43
Pensamin Koko Nge Titina Mur Ke Te Lange Ekipto
1 Pe uringa nenge lohot nga ich nenge Kenan la ke poreke toto ol.
2 Pe ngaunga nenge te mene nge Ekipto kou te ngau tautaua lo. Pomalam temeria hele lange iri ke teke, “Ala mule nge Ekipto ke a ol mule ara ngaunga hel pule.”
3 Pe Iuta hele lange temeria ke teke, “Non neu hele at nge imem pengpeng ke teke, ‘Nenge teke a mene timo at ero, lemek ero toto nge e naue nakumo nga lamai.’
4 Ke pomalam o longala hote timem ke koko nge imem ke mo la ke mo ol ara ngaunga.
5 Pe nenge teke o longele i ero lape mo la ero. Iange non neu hele at nge imem ke ulolo ke teke, ‘Nenge teke a mene timo at ero, lemek ero toto nge e naue nakumo nga lamai.’ ”
6 Pe Israel hele ke teke, “Heueu nei a poia iau ke letek meena toto. Pomere nenge a hele hote timo lange non nem?”
7 Pe iri te tuacholia ke te teke, “Iange non neu ontei nich hote imem ke nek toto nge tememem pe titimem mur ke teke, ‘Tememo kau tutu kura mau? Pe timo e pule kau tutu mau?’ Pe imem mo tuachol pengpeng mene nena onteinga mur. Pe mo heteia letena tuanin ngana ero nga nenge teke, ‘A mene timo ke sio at lamai.’ ”
8 Ol pe Iuta hele lange temene Israel ke teke, “O longele kol nei ke at luluch nge iau ke imem ul ke mo sio la. Pomalam lape iong pe imem pe tutumem mur pe lemem hehei mur lape ta mete hot nga uringa ana etue nei ero.
9 Iau sipok lape e nauele i; pe letem here iau nge e nauele i ke nek. Pe nenge teke e mene mule i at nge iong ero, lape e kulala mana ak helenga nge iong ol; nge lape o hele menmene iau nga etue lochloch ngana nenge e tu nga ich nei.
10 O nau at, nenge teke o longele kol nei ke mola nike, toinge imem kou mola pe mo at ke he nai lo.”
11 Ol pe temeria Israel hele lange iri ke teke, “Nenge teke pomam, iok a poi ke pomai koi: A mene ure urana ngana mur hel nenge ta ume hote iri nga ich nenge ta tuia nei, pe a tal teua iri nga lemo kole mur pe a mene la ke pomanga lemo tunginga nenge lange non nem. A mene misou eina pe ure inangana heech ngana nenge te ume hote nga ae eina pe ure nenge ene almon pe ae nganangana nenge ene pistako.
12 Pe a mene ke um tutuna halang pol nga nenge a mene nga tele ngana, pe ala mule ia umtutuna nenge te tal teu leke nga lemo kole mur.
13 Pe a mene timo pule ke imo ul ala ke ueiuei mana nge non nem.
14 Pe lape e hetalaulau ke NeHalang Nenge Kerkereng Toto poia non nem ke letena urana nge imo. Pe poia timo Pensamin ke at luluch mule nge imo. Pe nenge teke ala pe e nau mule imo ero ol, lape tuk pele ero ol. Nem tu mana nga NeHalang penna.”
15 Iok hana nemur temene reria tunginga mur pe reria umtutuna nge halang pol pe iri ul Pensamin te sio la ke ueiuei mana nge Ekipto pe la te lohot nge Iosep.
16 Pe nga etue nenge Iosep naue Pensamin nge iri ul, hele lange non nenge nau elele nena pele ke teke, “O mene hana nei la nga lek pele pe o hune huros e ke o makia; iange lape te ngau luluch nge iau nga sinanga.”
17 Iok la ol, non neu mene hana nemur ke te la sapele nga Iosep nena pele ke pomanga hele ngana.
18 Te mene iri ke te la nga pele pe te matau iange leteria tuanin ke te teke, “Te mene ita at lamai pe lape te hele ia ita pe te rahite ita pe te poia ita ke ta ume nge non nei. Pe lape te ua toto ia rera tongki mur iange ngana laka nga umtutuna nenge ma teu mule nga rera kole mur, nga tele ngana nenge ta at nem.”
19 Iok te la ke te mes sio nge Iosep nena non neu nga pele matana pe te hele lange i ke te teke,
20 “Kole, non soke o longo at nge imem mukam. Nga lia mo at ke mo ol ngaunga nga lamai.
21 Pe nga mo la mule ngamem, miliko taua imem pe mo ma lou. Pe mo une lemem kole mur pe mo nau mule lemem umtutuna mur nge te mateu mule nga imem elle pe elle lemem kole mur. Pe umtutuna nemur koi mo mene mule iri at nei.
22 Luluch nga lemem umtutuna hel pule nenge mo ol mule ngaunga ia. Pe mo etei ero, itei toto nenge tal teu mule umtutuna nemur nga lemem kole mur mai?”
23 Ol pe non neu hele, “Ute pele ero pe a matau ero. Tememo ana Non Soke NeHalang laka tal teu mule umtutuna nemur nga lemo kole mur. Pe umtutuna nenge a ol ngaunga ia e mene iri lo.” Non neu hele ke mau ke het pe la ke mene hote Simion lange iri.
24 Pe mene teua hana nemur ke te teu la nga Iosep nena pele pe tunge ech ke te lome aperia. Ke het pe la ke hengaua reria tongki mur.
25 Pe hana nemur te longe nge Iosep lape at ke ngau luluch nge iri nga lamau nga sinanga, pomalam te tatalo ele nena tunginga mur.
26 Iok la ol, Iosep la nga nena pele pe hana nemur te tunge nena tunginga mur, nenge te mene teua la nga pele letena lange i, pe te tualou sio pe te au sio tote iri la nga ich.
27 Pe Iosep onteia iri ke teke, “A urana mana? Pe tememo nenge a heleia i at nge iau? I kau tutu kura mau?”
28 Pe iri te tuacholia ke te teke, “Non soke tememem kou maulul kura pe tu ke urana mana.” Pe te tualou sio mumule lala nge i.
29 Pe Iosep nau rara pe esia tina Pensamin nenge iri nai taria elle pengpeng pe ontei ke teke, “Pe timo nenge kino nenge a heleia i at nge iau kai?” Pe Iosep hele lange Pensamin ke teke, “Kol nem NeHalang letena poreke ia iong.”
30 Iosep letena poreke toto ia tina sune neu pe teke tang. Pomalam ua titina mur aria ke ueiuei mana pe teu la nga nena pele ana tokola e pule ke tang.
31 Ke het pe lome matana pe i hot la mule nge iri pe hele, “A ich ia ngaunga ol.”
32 Pe te ich ia ke Iosep ana altoto nga hatanga e pe iri aria altoto nga hatanga e pe Ekipto mur nenge te ngau luluch nge i, aria altoto nga hatanga e. Iange heungana toto nge Ekipto mur te ngau luluch nge Hipru mur.
33 Pe te heta kile Iosep titina mur ke te are nga hatanga ke te nanasia aria hesinga mur. Talun nge tiria nenge soke ke la nga nenge kino. Pe Iosep titina mur te esia iri ke te kila ke pomau pe te rura pe nau tele hel mana nge iri.
34 Iok, te ichia aria ngaunga nga hatanga nenge Iosep ke purpur mene iri pe te ich ia Pensamin ana ke halang toto ke purpure hana lime nge te ngaua. Iok la ol te ngau pe te in pe te iech mana luluch nge Iosep.