18
Got ŋende yumbune moi embere Babilon
1 Miꞌe pe, ŋam metekeꞌe walip hlaꞌ ŋoinde nase moihlaꞌ nate gah kekep. Kin bongol supule. Pe yirise embere kin naŋarꞌe nalꞌe nalꞌe kekep lalme.
2 Kin tambah mah ŋanange na, “Ŋoihginirme moi embere Babilon ŋaiye ti si tambe miꞌe ko! Ti si tambe miꞌe ko! Tukwini lenge yipihinge pupwa, topoꞌe ŋinjet pupwa yarp ya yoto moi uku.
3 Lenge miyeꞌ tuweinge moiye moiye lalme, topoꞌe lenge kiŋ kekep si yende niŋ pinip yar yotop ti. Ki taꞌe ŋaiye tinge yonoꞌe wain pupwa ŋaiye niŋ pinip yar. Topoꞌe lenge miyeꞌ, ŋaiye yende windau me ŋaiꞌe ŋaiꞌe si tahar miyeꞌ lowe. Detale, lenge miyeꞌ tuweinge moi wula wula yiche wuhyau embere yalme tinge yambaꞌe ŋaiꞌe ŋaiꞌe wula wula.”
4 Miꞌe pe, ŋam masande diꞌ ende nase moihlaꞌ nat ŋanange taꞌe leꞌe, “Yute tus yusme moi iki, lenge miyeꞌ tuweinge ŋam! Yute tus yupwaihme ti no, pa yenge wahriꞌ yip tupwaihme pupwa ti. Detale, prepwan, ŋaiye pa yotop ti yambaꞌe nihe syohe.
5 Pupwa ti ki dini dini nanah hlaꞌ na tatame moihlaꞌ pe, Got ŋoiheryembe ŋaiꞌe ŋaiꞌe pupwa, ŋaiye ti wende.
6 Yip pa yende ŋaiꞌe ŋaiꞌe pupwa yilme tuwei uku ŋahilyeh tuwaꞌe, ŋaiye ti wende me lenge mitiŋ syeꞌ. Topoꞌe yende ŋaiꞌe ŋaiꞌe pupwa wula wula tataꞌ tataꞌ yi yunuh hlaꞌ me ti. Yuruꞌe pinip wain embere yi yunuh hlaꞌ me ti yi juh yukoh ti no, ka bongol wondohe sekete ŋahilyeh tuꞌe ŋaiye ti si wende me lenge mitiŋ syeꞌ, ŋaiye tinge si yonoꞌe. Pe yende miꞌmiꞌ me pinip wain pupwa luku yinir me ti, ŋaiye ta wonoꞌe.
7 Yaŋaꞌe nihe syohe embere embere, ŋaiye ka tungwisme wusyep pupwa tititi nange ti lahmborenge bongol sekete, topoꞌe ti tatame ŋaiꞌe ŋaiꞌe wula wula sekete. Ti wanange titi na, ‘Ŋam marp taꞌe tuwei ondoh eꞌe. Ŋam miyeꞌ pakai, ŋaiye ka ole no, ma milil me kin.’
8 Taꞌe luku pe, nilyehe sai ŋaiye ŋup ende Got ka ende yumbune ti topoꞌe nihe syohe embere embere, ŋaiye ka ot me ti. Wahriꞌ epwa topoꞌe ŋasarp embere ka otme ti. Pe ti ta wilil embere sekete. Nih ka ono ti hyelhyul guh. Detale, Got miyeꞌ ŋaiye bongol supule, ka iyarꞌe ŋaimune ti ŋaiye wende pe, ka aŋaꞌe nihe syohe luku.
9 Lenge kiŋ kekep, ŋaiye yotop ti yende niŋ pinip yar, topoꞌe ŋoihmbwaip, ŋaiye yende nihararme ŋaiꞌe ŋaiꞌe ti pe, tinge ka yilil me moi embere luku ŋupe ŋaiye ka yetekeꞌe nihnom tikin nih, ŋaiye ka ono ti.
10 Tinge ka jin yil wohe sekete, detale, tinge ka hiꞌjirnge, ŋaiye se ka yambaꞌe nihe syohe ti. Tinge ka yininge na,
‘Ŋoihginir, ŋoihginir moi embere Babilon eꞌe!
Nilyehe sai yitini pupwa ŋaiye hwap nin si natme nin.’
11 Lenge miyeꞌ, ŋaiye yende windau me ŋaiꞌe ŋaiꞌe yarp kekep lalme pe, tinge ka yilil, topoꞌe ŋoihmanme ti. Detale, lenge mitiŋ Babilon pakai, ŋaiye ka plihe yiche wuhyau yambaꞌe ŋaiꞌe ŋaiꞌe tinge.
12 Miyeꞌ ende Babilon yukur ka plihe ambaꞌe gol, silwa, topoꞌe ŋeser ŋaiye tikin miꞌ supule, topoꞌe salpan bwore. Topoꞌe ŋaiyuwat bwore ŋaiye yaihe, lakai silk, topoꞌe ŋaiꞌe ŋaiꞌe ŋaiye tinge yenge lou yende, topoꞌe lou, ŋaiye naihe miꞌ supule. Topoꞌe ŋaiꞌe ŋaiꞌe, ŋaiye tinge yenge elefan buwelh yende, topoꞌe ŋaiꞌe ŋaiꞌe, ŋaiye tinge yenge bras, topoꞌe ain yende, topoꞌe ŋeser bwore.
13 Yukur ka plihe yende windau me lou lalme, ŋaiye nihnom lakai lou imbirꞌ kin misip naihe sengehrepe, topoꞌe tihir, topoꞌe pinip wain, topoꞌe pinip winyeꞌ olip, topoꞌe kakah ŋuhruwet, topoꞌe kakah wit. Topoꞌe kau, sipsip, hos, topoꞌe karis, topoꞌe lenge miyeꞌ ŋaiye ka yende lenge wah pakaiye.
14 Lenge miyeꞌ ŋaiye yende windau me ŋaiꞌe ŋaiꞌe
yanange wusyep eꞌe yalme ti na,
‘Ŋaiꞌe ŋaiꞌe bwore bwore lalme, ŋaiye ni ŋoiheryembe
nange na enge pe, si talai miꞌe ko.
Wuhyau embere embere nin,
topoꞌe hihyilih bwore bwore si talai nal pe,
yukur na si plihe etekeꞌe!’
15 Lenge miyeꞌ ŋaiye yende windau me ŋaiꞌe ŋaiꞌe, topoꞌe yambaꞌe wuhyau wula wula yanar yoto moi uku pe, tinge hiꞌjarnge ŋaiye se ka yetekeꞌe ti, ta wambaꞌe nihe syohe. Pe tinge ka jin wohe. Tinge hiꞌjarnge ŋaiye yikirh mane ti. Pe ka yilil jonos jonos na,
16 ‘Ŋoihginirme! Ŋoihginirme! Moi embere, nin miꞌe nal ko.
Nye nyermbe nin dendeꞌ hihyilih yaihe,
topoꞌe nin nenge gol ŋendendeꞌme nitei,
topoꞌe ŋeser, topoꞌe salpan, ŋaiye tikin miꞌ supule.
17 Nilyehe sai ti wangalaime ŋaiꞌe ŋaiꞌe bwore bwore ti!’
Lenge yai tehei ŋaiye loumbil pinip, topoꞌe lenge miyeꞌ embep, ŋaiye yenenem loumbil pinip yotop lenge miyeꞌ wah tikin loumbil pinip, topoꞌe lenge mitiŋ, ŋaiye yarp loumbil pinip, topoꞌe lenge lahmende ŋaiye yende windau me ŋaiꞌe ŋaiꞌe yarp loh pinip pe, tinge topoꞌe jan wohe supule pe,
18 tinge yilil ŋupe ŋaiye tinge yetekeꞌe nihnom tikin nih, ŋaiye ŋono ti. Pe tinge yanange na, ‘Yukur na plihe tekeꞌe moi embere ende ŋahilyeh taꞌe moi embere luku, pakai!’
19 Tinge tangarh yihimbiliꞌ pe, tinge yilil jonos jonos na,
Ŋoihginirme, ŋoihginirme moi embere luku!
Ti moi embere, ŋaiye lenge loumbil pinip moiye moiye yat pe,
yai tehei loumbil pinip nambaꞌe wuhyau embere,
ŋaiye Babilon wiche wuhyau wambaꞌe ŋaiꞌe ŋaiꞌe bwore bwore tinge.
Kom nilyehe sai, ti si wangalaime ŋaiꞌe ŋaiꞌe lalme luku miꞌe ko.
20 Yip lenge lahmende, ŋaiye yarp ya yanah moihlaꞌ pe, pa hriphrip. Detale, Got si ŋende yumbune moi Babilon. Lenge miyeꞌ tuweinge tikin Got, topoꞌe lenge aposel tikin Jisas, topoꞌe lenge profet, yip pa hriphrip me Got, ŋaiye ŋende yumbune moi Babilon me ŋaimune pupwa ŋaiye ti wende me yip.”
21 Miꞌe pe, walip hlaꞌ bongol ende ŋahraꞌe ŋeser, ŋaiye tikin ŋembere supule ŋiche na gah loh pinip pe, ki ŋanange na,
Yaŋah eꞌe ki ŋahilyeh taꞌe mindemboi,
ŋaiye ka iche moi embere Babilon e guh no,
yukur ya plihe metekeꞌe.
22 Babilon, yukur ya plihe musyunde wenersep bwore ka tus moi uku.
Wenersep ŋaiye diꞌ loutumbwah lakai,
diꞌ miyeꞌ ŋaiye ŋosoko wenersep,
topoꞌe diꞌ miyeꞌ ŋunduhulꞌe tumbuh, topoꞌe diꞌ ŋoih.
Lenge miyeꞌ tuweinge, ŋaiye yende ŋaiꞌe ŋaiꞌe tetehei bwore bwore
si lal yal miꞌe ko.
Yukur ka plihe yusyunde diꞌ, ŋaiye yisyerꞌe kakah wit, pakai supule.
23 Yukur lenge miyeꞌ tuweinge ka plihe yetekeꞌe nih lam ende
ka riri aŋarꞌe si moi uku.
Topoꞌe yukur ka plihe yusyunde diꞌ wusyep
lenge miyeꞌ topoꞌe tuweinge yala dindiꞌ.
Somohon lenge miyeꞌ, ŋaiye yende windau me ŋaiꞌe ŋaiꞌe ti,
tinge bongol sekete, ŋaiye bepyeteme kekep lalme,
topoꞌe wah molohe ti, ŋaiye wende ŋimbim yar pe,
tinge homboꞌe yehme lenge miyeꞌ tuweinge lalme moiye moiye.
24 Got ŋende yumbune Babilon,
ŋaiye ti wende pupwa wongomb lenge profet,
ŋaiye yanange yalaŋatme wusyep Got.
Topoꞌe Babilon wende pupwa, ŋaiye wongomb
lenge miyeꞌ tuweinge holi wbore mise supule tikin Got
nalꞌe nalꞌe kekep lalme.