସେୱାତାନାଲେ ମେନ୍ତେ ପୁରାଃ ସୁକୁମନ୍ତେ ଏନା କାମିପେ ।
୮ ପାହାମାକାପେ, କିରିଙ୍ଗ୍ୟାଁକାନ୍ ଦାସି ଚାଏ କା କିରିଙ୍ଗ୍ୟାଁକାନ୍ ଦାସି ସବେନ୍ ମିମିଆଦ୍ ହଡ଼କଆଃ ବୁଗିନ୍ କାମିରେୟାଃ ନାଲା ପ୍ରାଭୁଗି ଏମାକଆ ।
୯ ହେ ଗୁସିୟାଁକ, ଆପେୟାଃ କିରିଙ୍ଗ୍ୟାଁକାନ୍ ଦାସିକକେୟ ଏନ୍ଲେକାଗି ନେଲ୍କପେ ଆଡଃ ଇନ୍କୁକେ ଆଲ୍ପେ ବତଙ୍ଗ୍କଆ । ପାହାମାକାପେ, ଆପେ ଆଡଃ ଆପେୟାଃ କିରିଙ୍ଗ୍ୟାଁକାନ୍ ଦାସିକ ସିର୍ମାରେନ୍ ପ୍ରାଭୁଆଃ ତାନ୍ପେ । ଇନିଃ ସବେନ୍କକେ ମିଦ୍ଗି ବିଚାର୍କଆ ।
ଆତ୍ମିକ୍ରେୟାଃ ଗଟା ହାଁତେୟାର୍
୧୦ ଟୁଣ୍ଡୁରେ, ପ୍ରାଭୁଲଃ ମେସାକେଦ୍ତେ ଆୟାଃ ମାରାଙ୍ଗ୍ ପେଡ଼େଃରେ ପୁରାଃଗି ପେଡ଼େଜଃପେ ।
୧୧ ପାର୍ମେଶ୍ୱାର୍ ଏମାକାଦ୍ ସବେନ୍ ହାଁତେୟାର୍ ତୁସିୟେଁନ୍ପେ, ଜେ'ଲେକାଚି ଆପେ ସାଏତାନ୍ରାଃ ଏତ୍କାନ୍ କାମିରେପେ ତିଙ୍ଗୁ ଦାଡ଼ିୟା ।
୧୨ ଚିୟାଃଚି ଆବୁ ଅତେରେନ୍ ମାନୱାକଆଃ ବିରୁଧ୍ରେ କାବୁ ଲାଡ଼ାଇତାନା ମେନ୍ଦ ସିର୍ମା ଠାୟାଦ୍କରେନ୍ ଏତ୍କାନ୍ ଆତ୍ମାରେୟାଃ ପେଡ଼େଃ ଆଡଃ ନେ ନୁବାଃ ଦିପିଲିରେ ରାଇଜ୍ତାନ୍କଆଃ, ଆକ୍ତେୟାର୍ତାନ୍କଆଃ ବିରୁଧ୍ରେ ଲାଡ଼ାଇତାନାବୁ ।
୧୩ ଏନାତେ ନାହାଁଃ ପାର୍ମେଶ୍ୱାର୍ ଏମାକାଦ୍ ହାଁତେୟାର୍ ତୁସିଙ୍ଗ୍କେଦ୍ତେ ଏତ୍କାନ୍ ଦିପିଲିରେ ଆପେ ବାଇରିକଆଃ ଲାଡ଼ାଇରେ ତିଙ୍ଗୁ ଦାଡ଼ିୟାପେ, ଆଡଃ ଟୁଣ୍ଡୁ ଜାକେଦ୍ ଲାଡ଼ାଇରେୟ କେଟେଦ୍ରେ ତାଇନ୍ ଦାଡ଼ିୟାପେ ।
୧୪ ଏନା ନାଗେନ୍ତେ ଆପେୟାଃ ମାୟାଙ୍ଗ୍ରେ ସାନାର୍ତିରେୟାଃ କାସ୍ନାତେ ତଲାକାନ୍ ଆଡଃ ଧାରାମ୍ରେୟାଃ ବୁକୁପାଟା ତୁସିଙ୍ଗ୍କେଦ୍ତେ ତିଙ୍ଗୁନ୍ପେ,
୧୫ କାଟାରେ ଜୀଉସୁକୁରେୟାଃ ସୁକୁକାଜି ଲେକାନ୍ ଖାର୍ପା ତୁସିଙ୍ଗ୍କାନ୍ଲଃ ସେକାଡ଼୍କେଦ୍ତେ ତିଙ୍ଗୁନ୍ପେ ।
୧୬ ସବେନ୍ ଇମ୍ତା, ବିଶ୍ୱାସ୍କେ ଢାଲ୍ ଲେକା ସାବ୍କେଦ୍ତେ ସେସେନ୍ପେ, ନେଆଁଁରେୟାଃ ଦେଙ୍ଗାତେ ଏତ୍କାନ୍ ହରାତେ ହୁରାଙ୍ଗ୍ଅଃତାନ୍ ସବେନ୍ ଜୁଲ୍ତାନ୍ ସେଙ୍ଗେଲ୍ରେୟାଃ ସର୍କକେ ହକା ଦାଡ଼ିୟାପେ ।
୧୭ ପାରିତ୍ରାଣ୍ରେୟାଃ ଟୁପୁରି ଆଡଃ ପାବିତାର୍ ଆତ୍ମା ଏମାକାଦ୍ପେ ପାର୍ମେଶ୍ୱାର୍ଆଃ ବାଚାନ୍ ଲେକାନ୍ ତାରାଉଡ଼ି ନାମ୍ଜମ୍ପେ ।
୧୮ ପାର୍ମେଶ୍ୱାର୍ଆଃ ଦେଙ୍ଗା ଆସିକେଦ୍ତେ ବିନ୍ତି ହରାତେ ନେ ସବେନାଃ ରିକାଏପେ । ସବେନ୍ ଲେକାତେ ପାବିତାର୍ ଆତ୍ମାରେୟାଃ ହରାତେ ବିନ୍ତିପେ । ଚିର୍ଗାଲାକାନ୍ ତାଇନ୍ପେ, ଚିଉଲାଅ ଆଲ୍ପେ ଲାଗାଃଅଆ, ପାର୍ମେଶ୍ୱାର୍ଆଃ ହଡ଼କ ନାଗେନ୍ତେ ସବେନ୍ ଇମ୍ତା ବିନ୍ତିରେ ତାଇନ୍ପେ ।
୧୯ ଆଇଁୟାଃ ନାଗେନ୍ତେୟ ବିନ୍ତିପେ, ଜେ'ଲେକାଚି ସୁକୁକାଜିରେୟାଃ ଉକୁଆକାନ୍ କାଜିକେ ବେଗାର୍ ବରତେ ଉଦୁବ୍ ନାଙ୍ଗ୍ ପାର୍ମେଶ୍ୱାର୍ ଆଇଙ୍ଗ୍କେ ଦେଙ୍ଗାଇଁୟା ।
୨୦ ନାହାଁଃ ଆଇଙ୍ଗ୍ ଜେହେଲ୍ରେ ସିକିଡ଼ିକାନ୍ ତାଇନ୍ରେୟ, ସୁକୁକାଜି ନାଗେନ୍ତେ ଆଇଙ୍ଗ୍ ମିଆଁଦ୍ କାଜି ଇଦିସେଟେର୍ ହଡ଼ ତାନିଙ୍ଗ୍ । ବିନ୍ତିପେ, ଜେ'ଲେକାଚି ଆଇଙ୍ଗ୍ ବେଗାର୍ ବରତେ ସୁକୁକାଜିଇଙ୍ଗ୍ ଉଦୁବ୍ ଦାଡ଼ିୟା ।
ଟୁଣ୍ଡୁ ଜହାର୍
୨୧ ଆଇଁୟାଃ ବିଷାଏରେ ଆପେ ଜେ'ଲେକା ସାରି ଦାଡ଼ିୟାପେ, ଏନାମେନ୍ତେ ଆଲେୟାଃ ଦୁଲାଡ଼୍ ହାଗା ଆଡଃ ପ୍ରାଭୁଆଃ କାମିତାନ୍ ପାତିୟାରଃ ଲେକାନ୍ ଦାସି ତୁଖିକ୍, ଆଇଁୟାଃ ବିଷାଏରେ ଆପେକେ ସବେନ୍ କାଜି କାଜିୟାପେଆ ।
୨୨ ଆଲେ ସବେନ୍କ ଚିଲ୍କା ମେନାଲେୟା, ଏନ୍ ବିଷାଏରେ ଉଦୁବ୍କେଦ୍ତେ ଆପେୟାଃ ଜୀଉରେ ରାସ୍କାପେ ନାଗେନ୍ତେ ଆଇଙ୍ଗ୍ ଇନିଃକେ ଆପେତାଃତେଇଙ୍ଗ୍ କୁଲିତାନା ।
୨୩ ଆବା ପାର୍ମେଶ୍ୱାର୍ ଆଡଃ ପ୍ରାଭୁ ୟୀଶୁ ଖ୍ରୀଷ୍ଟ୍ ବିଶ୍ୱାସୀ ହାଗା ମିଶିକକେ ଜୀଉସୁକୁ, ଦୁଲାଡ଼୍ ଆଡଃ ବିଶ୍ୱାସ୍ ଏମାକକାଏ ।
୨୪ ଅକନ୍କ ଆବୁଆଃ ପ୍ରାଭୁ ୟୀଶୁ ଖ୍ରୀଷ୍ଟ୍କେ କା ଟୁଣ୍ଡୁଃ ଦୁଲାଡ଼୍ତେ ଦୁଲାଡ଼୍ତାନାକ, ଇନ୍କୁଲଃ ପାର୍ମେଶ୍ୱାର୍ଆଃ ସାୟାଦ୍ ହବାଅଃକା ।