9
NeHalang Poia Tomunga Hel Ana Helenga Luluch Nge Noa
1 NeHalang hele lange Noa pe tutuna mur ke poimai: “Lek petanga nenge lange iong pomai koi. Lape a hoho ke tutumo mur iri halang toto pomalam lape a tu ke a purpure kileng lochloch ngana nga ich.
2 Huros mur nga ich pe ngie mur pe ruo mur lape te mataua imo pe a nauele iri. Ure nemur e tunge lange imo ke amo ngaunga ia. Huros mur pe ngie mur pe ruo mur nga ruach pe ure lochloch ngana nenge te amo rarara nga ich.
3 Ke ure lochloch ngana nenge te maulul lape amo ngaunga ia. Ke pomanga e tunge eleling mur lange imo. Pomalam mana e tunge ure lochloch ngana nei ke amo ngaunga ia.
4 “Pe huros mirana nenge eina tu hite kura a ngaua ero iange maulinga lohot laka nga toho.
5 Pe nenge teke huros e ma none hune mele lape e tuacholia lange i. Ke nenge teke huros e hune mele huros nem lape mete pule. Pe nenge teke none hune mele non nem lape mete pule.
6 “None nenge hune mele ke mete,
hana lape te hune i ke mete pule.
iange Iau NeHalang
pe e umeia hehei pe hana ke nakuria mange iau.
7 Ke pomalam e teke iong pe lem tete mur a hala lele ke imo halang toto pe a tu ke a purpure kileng lochloch ngana nga ich.”
8 Pe NeHalang hele lange Noa pe tutuna mur ke mai;
9 “Heueu nei e poia lek tomunga hel ana helenga luluch nge imo pe nge lemo tete mur nenge lape te lohot nge he.
10 Pe e poia la pule nge ngie mur pe huros mur nenge marana pe inolo pe ure maulul ngana mur lochloch nga ich nenge tei hot luluch nge imo nga mono nem.
11 E poia lek tomunga hel ana helenga nei lange imo ke mai: Ech hot ke taua kileng ke ulolo pe ure lochloch ngana nenge te maulul nga ich te mete lochloch. Pe lape e poi mule poinga e nge pomai nga hoena ero ol.”
12-13 Pe NeHalang hele, “E tal hote pitte usina nga tapa sana ke heilangia tomunga hel ana helenga nenge e poia lange iong pe ure lochloch ngana nenge te maulul nga ich. Ure nem lape helete metene iong nga nenge lape e tal hite helenga manmanna ngana nem ke koko.
14 Nga etue nenge e tal hote ulu ke ma hite ich pe pitte usina ma hot nga tapa sana,
15 Lape letek metene lek helenga kerkereng ngana nenge e poia lange iong pe nge ure maulul ngana mur lochloch. Ech e lohot ke taua kileng ero ol luluch nga ure maulul ngana mur lochloch.
16 Nga etue nenge e naue pitte usina nga tapa sana, lape letek metene tomungahel ana helenga nenge e poia lange ure maulul ngana kuenkuena ngana mur lochloch nga ich.
17 “Ke pitte usina nem heinglangia tomunga hel ana helenga nem.”
Noa Tutuna Mur
18 Noa tutuna mur nenge iri ul tetu nga mono koi nemur; Sem pe Ham pe Iapet. (Ham i Kenan temene.)
19 Ke hana mol nei Noa tutuna mur ia iri. Pe hulua lochloch ngana nenge tetu ke te rongo heke kileng lochloch ngana nga ich nei reria tete mur kou iri.
20 Noa i non nenge umume nga ume pe i tala toto nge tue uain ana ume.
21 Nga etuene inia uain eina ol pe matana liuliu pe ma ke lachlach mana nga nena pelpele letena.
22 Pe Kenan temene Ham i teu la pe esia temene nge lachlach pe la heleia lange titina mur nai nge hot.
23 Ol pe Sem iri nai Iapet te mene malenga pe te rahit heke langa ekeria pe tehul rumeria pe te ruka teu langa pelpele letena. Pe te nau kel mana pe te askou hite temeria nge lachlach.
24 Iok laol Noa letena matana pe lo haka longe utar nenge tuna lomele ngana poia lange i.
25 Pe hele ke teke,
“Ure meena lape lohot nge Ham tuna Kanan!
Lape lohot ke i hekuleileinga ana non nenge pingana iuiu ero
pe umume manmana nge titina mur.”
26 Pe Noa hele pule ke teke,
“Ta heto heke NeHalang Sem ana Non Soke
pe poia Kenan ke Sem nena hekuleileinga ana non.
27 Pe e hetalaulau ke NeHalang poia Iapet tutuna mur ke iri halang toto
pe poia iri ke te kila ke nek luluch nge Sem,
pe poia Kenan ke Iapet nena hekuleileinga ana non ia.”
28 Ech taua kileng ke het pe Noa tu ke ana hesinga iri ana non kina iri analoch pe ana non kina lime pe ana non kina nai pe analoch (350) mule.
29 Pe mete nga etue nenge ana hesinga ke iri ana non kina iri ana non kina nai pe ana non kina lime pe ana non kina nai pe analoch (950).