25
Apraham Mete Ngana
1 Sara mete ke het pe Apraham lei haka mule heie nge ene Ketura.
2 Pe Ketura hoe Simran pe Ioksan pe Metan pe Mitian pe Ispak pe Sua nge Apraham.
3 Pe Ioksan tuna laka Sepa iri nai Tetan. Pe Tetan nena tete mur laka Ashur mur pe Letus mur pe Leum mur.
4 Pe Mitian tutuna mur laka Epa pe Eper pe Hanok pe Apita pe Elta. Iri nemur Ketura na tete mur ia iri.
5 Nga hoena Apraham lape mete pe Isak lape mene nena urelu mur lochloch.
6 Pe nga etue nenge Apraham tu ke maulul kura, tunge tutuna nemur nenge nehei neingana neu reria tunginga mur, pe kulosia iri ke tetu kangkanga nge Isak nga ich nenga chaia haka ngana.
7 Pe Apraham tu nga ich ke ana hesinga iri ana non kina iri rahtele mol pe analoch pe lime (175).
8 Pe tuauna toto ol iange tu nga ich ke hesinginga halang toto pe tah heule eingana pe mete sapele. Mete pe te alohite i luluch nge alona mur nenge te mete tala nge i.
9 Pe tuna Isak pe Ismael te alohite i nga polo e nge Makpela. Ana kileng tu rochroi nge Mamre nga ich nenge Epron. Epron i ne Soha tuna pe reette ne Hitae.
10 Ich neu Apraham olia lange Hitae mur. Pe te alohite Arapraham luluch nge nehei Sara nga ich nem.
11 Apraham mete ke la pe Isak la mule ke la tu rochroi nga ech matana nenge Pia Lahai Roi pe NeHalang poi ke urana toto lange i.
Ismael Tutuna Mur
12 Ismael tutuna mur pe na tete mur te hot lohot ke mai koi. Ismael temene laka Apraham pe tana laka Heka nenge nena nge Ekipto. Heka i Sara nena hekuleileinga ana hei ia.
13 Ismael tutuna mur eria koi nemur pe ma ke nanasia teha ngaria: Nepaiot i Ismael tuna tengene ana ke het pe Ketar ke het pe Atpil ke het pe Mipsam ke het pe
14 Misma ke het pe Tuma ke het pe Massa ke het pe
15 Hatat ke het pe Tema ke het pe Ietur ke het pe Napis ke het pe Ketema.
16 Ke Ismael tutuna mur nenge eria nei, iri mukmuka nga reria kaleu ramana mur nenge iri analoch pe nai (12). Pe te tunge eria mur ke nanasia reria kileng mur pe te kila ngaria mur.
17 Ismael tu nga ich ke ana hesinga iri ana non kina iri rahtele elle pe analoch pe rahtele nai (137) pe eingana tah heulo pe mete sapele. Mete pe te alohite i la luluch nge alona mur nenge te mete tala nge lo.
18 Pe nena tete mur te kila nga kileng ana manga ala nenge song nge Hauila ke lange Sur. Ana kileng tu rochroi lange Ekipto nga kue nenge song ke lange Asiria. Pe te kila ke nek ero iange te palhel ke kokoes mana.
Iakop Pe Esau
19 Isak nenge Apraham tuna, na tete mur te lohot ke mai koi.
Isak temene laka Apraham,
20 pe Isak ana hesinga iri ana non kina nai lo (40) pe leia Rebeka nenge tina Lapan pe temeria ne Petuel. Pe iri reria nge Aram nge Patan Aram. Ana kileng tu nga hele nga lut nge Mesapotamia.
21 Isak nehei hoho ero pomalam Isak hetalaulau lange Non Soke ke halaua i. Pe Non Soke longe Isak nena hetalaulaunga pe nehei sana sapele.
22 Pe mamau nai te sechsech rara nga taria letena. Pe taria hele, “Pomerei nenge ure nei lohot nge iau ke pomai mai?” Pomalam ana hei la ke hetalaulau lange Non Soke.
23 Pe Non Soke hele lange hei neu ke teke,
“Hehei pe hana nga tuele tana nai, reria tete mur laka tetu nga letem.
Tutum mur nai nenga letem nem, lape te chach hel nga etue nenge iri papalaungana;
Elle lape kerkereng toto nge e,
pe nenge soke lape ume mule nge nenge kino.”
24 Iok, nga etue nenge Repeka hoho, manmanna ke hoe mamau tatamanna nge iri nai.
25 Nenge lohot tala singina remenmen pe pulpunna ronge singina lochloch. Ke pomalam te hetue i ke ene Esau.
26 Pe nenge lohot nanas rahite tina Esau apena ke pomalam te hetue i ke ene Iakop. Isak ana hesinga iri ana non kina mol lo (60) nga etue nenge Repeka hoe tuturia nemur.
27 Iok aina nai neu iri papalauna lo pe Esau lohot ke i non nenge rururum pe hunun huros. Pe Iakop i non nenge reng manmana pe tu manmana nga pele.
28 Pe Isak mutena taua Esau iange ngaungau huros nge i pe Repeka mutena taua Iakop.
29 Nga eteue e Iakop tuntun ngaunga luluch nga eina. Pe Esau rurum ke lohot pe makuk leilei iange mete ana toto.
30 Pe hele lange Iakop ke teke, “Ueiuei, o tunge ngaunga remenmen ngana unne at ke e ngaua! E makuk toto lo i.” Ke ngana laka nenge te hetue i ke ene Etom.
31 Pe Iakop tuacholia ke teke, “Iong teepe iange te are heke iong nga palngen. Pe e teke e mene mulim ke iau teepe, laka e tung am ngaunga ol.”
32 Pe Esau hele, “Hei! O nau at e metmete loi. Teepe nem mam lape tunge utar nge urana at nge iau?”
33 Pe Iakop hele, “O hele ke manmanna at nge iau mukam.” Pomalam Esau heleia helenga kerkereng ngana e, ke poia Iakop ke lohot ke i teepe.
34 Ol pe Iakop tunge beret pe ngaunga eina lange Esau ke ngau pe in ke het pe lohaka ke la sapele.
Teepe nenge Esau ure nem i ure palaungana ia pe Esau naue ke pomanga ute e nge kino mana.