21
Sara Hoe Isak
1 Non Soke poi ke urana lange Sara ke pomanga nena helenga kerkereng ngana nenge poia ke ulolo.
2 Ke Sara sana pe hoe tuna tamane ngana e nge Apraham nga etue nenge Apraham tuauna toto lo. Pe pule nga etue nenge NeHalang hele talue lange Apraham.
3 Pe Apraham hetue tuna nenge Sara hoe ke ene Isak.
4 Pe nga etue nenge Isak ana etue iri rahtele mol Apraham rir ia singina ke pomanga NeHalang hele ngana ia lange i.
5 Apraham ana hesinga iri ana non kina lime (100) nga etue nenge Sara hoe tuna tamane ngana neu nge i.
6 Pe Sara hele, “NeHalang poi ke urana at nge iau ke e iech pe e melmel pe iri lochloch ngana nenge te longe iau nge e poi ke pomai lape te iech pe te melmel pule.”
7 Pe Sara hele pule ke teke, “Itei toto nenge lape hele lange Apraham ke teke, lem hei Sara lape hoe tuna pe nakuna nge hesiua kau? Pe ero, Apraham tuauna lo pe e hoe tuna tamane e.”
Heka Pe Ismael
8 Pe kol sune neu i soke pe hile siu, pe nga etue nenge hile siu Apraham poia ana ngaunga matana palaungana.
9 Pe Heka nenge nena nge Ekipto hoe tuna tamane ngana e nge Apraham. Pe nga etuene e, Sara naue Heka tuna Ismael nge hesalang lululuch nge Isak.
10 Ol pe hele lange Apraham ke teke, “O kulosia lek hekuleileinga ana hei nei pe tuna pele pa neu ke te la toto nga kileng unne. Iange lemek ero nge hei nem tuna mene lem ute e. Tuk Isak i toro mana lape mene lem ure lochloch.”
11 Pe Apraham letena meena toto iange letena ia tuna Ismael.
12 Pe NeHalang hele lange i ke teke, “Letem meena sakililia kol nem pe lem hekuleileinga ana hei nem ero; o longo la mana nga utar nenge Sara heleia lange iong. Iange lem tete mur lape te lohot laka nge Isak.
13 Pe hekuleileinga ana hei nem tuna, lape e poia na tete mur ke te lohot ke iri halang pule iange iong tum ia.”
14 Iok nga uach uruna toto Apraham memete pe mene ngaunga pe ech kina nenge te ume hote nga huros ulina pe tunge lange Heka. Pe tal heke nga hei neu palpanna pe kulosia iri nai tuna ke te la. Te i ke tela pe te i rara pulut mana nga ich sana lomona nge Pesepa.
15 Nga etue nenge aria ech soso nga kina talsio mene tuna nga ae sune ene ol,
16 pe i la ke are kangkanga toto nge tuna iange letena ke teke, “Lemek ero toto nge e esia tuk nge mete nga matak.” Ke ana hei are pe tangtang ol.
17 Pe NeHalang longe kol neu nge tangtang pe nena angkelo tu nga tapa pe iu lange Heka ke teke, “Heka, pomerei? O matau ero; kol neu ma lamau ke tangtang pe NeHalang longe ke ulolo.
18 O in heke kol nem pe o rahite i nga penna iange lape e poia i ke na tete mur iri halang toto.”
19 Ol pe NeHalang ulele hei neu matana pe naue ech matana e nge te selia. Pomalam la ke hemuta mule ech kina neu pe tunge lange Ismael ke in.
20 Nga etue nenge kol neu puo ke hakaka NeHalang nau elele i. Pe ana non tutu nga ich sana lomona pe etei toto nga io tua ngana.
21 Nga etue nenge tetu nga ich sana lomona nge Paran, tana mene nehei e nge Ekipto.
Apraham Pe Apimelek Te Poia Tomunga Hel Ana Helenga
22 Iok ne Pikol i non nenge nauelele Apimelek nena palinga hel ana hana mur. Pe nga etue neu iri nai te hele lange Apraham ke te teke, “NeHalang tu luluch nge iong nga ure lochloch ngana nenge o popoia.
23 Iok o hele ke manmanna toto at nge iau nga NeHalang matana ke o pallaka mule iau ero ol pe o pallaka ia tutuk mur pe lek tete mur ero pule. Iau e poia poinga urana ngana lange iong. Ke pomalam o poi ke urana at nge iau pe o poi ke urana langa kileng nenge iong non lomona ngana pe heueu nei o iat ke o are ia.”
24 Pe Apraham hele, “Oe E hele ke manmanna toto.”
25 Pe Apraham toto hita mule lange Apimelek nga nena ech matana e nge nena hana mur te mene mule.
26 Pe Apimelek hele ke teke, “E eteia mele nenge poia poinga nem ero. Heueu mana nei i e longe ol iange iong o hele toto at nge iau ero nike.”
27 Iok la ol Apraham mene sipsip mur hel pe pulumakau hel ke tunge lange Apimelek pe iri nai te poia tomunga hel ana helenga neu.
28 Pe Apraham mene hote sipsip heheina iri rahtele nai nga nena sipsip mur ke talue iri ke altoto,
29 pe Apimelek onteia Apraham ke teke, “Iong o mene ke sipsip heheina iri rahtele nai pe o tal hote iri ke altoto. Nei luna ma ke merei?”
30 Pe Apraham tuacholia ke teke, “O longala ke o mene sipsip rahtele nai nei nge iau pe o hele hote ke iau koi nenge e selia ech matana nei.”
31 Ke pomalam te hetue kileng neu ke ene Pesepa iange hana nai neu te poia reria tomunga hel ana helenga lamau.
32 Iok te poia tomunga hel ana helenga nge Pesepa ke het pe Apimelek iri nai Pikol te la mule nga ich nenge Palestaen mur. Ne Pikol i non nenge nauelele Apimelek nena palinga hel ana hana mur.
33 Pe Apraham tue ae tamaris nge Pesepa pe heto heke Non Soke NeHalang Nenge Tu Ke Koko ene nga lamau.
34 Pe Apraham tu nga ich nenge Palestaen mur ke mala toto.