39
Iosep Ume Nga Potipa Nena Pele
1 Iok Ismael mur te mene Iosep ke te sio lange Ekipto pe Potipa ol hote Iosep lange iri. Ne Potipa nena nge Ekipto pe i ne Parao nena non soke ia pe nauele hana nenge te nauelele ne Parao.
2 Iosep ana soke laka ne Potipa nenge nena nge Ekipto pe tu luluch nge i nga nena pele. Pe nena ume lochloch ngana nenge umeia nga pele neu lohot ke urana toto iange Non Soke halaulaua i.
3 Pe ana soke naue ure lochloch ngana nge urana, eteia ke Non Soke tu luluch nge Iosep pomalam ure lochloch ngana nenge poia lohot ke urana mana.
4 Nenge neu poia Potipa ke iech toto nge Iosep pomalam talue i ke nauele hana nenge te umume nga nena pele pe nauele nena ure lochloch ngana hel pule.
5 Nga etue nenge Potipa talue Iosep ke nauele hana nenge te umume pe nena urelu mur, Non Soke poi ke urana toto lange Potipa. Ke ure lochloch ngana nga nena pele song ke nek pe ana ngaunga nga ume pe nena huros mur te lohot ke iri halang toto.
6 Ke pomalam Potipa hile ume lochloch la nga Iosep penna ke nauele ure lochloch pe letena ia ute e ero ol. Letena tu mana laka nga ngaunga nenge ngaua.
Pe Iosep singina lohot ke kerkereng pe nakuna urana toto.
7 Pe mala ero mana pe Potipa nehei memeleia i pe hele lange i ke teke, “O iat ke o ma luluch nge iau!”
8 Pe Iosep lemene ero pe hele lange ana non soke nehei ke teke, “O nau at! Ak soke letena here iau pe tunge ure lochloch ngana nga pele nei at nge iau ke e nauele. Pe i letena ia ute e ero ol iange letena here iau.
9 Nga pele nei letetena mele e nge i palaungana nge iau ero. Iau pe ak soke emem lala elle mana pe heo hele ute e nge iau ero. Pe I hele ia poinga nenge pomam at nge iau ero iange nehei laka iong. Poinga nem poreke toto iam pe lemek ero nge e poia iange lape e poia poinga poreke ngana nga NeHalang matana.”
10 Nga etue lochloch hei neu ollekleke Iosep pe Iosep lemene ero toto nge ma luluch nge i pe lemene ero toto nge tu luluch mana nge i pule.
11 Nga etuene e Iosep teu langa pele neu letena ke popoia ana ume pe hekuleileinga ana non e nge tu ero.
12 Ol pe hei neu rahite i nga nena hengeron sase ngana pe hele, “O iat ke ita nai ta ma!” Pe ero. Iosep hakarung hot nga nena hengeron sase ngana neu pe song hot nga pele neu.
13 Iok laol, Iosep ua hot nga pele neu ke la lo pe hei neu rahit mene nena hengeron ol.
14 Ol pe iua nena hekuleileinga ana hana mur nenge te umume nga pele neu pe hele lange iri ke teke, “A iat ke a nau nga ure nei! Ek mene teua non Hipru tana nei at nge ita ke hemeia ita! Ana non teu at lamai ke teke ma luluch nge iau pe e alangak hot ke soke toto.
15 Pe nga etue nenge longe iau nge e alngak haka ke soke toto, hile sue nena hengeron nga ilik pe song hot nga pele.”
16 Pe hei neu talue Iosep nena hengeron nga ilina ke la ene at ke lohot nga pele.
17 Ol pe nana hote lange ene ke teke, “Hekuleileinga ana non Hipru tana nenge o mene teua i at nga rera pele nei, at nge iau ke teke hemeia iau.
18 Pe ero. Nga etue nenge e alngak haka ke soke toto, hile sue nena hengeron sase ngana nga ilik pe song hot nga pele.”
19 Iosep ana soke letena inin toto nga etue nenge longe nehei nge nana lange i ke teke, “Ke lem hekuleileinga ana non nem poia iau ke pomai koi.”
20 Ol pe Iosep ana soke hele lange palinga hel ana hana mur te mene Iosep pe te tal teua i nga tuele au ngana. Tuele au ngana neu naunga-ala ana non nena hana mur te ma teueu ia.
Pe nga etue nenge Iosep tu nga tuele au ngana,
21 Non Soke tu luluch nge I pe poi ke nek lange i. Ke pomalam poia non nenge nauelele tuele au ngana neu ke mutena taua Iosep
22 pe poia Iosep ke nauele hana lochloch nenge te tu nga tuele au ngana. Pe pule talue i ke nauele ume lochloch ngana nenge te popoia nga lamau.
23 Pe Non Soke tu luluch nge Iosep pe poia nena ume mur ke te lohot ke urana mana. Pomalam non nenge nauelele tuele au ngana neu letena ia ute e ero ol, iange letena here Iosep nga nena ume nemur nenge popoia.