3
Ëna Sardisk de Kristen zi hip de surat:
1 Yesus ki zep asa gubluka, “Ola ansa emki ale gul sonen:
Sardisk de jematsa de kara gul gwen hap de Alap mo dam taha nakore zi hip,
Yesus onakon:
Ëe an Alap mo Enho nabare Zini Zen– men zen tuju nwe-masekam zinik syal gwe-gwendake,
hen Ëe an tujukam de keis nibare Zini.
Ëe tawana insa em syal ei gwibiꞌin. Zini man emsa kïl dï gwibiꞌin, ‘Zen ngayana,’ hwëna em in tok-tokna.
2 Zen in zep, em ni truwen nakon luk tan, hen eno mae mo syala in zen tïnsïn hïp alp gwesïꞌïn, emki etan bubung gun. Sap Ëe tawana: Em insa syal ei gwibiꞌin, aha-en mae home su kul soneꞌan– ano Bian mo nwenakye.
3 In zep emki enlala gwe-gwibin– men desa orep emsa tawa da gwibikke, hen men desae ësane gwe-gwekke. Zen kirekam em etan syal tan, deban ëhalek. Sap em de salok-salokkam lowehe gwen srëmkam, Ëe ebon mae onak sowë zi mo kim asa hatazal. Ki em molye hamal hap anakan ëtawa gwe guk, ‘Yaklana dekam sa hata zala.’
4 Hwëna eno mae mo ngïrïnnïk nama hen– salok-salokkam de lowehe gwen wenyaye, men zëno mae mo pakean ëjok-jok gwe srëm gweꞌan. Ëe asa desa pakean ngap-ngap alala tan naban golëlowehe gwer, sap zen mes kirenak dep ëdakastïk.
5 Men zen de tatem ëzauꞌuk, zëbe mae hap pakean ngap-ngapsa asa alala tazim. Hen zëno mae mo bosem-sena Ëe molyë hëndep de ëngaya gwen hap de wenyik mo bosemse nabare buku nakon ngan gulsuzimk. Bian hon hen zëre mo dam taha nakore wenyak Ëe asa anakan kira tabir, ‘An zen– ano bi gwibiridan wenyaye.’
6 Em dwan i nibanke!
Zep mensa Alap mo Enhona ebe mae hap ayang gulzimꞌira, zen desa em ësal gwen.”
Ëna Piladelpiak de Kristen zi hip de surat:
7 Yesus ki zep asa gubluka, “Ola ansa emki ale gul sonen:
Piladelpiak de jematsa de kara gul gwen hap de Alap mo dam taha nakore zi hip,
Yesus onakon:
Ëe an lalak enna hen taïblïblan tanganna.
Teipsïn zini Daud Bak mo kunci bi gweblanna Ëyë zirensïꞌïn.
Ëyë dekam lïlïkïnsï talusuꞌuk,
nara zi molya etan gulhlu inki.
Hen Ëyë gulhlu inꞌik,
nara molya talusuku.
8 Ëe tawana insa em syal ei gwibiꞌin. Hen Ëe tawana: Em tatete tangan naka hom. Hwëna em mese ano tawa tabin sin ang ta gwek, hen home ano bosena anakan azabe gwibik, ‘Ëe Zëbon de ang ta gwen zisi hom.’ In zep ebe mae hap mesë lïlïkïnnï talusuzimk. Desa toton nara dep?– etan gulhlu irin niye.
9 An kirekam sa ebe mae hap lwazim: Zini men zen emsa hit di gwibirin, Ëe asa desa tik-tik tabir– ebon mae onak de yaïng gwezan hap. Zen dekam sa bokle kom son nakon anakan ëkira gwer, ‘Eiwa, Alap man emsa kwasang gwibirida gwenda.’ Zen man zënaka tim di gwibirin, ‘Ëe an Yahudi zi tangan,’ hwëna zen dowal mo kïgï mo walas.
10 Sap em mese ano ol hli yulzimdin sin ang ta gwek– dekam de kareksa de goltowen nakon asa zabeblan srëm hap denaye. Zep Ëna hen asa emsa golëzauk soner– karek yawala in kim de tïngare okamanak hataꞌakye. In tïngare auhu-kama zisi dikim akasibiridan hap sa ki lwal.
11 Ëe nabakam asa hatazal. Men desa ki ulin gwek, dawem enkam olinik gwek. Aha zi mana hwëna ebe mae hap de mire sigisa kap da innink.
12 Men zen de tatem ëzauꞌuk, Ëe asa desa Alap mo gol ësenak gol te makan eiyas gïl. Zen zao sa hëndep denaban lowehe gwer. Hen Ëe asa ëre mo bose ësesa zëno mae mo timnik ale tabir-zim, hen ëre mo Bian Alap mo bosesa, hen Alap mo ë bosesa. Zen in zen– Yerusalem ëse, men zen sa ngatan zi mo lang nakon ati gwe zala, Alap zëre onakon.
13 Em dwan i nibanke!
Zep mensa Alap mo Enhona ebe mae hap ayang gulzimꞌira, zen desa em ësal gwen.”
Laodikiak de Kristen zi hip de surat:
14 Yesus ki zep asa gubluka, “Ola ansa emki ale gul sonen:
Laodikiak de jematsa de kara gul gwen hap de Alap mo dam taha nakore zi hip,
Yesus onakon:
Ano aha bosena ‘Eiwa de Zi.’
Ëe an Zen– eiwakam hen tatetekam de Alap hap denaka golluwe gwen hap de Zi niye.
Ëe an Zen– kïtak ausuna, Alap mo yang tabin nikon.
15-16 Ëe tawana em in desa syal ei gwibiꞌin. Zen in zebë emsa ulop gwibiridaꞌan– san de tembane kareksa de ulop gwibin makanye. Sap em asa de kwasang gweblanna mese ëblalen gwek, hwëna home tangan asa baes ëblaꞌan. Zep em an men kiye– tembanena sal-salaka hom hen bot-bot naka hom. Zen in zep Ëe asa emsa kïtak wëk gwibiridal.
17 Em ema ëkïl gïl gwenan, ‘Ëe an kire-kire beyana. Basa dep?– tahalha gwibinni.’ Hwëna em home ere mae mo enhona tame laꞌan. Em in enho nakon tahalha tangan nike lowehe gweꞌan– kwasap walas mo kim. Em in irkane lowe heꞌan hen nwe dïmïnnï.
18 Zen in zebë emsa tïtï tabiꞌin: Em Abon onak te-alakam hëndep de emas lalaksa kablak– dekam de ano nwenak ëtahalha gwen srëm hapye. Emki hen Abon onak pakean ngap-ngapsa kap laink– desa de alala tan hap, sap angkam em irkane sahera ban lowe heꞌan. Hen nwe hap de obatsa emki Abon onak kap ta irin– ekakim nwesa ëkara gwek.
19 Zini mensaë kwasang gwibirida gwenan, zen desaë jalse gwibirida gwenan hen lek-lek ta gwibirin– dekam de zen dawemkam ëhalen hap. Zen in zep, em tïngare enho naban ëhalen.
20 Ëe bira! Ëe eno mae mo enhonak de lïlïkïnnïkë zauk gweꞌanzal, hen ama gaꞌga so gwenan. Men zen de ano ola saꞌanka, hen lïlïkïnnï insa ap talusubluꞌanka, zëbon asa tïl, hen zini in han asa zergwë gwer. Hen Ëe deban asa ënaka itwen gwer.
21 Men zen de tatem ëzauꞌuk, Ëe asa desa gubiridal– ëre mo nikin gwennak de ëre mae han teipsïnkïm teinikirin hip, dekam de apdekam ïrïk gïn hïp. Aena hen tatemë zauk gwek. Zen in zebë angkam ëre mo Bian naban apdekam teipsïnkïm inikin gweꞌan.
22 Em dwan i nibanke!
Zep mensa Alap mo Enhona ebe mae hap ayang gulzimꞌira, zen desa em ësal gwen.”