5
Kulombocheza kwa Amosi
1 Mhulichize kulombocheza kwa heni hali hemwe,
hemwe Waisilaeli.
2 Nakugwa na haukwinuka kahi
hegwe mhinza Isilaeli!
Nakulechigwa uliyeka kuli isi ya hegwe,
haduhu wa kukwinula.
3 Kwa vila Mkulu Nguluwi kangulonga hino,
“Wanhu elufu imwe wolawa mujini kuluta kitowa kwa chiwalo cha Isilaeli,
ila wohiluka miya imwe hela,
wokuka wanhu miya imwe wa chijiji chimwe,
ila wosulupuka wanhu kumi hela.”
4 Mkulu Nguluwi kanguwalonjela hino Waisilaeli,
“Mumhale, namwe mochikala!
5 Ila mleche kumhala ako Beteli
ne kuluta Giligali
ne kuloka kuluta Beeli-sheba.
Kwa vila walingikala Giligali,
ndikomya, wohilikwa kuli isi ya chijenzi,
na Wabeteli wodumigwa!”
6 Mumpale Mkulu Nguluwi namwe mochikala!
Wone haiwa ahyo, heye kowalakaza walelwa wa Yusufu,
chiluli chowalakaza walingikala Beteli
haduhu yoweza kuchizima.
7 Hemwe mlingugalusa hachi kuwa usungu
na kuigwisa hachi.
8 Heye yaviditile vilundo vya nhondwe vya Kilimiya na Olioni,
yalingugalula jiza ng'hulu kuwa kubwemwenzuka,
na nemisi kuwa nechilo,
yalingugachema hamwe mazi ga bahali
na kugabohola mchanya mwa isi.
Mkulu Nguluwi ndo itagwa lya heye.
9 Heye ndo yalinguwadumya wawele na mong'ho baho du,
na kuziwifya ngome za hewo.
10 Mwangumzudila yula yalinguilewela hachi,
na kumbeza yula yalingulonga kukomya.
11 Mwanguwabunza wazunwa
na kuwadita wawape hemwe nyhule kwa lupichi.
Ahyo, hanga namzenga ng'handa za maganga ga sendi nyinji,
hamchikala mgati mwake,
hanga namnyala nyhadikwa kuli migunda jinojile ja mizabibu,
ila hamuweza kunwa divai yake.
12 Kwa vila ndanguizela hisabu ya nongwa za hemwe,
na ukulu wa gehile ga hemwe.
Namuwabunza watanganiche na kubochela chinhu kwa uviso leka kwajiliza hachi,
na kulemeza hachi ya mzunwa kuli chitala,
13 lelo, munhu yawele na luhala kanguwaga yonyamalila kuli mhela kota awo,
kwa vila mhela awo ndo wihile.
14 Mpale kudita ganojile ne kudita gehile,
leka mikale.
Hamba, Mkulu Nguluwi Yawele na Mong'ho,
yawe hamwe na hemwe kota vyomlingulonga.
15 Mzudile wihe, mgane kunoga,
na kulutilila kudita hachi kuli chitala.
Mkulu Nguluwi Yawele na Mong'ho kowalajila isungu lya heye wanhu wa Yusufu wasigale.
16 Lelo, Mkulu Nguluwi Yawele na Mong'ho,
ena, Mkulu Nguluwi kangulonga,
“Kowa na chililo chila honhu kuli muji,
wanhu wolombocheza, ‘Tochona! Tochona!’
Walimi wochemigwa woye kulombocheza,
na walingupegwa sendi kwa chiwalo cha kulombocheza, woye kulombocheza.
17 Kowa na chililo kuli migunda jeng'ha ja mizabibu,
kwa vila ndokola hali hemwe kuwagaza.
Heni Mkulu Nguluwi ndangulonga.”
Zuwa lya Mkulu Nguluwi
18 Mochona hemwe mlingulibeteza kwa maya
zuwa lya Mkulu Nguluwi!
Lekachoni mwanguligana ng'hatu zuwa alyo?
Zuwa alyo, lyowa zuwa lya jiza na haliwa na lumuli!
19 Lyowa kota vila munhu yalingulibilima isimba,
hamba kangiting'hana na idubu!
Ama kota munhu yalinguhiluka kaye kwa heye,
na kuwika moko kuli lukanzi na kulumigwa na izoka.
20 Zuwa lya Mkulu Nguluwi lyowa na jiza na haliwa na lumuli,
lyowa lya masinzo ne lumuli loneche.
21 Mkulu Nguluwi kangulonga hino,
“Ndanguzizudila na kuzibeza mnvina za hemwe,
hambe sangalale na nhing'hano za hemwe.
22 Homndavila nhambiko za hemwe za kulakazwa na nhambiko za nyhule,
sikunda kuzibochela,
na nhambiko za hemwe za kikala goya za milogota jinonile
sizilola ne hado.
23 Muse iyowe lya lwimbo lwa hemwe hali heni!
Silingugana kuhulichiza muzichi wa ving'weleng'wele vya hemwe!
24 Ila mleche hachi ichililiche kota mazi,
kutanganika kuwe kota lwanda luwele hambe lukale.
25 “Hemwe Waisilaeli, mhela wula womuwele kula kuli chiwala kwa miyaka makumi gane, ndaze, namingalila nhambiko na ndolendole ne kamwe?
26 Mhela awo nampika jimalukolo ja Sakuti, mndewa wa hemwe na jimalukolo ja Kaiwani, mlungu wa hemwe wa nhondwe, vinhu viwele namigongomanyila mwemwe leka mvifugamile.
27 Ahyo ndowahilika hemwe kuli isi ya chijenzi, kutali kusinda Damasiko!” Mkulu Nguluwi, yawele itagwa lya heye ndo Mkulu Nguluwi Yawele na Mong'ho, nakalonga.