6
Musībat meṅ Duā (Taubā kā Pahlā Zabūr)
1 Dāūd kā zabūr. Mausīqī ke rāhnumā ke lie. Tārdār sāzoṅ ke sāth gānā hai.
Ai Rab, ġhusse meṅ mujhe sazā na de, taish meṅ mujhe tambīh na kar.
2 Ai Rab, mujh par rahm kar, kyoṅki maiṅ niḍhāl hūṅ. Ai Rab, mujhe shifā de, kyoṅki mere āzā dahshatzadā haiṅ.
3 Merī jān nihāyat ḳhaufzadā hai. Ai Rab, tū kab tak der karegā?
4 Ai Rab, wāpas ā kar merī jān ko bachā. Apnī shafqat kī ḳhātir mujhe chhuṭkārā de.
5 Kyoṅki murdā tujhe yād nahīṅ kartā. Pātāl meṅ kaun terī satāish karegā?
6 Maiṅ karāhte karāhte thak gayā hūṅ. Pūrī rāt rone se bistar bhīg gayā hai, mere āṅsuoṅ se palang gal gayā hai.
7 Ġham ke māre merī āṅkheṅ sūj gaī haiṅ, mere muḳhālifoṅ ke hamloṅ se wuh zāe hotī jā rahī haiṅ.
8 Ai badkāro, mujh se dūr ho jāo, kyoṅki Rab ne merī āh-o-bukā sunī hai.
9 Rab ne merī iltijāoṅ ko sun liyā hai, merī duā Rab ko qabūl hai.
10 Mere tamām dushmanoṅ kī ruswāī ho jāegī, aur wuh saḳht ghabrā jāeṅge. Wuh muṛ kar achānak hī sharmindā ho jāeṅge.