130
Baṛī Musībat se Rihāī kī Duā (Taubā kā Chhaṭā Zabūr)
Ziyārat kā gīt.
Ai Rab, maiṅ tujhe gahrāiyoṅ se pukārtā hūṅ.
Ai Rab, merī āwāz sun! Kān lagā kar merī iltijāoṅ par dhyān de!
Ai Rab, agar tū hamāre gunāhoṅ kā hisāb kare to kaun qāym rahegā? Koī bhī nahīṅ!
Lekin tujh se muāfī hāsil hotī hai tāki terā ḳhauf mānā jāe.
 
Maiṅ Rab ke intazār meṅ hūṅ, merī jān shiddat se intazār kartī hai. Maiṅ us ke kalām se ummīd rakhtā hūṅ.
Pahredār jis shiddat se pau phaṭne ke intazār meṅ rahte haiṅ, merī jān us se bhī zyādā shiddat ke sāth, hāṅ zyādā shiddat ke sāth Rab kī muntazir rahtī hai.
 
Ai Isrāīl, Rab kī rāh deḳhtā rah! Kyoṅki Rab ke pās shafqat aur fidyā kā ṭhos band-o-bast hai.
Wuh Isrāīl ke tamām gunāhoṅ kā fidyā de kar use najāt degā.