2
Moabu
1 Mkulu Nguluwi kangulonga hino,
“Wanhu wa Moabu nawalutilila kudita gehile,
ahyo sileka kuwagaza.
Hawamditile goya mndewa wa Edomu yabagame
nawajilakaza ng'hatu kwa chiluli mizeje ja heye
mbaka najiwa kota chokaa.
2 Lelo, ndodulisa chiluli kuli isi ya Moabu,
na kuzilakaza ng'hatu ngome za muji wa Kelioti.
Wamizi vyowolandula lizi lya hewo na kupemba mhalamhanda,
wanhu wa Moabu wobagama kuli iyowe alyo lya ngondo.
3 Kahi, ndomkopola chilongozi wa Moabu,
hamwe na vilongozi weng'ha wa isi ayo.
Heni Mkulu Nguluwi nandonga.”
Yuda
4 Mkulu Nguluwi kangulonga hino,
“Wanhu wa Yuda nawalutilila kudita gehile,
ahyo sileka kuwagaza.
Hawagakundile malajizo ga heni Mkulu Nguluwi,
ne kuwinza mizilo ja heni.
Nawajilizwa na milungu jijila jowajikundile wasekulu wa hewo.
5 Lelo, ndodulisa chiluli kuli isi ya Yuda,
na kuzilakaza ng'hatu ngome za Yelusalemu.”
Isilaeli
6 Mkulu Nguluwi kangulonga hino,
Waisilaeli nawalutilila kudita gehile,
ahyo sileka kuwagaza.
Nawawaguza wanhu watanganiche kwa vila hawawezile kuhilusa vinhu vyowalingudaigwa,
na kuwaguza wazunwa wawele nawalemwela kuhilusa sendi zowalingudaigwa kwa chiwalo cha makwamba.
7 Wanguwatunyaga na kuwabunza ng'hochele,
na kuwabagula wazunwa, leka walemwele kupata hachi za hewo.
Mhaza na msongolo wa heye wanguwasa na chitumagwa mdala yumwe,
ahyo wangulidita itagwa lya heni lyelile liwe likokomoche.
8 Honeche hawele na honhu ha kulavila nhambiko,
wanhu wanguwasilaga nguwo zowaholile kulawa kwa wazunwa
kota lehani zowalingudaigwa,
na kuli ng'handa ya Nguluwi wa hewo
wangunwa divai yowaiholile kwa walinguwadai.
9 Ahyo, hemwe wanhu wa heni,
kwa chiwalo cha hemwe, nandiwadumya ng'hatu Waamoli
wawele nawali ng'wemang'wema kota mielezi,
wawele na mong'ho kota migodi ja mialoni.
Ena, nandiwadumya, nhagala na mizabi.
10 Nandiwalavya hemwe kulawa kuli isi ya Misili,
nandiwalongoza hemwe kwa kukolela kuli chiwala kwa miyaka makumi gane,
mbaka namuihola isi ya Waamoli naiwa ya hemwe.
11 Nandiwahagula wamwe wa wana wa hemwe wawe waloli,
na wamwe wa wasongolo wa hemwe wawe Wanazili.
Ndaze, hemwe Waisilaeli,
aga gondilingulonga hagawele ga kukomya?
Heni Mkulu Nguluwi nandonga.
12 Ila hemwe namuwadita Wanazili wanwe divai,
na kuwalajiza waloli waleche kulavya uloli.
13 “Lelo, ndowadwika mhomholo ng'hulu ng'hatu,
kota mutuka umemile nyhule.
14 Walingubilima goya hawoweza kusulupuka,
wawele na mong'ho hawowa na mong'ho kahi,
na wamizi wolemwela kulohola ukomu wa hewo.
15 Walingutoza upinde kuli ngondo wobilima,
wawele goya kubilima hawoweza kiyamila,
wakwina falasi wolemwela kulohola ukomu wa hewo.
16 Mbaka wamizi wazidahe ng'hatu,
zuwa alyo wobilima wawele mwanzi.
Heni Mkulu Nguluwi nandonga.”