ଯୋହନଙ୍କ ଲିଖିତ ତୃତୀୟ ପତ୍ର
ଯୋହାନ୍ ଅଲାକାଦ୍ ଆପିୟା ଚିଟାଉ
ପାରିଚାଏ
ଯୋହାନ୍ଆଃ ଆପିୟା ଚିଟାଉ ଯୋହାନ୍ଆଃ ହରାତେ ୫୦-୧୦୦ କରେ ୟୀଶୁ ଖ୍ରୀଷ୍ଟ୍ଆଃ ଜାନାମ୍ ତାୟମ୍ତେ ଅଲାକାନ୍ ତାଇକେନା । ଯୋହାନ୍ ଆଇଃକ୍କେ ଅନଲ୍ନିଃ ଲେକା ପାରିଚାଏ କା ଏମ୍କେଦ୍ତେ ଆପାନ୍କେ ପ୍ରାଚିନ୍ ଲେକା ପାରିଚାଏ ଏମାକାଦାଏ, ଏନ୍ଲେକାଗି ଯୋହାନ୍ ଆୟାଃ ଏଟାଃ ଚିଟାଉରେ ପାରିଚାଏ ଏମାକାଦାଏ ୧:୧; ୨ ଯୋହାନ୍ ୧:୧ । ନେଆଁ ବିଶ୍ୱାସଃ ତାନା ଯେ, ଇନିଃ ଏଫିସୁସ୍ରେ ତାଇକେନ୍ ଇମ୍ତା ଯୋହାନ୍ ଅଲାକାଦ୍ ସୁକୁକାଜିଲଃ ଆପିୟା ଚିଟାଉକହଗି ଅଲାକାଦ୍ ତାଇକେନାଏ, ଏନା ହବାଅଃତାନା, ୧ ଯୋହାନ୍, ୨ ଯୋହାନ୍, ୩ ଯୋହାନ୍ ।
ଯୋହାନ୍ ଗାୟସ୍ ନୁତୁମ୍ ମିଆଁଦ୍ ବିଶ୍ୱାସୀକେ ନେ ଚିଟାଉରେ ଉଦୁବିତାନା । ଇନିଃ ଗାୟସ୍କେ ମିଆଁଦ୍ ଗାତି ଲେକା କାଜିକେଦ୍ତେ ଏନ୍ ପାର୍ଗାନ୍ରେ ହରାସେନ୍ତାନ୍ ଖ୍ରୀଷ୍ଟିୟାନ୍ ହାଗାକକେ ପେଡ଼ାକ ନାଙ୍ଗ୍ କାଜିକାଇ ତାଇକେନାଏ ।
ପୁଥି ଭିତାର୍ରେ ଅଲାକାନ୍ କାଜି
୧. ଯୋହାନ୍ ଆୟାଃ ପାରିଚାଏ ଏମାଃଏ । ୧:୧
୨. ଯୋହାନ୍ ଗାୟସ୍କେ ଜୀଉରେ କେଟେଦ୍କେଦ୍ତେ ହରାସେନ୍ତାନ୍କକେ ପେଡ଼ାକ ନାଙ୍ଗ୍ ଇନିତୁ ଏମାଃଏ । ୧:୨-୮
୩. ଯୋହାନ୍, ଦିୟତ୍ରୀଫା ଆଡଃ ଦିମିତ୍ରୀୟ, ନେ ବାର୍ହଡ଼୍କିନାଃ ବିଷାଏରେ କାଜିୟାଃ । ୧:୯-୧୨
୪. ଟୁଣ୍ଡୁରେ ଆୟାଃ ଅନଲ୍ ଅଲ୍ ଚାବାକେଦାଏ । ୧:୧୩-୧୪
୧
୧ ପ୍ରାଚିନ୍ ଯୋହାନ୍ ଆଇଙ୍ଗ୍ ତାନିଙ୍ଗ୍, ଆଇଁୟାଃ ଦୁଲାଡ଼୍ ଗାୟସ୍ତାଃତେ ନେ ଚିଟାଉ ଅଲେତାନାଇଙ୍ଗ୍ । ଇନିଃକେ ଆଇଙ୍ଗ୍ ସାର୍ତିଗିଙ୍ଗ୍ ଦୁଲାଡ଼ିତାନା ।
୨ ହେ ଦୁଲାଡ଼୍ ଗାତି, ଆମାଃ ମନ୍ସୁରୁଦ୍ ସୁକୁରେ ମେନାଃଲେକା, ଆମାଃ ସବେନ୍ କାଜିକାମିକରେ ସୁକୁ ହବାଅଃକା ଆଡଃ ଆମ୍ ଜୀଉସୁକୁରେ ତାଇନ୍ମେ ମେନ୍ତେ ଆଇଙ୍ଗ୍ ବିନ୍ତିତାନା ।
୩ ଆମ୍ ସାନାର୍ତିରେ ପାତିୟାର୍ରଃ ଲେକା ମେନାମେୟାଁ ଆଡଃ ସବେନ୍ ଇମ୍ତା ସାନାର୍ତିରେମ୍ ସେସେନ୍ତାନା ମେନ୍ତେ ଚିମିନ୍ ବିଶ୍ୱାସୀ ହାଗାକତାଃଏତେ ଗାୱାକ ଆୟୁମ୍କେଦ୍ତେଇଙ୍ଗ୍ ସୁକୁୟାନା ।
୪ ଆଇଁୟାଃ ହନ୍କ ସାନାର୍ତିରେ ସେସେନ୍ତାନାକ ମେନ୍ତେ ଆୟୁମ୍ତେୟାଃଏତେ ପୁରାଃ ରାସ୍କା ବାନଃଆ ।
ଗାୟସ୍ଆଃ ବୁଗିନ୍ କାମିରେୟାଃ ମାନାରାଙ୍ଗ୍
୫ ହେ ଦୁଲାଡ଼୍ ଗାତି, ଖ୍ରୀଷ୍ଟ୍ ବିଶ୍ୱାସୀ ହାଗା ମିଶିକ ନାଗେନ୍ତେ ନେ'ଲେକାଚି ଇନ୍କୁକେ କା ନେଲ୍ ଉରୁମ୍କାକରେୟ, ଆପେ ଇନ୍କୁକେ ପାତିୟାର୍ରଃ ଲେକା ମାଇନ୍କତାନାପେ ।
୬ ଇନ୍କୁ କାଲିସିୟା ସାମ୍ନାଙ୍ଗ୍ରେ ଆମାଃ ଦୁଲାଡ଼୍ ବିଷାଏରେ ଗାୱାକ ଏମେତାନା । ଆମ୍ ପାର୍ମେଶ୍ୱାର୍ଆଃ ମନେଲେକା ଇନ୍କୁକେ ଦେଙ୍ଗାକେଦ୍ତେମ୍ କୁଲ୍କରେଦ ଆମ୍ ବୁଗିନ୍ କାମିମ୍ କାମିୟା ।
୭ ଚିୟାଃଚି ଇନ୍କୁ ସାଅଁସାର୍ ହଡ଼କତାଃଏତେ ଜେତାନ୍ ଦେଙ୍ଗା କା ଇଦିକେଦ୍ତେ ୟୀଶୁ ଖ୍ରୀଷ୍ଟ୍ଆଃ ନୁତୁମ୍ତେ ସେୱା ନାଗେନ୍ତେକ ଅଡଙ୍ଗ୍କାନା ।
୮ ଏନା ନାଗେନ୍ତେ ଆବୁ ଖ୍ରୀଷ୍ଟିୟାନ୍କ ଇନ୍କୁକେ ଦେଙ୍ଗାକେଦ୍ତେ ସାନାର୍ତି ଉଦୁବ୍ ନାଙ୍ଗ୍ ଇନ୍କୁଆଃ କାମିରେ ମେସାନ୍ ଲାଗାତିଙ୍ଗ୍ୟାଁଃ ।
ଦିୟତ୍ରୀଫା ଆଡଃ ଦିମିତ୍ରୀୟ
୯ ଆଇଙ୍ଗ୍ ଆପେୟାଃ କାଲିସିୟାତେ ହୁଡିଙ୍ଗ୍ଲେକାଇଙ୍ଗ୍ ଅଲ୍କୁଲ୍କେଦା, ମେନ୍ଦ କାଲିସିୟାରାଃ ଆଗୁଆଇ ହବାଅଃ ନାଙ୍ଗ୍ ସାନାଙ୍ଗ୍ତାନ୍ ଦିୟତ୍ରୀଫା ଆଇଁୟାଃ କାଜିକେ କାଏ ଆୟୁମ୍କେଦା ।
୧୦ ଆଇଙ୍ଗ୍ ଏନ୍ତାଃତେ ହିଜୁଃରେ, ଇନିଃ କାମିକାଦ୍ ଏତ୍କାନ୍ କାମିକ ସବେନାଃଇଙ୍ଗ୍ ଉଦୁବେୟା । ଇନିଃ ଆବୁଆଃ ବିରୁଧ୍ରେ ଏତ୍କାନ୍ କାଜି କାଜିକେଦ୍ତେ ଆବୁକେ ହିଲାଙ୍ଗ୍ବୁ ତାନାଏ, ଏନ୍ରେୟ କାଏ ଥାବର୍ୟାନା । ଆଡଃ ଇନିଃ ଆଇଃକ୍ଗି ଖ୍ରୀଷ୍ଟିୟାନ୍ ହାଗାକକେ କାଏ ଦାରମ୍କ ତାନା ଚି ଜେତାଏକେ କାଏ ଦାରମ୍ଇଚିକ ତାନା । ଆଡଃ ଦାରମ୍ନାଙ୍ଗ୍ ସାନାଙ୍ଗ୍ତାନ୍କକେ କାଲିସିୟାଏତେ ଅଡଙ୍ଗ୍କତାନା ।
୧୧ ହେ ଦୁଲାଡ଼୍ ଗାତି, ଏତ୍କାନ୍ତେୟାଃକ ଆଲମ୍ ଅତଙ୍ଗ୍ଆଁଃ, ମେନ୍ଦ ବୁଗିନ୍ତେୟାଃକ ଅତଙ୍ଗ୍ୟେଁମେ । ଜେତାଏ ବୁଗିନ୍ କାମିନିଃ ପାର୍ମେଶ୍ୱାର୍ଆଃ ହଡ଼ ତାନିଃ, ଆଡଃ ଜେତାଏ ଏତ୍କାନ୍ତେୟାଃ କାମିନିଃ ପାର୍ମେଶ୍ୱାର୍କେ କାଏ ସାରିୟା ।
୧୨ ଦିମିତ୍ରୀୟଆଃ ବିଷାଏରେ ବୁଗିନ୍ କାଜିତାନ୍ ସବେନ୍କ ଆଡଃ ସାନାର୍ତିୟଗି ଇନିୟାଃ ବୁଗିନ୍ ବିଷାଏ କାଜିତାନା । ଆଲେୟଗି ଇନିୟାଃ ଗାୱାଲେ ଏମ୍ତାନା ଆଡଃ ଆପେ, ଆଲେୟାଃ ଗାୱା ସାର୍ତିଗିଆ ମେନ୍ତେପେ ସାରିତାନା ।
ଟୁଣ୍ଡୁ ଜହାର୍
୧୩ ଆଇଙ୍ଗ୍ ଆମ୍କେ ପୁରାଃ କାଜି କାଜିରାଃ ମେନାଃ, ମେନ୍ଦ ଏନ୍ ସବେନାଃ ସିହାଇ ଆଡଃ କାଲାମ୍ତେ ଅଲ୍ ନାଙ୍ଗ୍ କାଇଙ୍ଗ୍ ସାନାଙ୍ଗ୍ତାନା ।
୧୪ ଆଇଙ୍ଗ୍ ଆମାଃଲଃ ଜାଲ୍ଦିଗିଇଙ୍ଗ୍ ନେପେଲା ମେନ୍ତେଇଙ୍ଗ୍ ଆସ୍ରାକାଦା, ଇମ୍ତା ଆଲାଙ୍ଗ୍ ବାରାନ୍କିନ୍ ନେପେଲ୍ରେଲାଙ୍ଗ୍ ଜାଗାରେୟା ମେନ୍ତେଇଙ୍ଗ୍ ସାନାଙ୍ଗ୍ତାନା ।
୧୫ ଆମାଃ ଜୀଉସୁକୁ ହବାଃଅକା । ଆମାଃ ସବେନ୍ ଗାତିକ ଆମ୍କେ ଜହାର୍ ମେନ୍ତେକ କାଜିକୁଲ୍କାଦା । ଆଡଃ ଆଲେୟାଃ ଜହାର୍ ଆମାଃ ସବେନ୍ ଗାତିକଆଃ ନୁତୁମ୍ ସାବ୍କେଦ୍ତେ ଜହାର୍ ଉଦୁବାକମେ ।