18
Non Soke Lohot Nge Apraham
1 Apraham tu rochroi la nga ae papalau nge Mamre pe Non Soke lohot nge i. Iok kileng chaia matana milang toto lo pe Apraham kilkila nga nena pelpele matana
2 pe teke nau haka pe esia hana mol nge te mes. Esia iri pe song hot nga nena pelpele matana ke lange iri pe tualou sio pe tuatuch sio la nga ich.
3 Pe hele, “Hana, iau Non Soke nena non pe lemek ero nge a i toto mana nga lek pelpele ke ala. Lemek ke e teke a iat nga lek pelpele.
4 A i at pe te mene ech ke te lomo sue apemo pe a kila lakoi nga ae nei ene.
5 Pe e la ke e mene ngaunga unne ke a ngau ke kikimo mukam. Ol laka ai mule ia lemo inga ke ala ol. Iange imo a lohot nge iau lo ke pomalam e teke e halaua imo.” Pe hana neu tuacholia ke te teke, “Urana toto, o poia ke pomanga o hele ngam.”
6 Iok laol Apraham teu la nga nena pelpele ke ueiuei mana pe hele lange Sara ke teke, “O ueiuei! O mene mioka nenge urana toto pe o tune.”
7 Ke het pe song ke la nga pulumakau mur pe mene lau heke asis ngana e nge lum toto pe tunge lange nena hekuleileinga e ke tune.
8 Ke het pe Apraham mene pulumakau mirana nenge kalum pe siuna eina pe mesmes pe talue nga hatanga nga hana nemur mataria. Hana nemur te ngaungau pe Apraham mes rochroi lange iri nga ae e pule ene.
9 Ol pe te onteia i ke te teke, “Lem hei Sara ngai?”
Pe Apraham hele ke teke, “I kou nga pelpele letena.”
10 Ol pe elle nge iri nenge hul rumena la nga pelpele, hele ke teke, “Nga hesinga nenge atat neu pe nga teio nei lape e at mule nge iong pe Sara lape hoe tuna tamane ngana e.”
Pe Sara mes teu nga piunga nga pelpele pe longe helenga neu.
11 Apraham iri nai Sara te tuauna toto lo pe Sara hile ana etue mur nga hohonga ke het lo.
12 Ol pe Sara melmel pe helele nge isipona ke teke, “Iau e tuauna toto pe ak non soke tuauna toto pule. Pe lape singik iech nge e ma luluch mule i kura kai?”
13 Ol pe Non Soke hele lange Apraham ke teke, “Pomerei nenge Sara melmel pe hele ke teke, ‘Iau e tuauna toto lo i pe lape e hoe tuk e ke manmanna kai?’
14 Apraham e hele lange iong. Non Soke nakuna nge poia ure lochloch. Iau lape e at mule nge iong nga teio nei nga hesinga nenge atat nem pe Sara lape hoe tuna tamane ngana e lo.”
15 Ol pe Sara matau pe channanga pe hele ke teke, “E melmel ero i.”
Pe non neu hele ke teke, “O melmel laka.”
Apraham Hele Ala Kileng Sotom Ana
16 Iok hana nemur te lohaka ke te i pe ramaria lange Sotom pe Apraham koko ke puotaua iri.
17 Pe Non Soke letena tuanin nge isipona ke teke, “Urana nge e hele hote utar nenge e teke e popoia lange Apraham.
18 I na tete mur lape te lohot ke iri halang pe iri tuele kina kerkereng ngana mur. Pe nge i mana, lape E poi ke urana lange tuele kina mur lochloch ngana nga ich.
19 Iange Iau Non Soke pe e hesilei hote i ke almasia tutuna mur pe nena tete mur nenge te lohot nge he, ke te nanasia lek helenga pe te poia poinga nge pengpeng pe urana. Pomalam lape E poia ure lochloch ngana ke lohot nge i ke pomanga lek tomunga hel ana helenga nenge E poia lange i.”
20 Ol pe Non Soke hele, “Helenga halang lohot nga poinga poreke ngana nenge te poreke toto nge te lohotot nge Sotom pe Komora,
21 pe e teke E etei ke nek. Pomalam lape E sio la ke enau nga poinga nenge te popoia, lape poreke toto ke pomanga E longo ngak ma ero?”
22 Iok, hana nai neu te i ke ramaria sio lange Sotom pe Apraham mes pe NeHalang mes nga matana.
23 Pe Apraham i lange I pe hele, “Hana urana ngana hel tetu nga kileng neu pule pe lape o heporeke iri luluch nge hana porekreke ngana mur?
24 Nenge teke hana urana ngana mur iri ana non kina nai pe analoch (50) tetu nga tuele tana neu, lape o heporeke iri ke te lasus lochloch? Ma lape letemia iri pe o heporeke tuele tana neu ero?
25 Poinga nenge o teke o poia lange hana poreke ngana mur ke o hune iri, o poia lange hana urana ngana mur ero. Nem nakuna urana ero. Milteunga nenge lala nge hehei pe hana nga ich lochloch song ke nanasia poinga nge pengpeng.”
26 Ol pe Non Soke hele ke teke, “Nenge teke e naue ke hana urana ngana mur iri ana non kina nai pe analoch (50) tetu nge Sotom, lape e heporeke kileng neu ero.”
27 Ol pe Apraham hele mule ke teke, “Non Soke iau e pomalaka nga maruchrue pe apou. E ontei sakilil mana koi pe letem inin taua iau ero.
28 Nenge teke hana urana ngana mur aria sisalanga hele sio ke lime iri ero, lape o heporeke kileng neu pule?”
Pe Non Soke hele ke teke, “Nenge teke e naue ke hana urana ngana mur iri ana non kina nai pe lime mana, lape e heporeke kileng nem ero pule.”
29 Pe Apraham ontei mule I ke teke, “Pe nenge teke o hottau ke hana iri ana non kina nai te urana, lape o heporeke kileng neu pule?”
Pe Non Soke hele, “Lape letek ia iri ke e heporeke kileng neu ero.”
30 Pe Apraham hele, “Non Soke letem inin taua iau ero pe e ontei mule. Pe nenge teke hana iri ana non kina elle pe analoch mana nge te urana lape pomerei?”
Pe Non Soke hele, “Nenge teke e hottau ke hana iri ana non kina elle pe analoch mana nge te urana, lape e heporeke kileng nem ero pule.”
31 Pe Apraham hele, “Non Soke e ontei sakilil pe letem inin taua iau ero. Nenge teke hana nenge te urana iri ana non kina elle mana tetu lamau?”
Pe Non Soke hele, “Lape letekia iri ke e heporeke kileng neu ero.”
32 Pe Apraham hele, “Non Soke letem inin taua iau ero pe e ontei elle mule. Nenge teke hana nenge urana iri analoch mana tetu lamau?”
Pe Non Soke tuacholia, “Lape letek ia iri pe e heporeke kileng neu ero pule.”
33 Iok Non Soke hele luluch nge Apraham ke het pe hile i pe la sapele. Pe Apraham la mule nga nena kileng.