13
Utaguso hali Isilaeli
1 Mhela nhanzi ya Efulaimu vyoilonjile, wanhu nawakakama,
nayali itogoligwe kuli Isilaeli,
ila nayali na nongwa ya kumfugamila Baali, naye nakabagama.
2 Lelo nawalutilila kudita gehile, nawegongomanyila jimalukolo kwa sendi za hewo,
jimalukolo jigongomanyigwe goya ng'hatu,
jeng'ha ndo mijito ja walingugongomanya goya.
Yangulonjigwa kuwala awa wanhu,
“Walingulavya nhambiko kwa jimalukolo ja milogota, wa kota wanhu walingujinonela jimalukolo ja milogota!”
3 Lelo, wokwajilila kota ng'hungugu ya mitondo,
kota nungwi ilinguka himahima,
kota mhumba ilinguwembeluswa honhu ha kupululila,
kota iyosi lilingubilabila kuli itubuli liwele mwanzi.
4 “Ila heni ndo Mkulu Nguluwi, Nguluwi wa hemwe,
ndiwalavile hemwe kulawa isi ya Misili,
mwahela Nguluwi yunji ila heni,
haduhu yalinguweza kuwalohola.
5 Heni ndo ndiwalolele hemwe vyomuwele kuchiwala,
kuli isi iwele na ivuche lilingulakaza.
6 Londiwapele hemwe chilyo, namwali migute
lomigute, namwaluka kidaya, hamba namsemwa heni.
7 Lelo, ndowa kota isimba kwa hemwe,
ndowabeteza mnzila kota izongoduma.
8 Kota idubu lisukuligwe mwanage,
Ndowatowa na kuzidadula mhambaga za hemwe.
Kota isimba ndowalya, igongolo lya kisolo lyowadadula.
9 “Ndowadumya hemwe Waisilaeli.
Whaani yoweza kuwatanza?
10 Kakohi lelo mndewa wa hemwe
yawalohole kulawa kuli miji ja hemwe jeng'ha?
Wa kohi wala vilongozi wa hemwe wawamile?
Hemwe ndo mlandile,
‘Utupe mndewa na vilongozi watulongoze.’
11 Kwa kuzudila kwa heni nandikupa mndewa,
hamba nandimusa kwa ng'halazi ya heni.
12 Wihe wa Isilaeli nauwichigwa ako,
magazo ga heye nagawichigwa kung'hano kwa chiwalo cha hamba.
13 Usungu kota wa mdala yalinguponda womfika,
ila heye ndo mwana mpoka,
mhela wa kupondigwa houfika, kangulemaga kulawa mmunda mwa mayake.
14 “Ndowagombola hemwe kulawa kuli isi ya wabagame,
ndowalohola kulawa kuli kubagama.
Gwa kubagama, kwa kohi kudumya kwa hegwe?
Gwa isi ya wabagame, kwa kohi kuwifya kwa hegwe?
“Heni siwonela isungu,
15 hanga Isilaeli kolutilila goya hali wang'holoze.
Mbeho ya ivuche ya kolilawilaga isanya kulawa kwa Mkulu Nguluwi yokuya, iputa kulawa kuchiwala,
nzasa yake hailavya mazi na ideho lyake lyokala.
Ng'hano za heye zeng'ha za vinhu vya sendi nyinji zoholigwa.
16 Wanhu wa Samaliya wotowigwa kwa nongwa ya hewo,
kwa vila nawambelenhuka Nguluwi wa hewo.
Wokopoligwa kwa ipanga, wana wa hewo wohondangwa,
wache wa hewo wawele na himila wotumbuligwa.”