5
Lwimbo lwa Debola na Balaka
1 Zuwa alyo Debola na Balaka, mwana mlume wa Abinoamu, nawemba lwimbo alu.
2 “Kwa vila vilongozi nawalawa ne lunhwinhwi kulongoza Isilaeli,
kwa vila wanhu nawelavya kwa kunuwila,
Mkulu Nguluwi yatogoligwe.
3 Mhulichize, hemwe wandewa!
Muwiche goya makutu, hemwe wakulu!
Ndomwimbila Mkulu Nguluwi, ndokwimba,
kwa lwimbo ndomtogola Mkulu Nguluwi, Nguluwi wa Isilaeli.
4 Mkulu Nguluwi, loulawile kuli vidunda vya Seili,
lowuchile kulawa isi ya Edomu kuluta kitowa ngondo,
isi naikakama,
ulanga naulagaza mazi,
ena, ng'hungugu nailagaza nhonya.
5 Vidunda navitigasika hali Mkulu Nguluwi, Nguluwi wa Sinai,
navitigasika hali Mkulu Nguluwi, Nguluwi wa Isilaeli.
6 “Kuli mazuwa ga Shamugali, mwana mlume wa Anati,
mazuwa ga Yaeli,
nzila ng'hulu nazali zihile,
na majendo ga wanhu nagali kuli nzila za hafungo.
7 Walimi nawaleka kukola mijito,
nawaleka kukola mijito kuli Isilaeli,
mbaka londawile heni Debola,
heni mbele kota mamo kuli Isilaeli.
8 Waisilaeli lowehagule milungu jinji,
ngondo nailawila kuli isi,
ila nakwali haduhu ngawo ama igoha
hali wanhu elufu makumi gane (40,000) wa Isilaeli.
9 Heni ndanguwahulichiza vilongozi wa Isilaeli,
hamwe na wawele welavile kwa kunuwila,
kwa hewo wawo hali wanhu.
Mkulu Nguluwi yatogoligwe.
10 “Muwikule mbuli, hemwe mlingukwina midogowi mizelu,
mlingikalisa kuli nhemvu za sendi nyinji,
namwe mlingukola nzila kwa magulu.
11 Mhulichize! Wanhu wawele kuli ideho lya mazi,
aho wowikula madito ga hachi ga Mkulu Nguluwi,
ena, madito ga hachi ga wanhu wa heye kuli Isilaeli.
Aho ndo wanhu wa Mkulu Nguluwi lowaduliche hali lwizi lukulu lwa muji.
12 ‘Ulilimche, ulilimche, Debola!
Ulilimche, ulilimche, wimbe lwimbo!
Winuche, Balaka, hegwe mwana mlume wa Abinoamu,
uwahole wapogozi wa hegwe wa ngondo.’
13 “Vilongozi waponile nawadulika,
wanhu wa Mkulu Nguluwi nawaluta leka wetowe na wawele na mong'ho.
14 Kulawa Efulaimu nawadulika hewo wawele nawalawila Amaleki,
kumbele kwa hegwe Benjamini na hagati ya wanhu wa hegwe.
Kulawa Makili, nawadulika wakulu,
na kulawa Sebuluni hewo walingibata idela.
15 Wakulu wa Isakali nawali hamwe na Debola,
ena, wanhu wa Isakali nawali na Balaka.
Nawamuwinza kuno wobilima mbaka kuli ibindi.
Ila ng'holo za Lubeni,
nazali na lunhwinhwi mnhumbula.
16 Wanhu wa Lubeni, lekachoni hemwe namikalisa kuli mibani ja ming'holo,
kuhulichiza mluli ulingupembigwa leka kuvichema vilundo?
Kuli ng'holo za Lubeni,
nakwali na lunhwinhwi mnhumbula.
17 Nhanzi ya Gadi nayali kumwambu mwa lwanda lwa Yolodani,
nhanzi ya Dani, lekachoni nawali waponile kuli itumbwi?
Nhanzi ya Asheli nawali wochikala tulu hali hafungo mwa bahali,
nawali wekale hali hafungo mwa bandali ya hewo.
18 Ila wanhu wa Sebuluni na Nafutali hawadumbile kubagama,
kuli honhu ha kitowa ngondo.
19 “Wandewa nawoya na kitowa ngondo,
aho ndo wandewa wa Kanaani nawetowa ngondo,
kuli Taanaki, habehi na mazi ga Megido,
ila hawapatile chinhu choneche cha sendi.
20 Nhondwe kulawa kilanga nazihanza kuli ngondo,
kulawa honhu zawo, nazitowa na Sisela.
21 Kumema kwa mazi ga lwanda lwa Kishoni nakuwahilika kutali,
lula lwanda lwa katali, lwanda lwa Kishoni.
Gwa muhe wa heni, ulutilile kumwando kwa nhumbula ikangale.
22 Hamba kwato za falasi nazitowa ng'hatu hasi,
nazitowa himahima, kwato za falasi wawele na mong'ho.
23 Mhilisi wa Mkulu Nguluwi nakalonga, ‘Muupanjile muji wa Melosi,
muwapanjile kwa usungu wa wenyeng'haye wake,
kwa vila hawoyile kumtanza Mkulu Nguluwi,
kumtanza Mkulu Nguluwi kwa kitowa na wala wawele na mong'ho.’
24 “Kotambichizwa Yaeli kusinda wadala weng'ha,
mchewake Hebeli, Mkeni,
kotambichizwa ng'hatu kuli wadala weng'ha walingikala kuli ihema.
25 Nakalanda mazi hela, ila nakamha matombo.
Nakamgalila mtindi kuli chisaye chinojile.
26 Nakagolola moko wa heye wa kumoso nakebata chigingi,
moko wa heye wa kudilo naubata yila nyundo,
nakamtowa Sisela, nakatubula mutwi wa heye.
Ena, nakamtowa na kutubula mutwi wa heye kwa chigingi.
27 Sisela nakenamiza hali magulu ga heye, nakagwa na kuwasa tulu.
Hali magulu ga heye nakenamiza, nakagwa hala.
Hala hoyagwile nakabagama.
28 “Mayake Sisela nakasunjilila hali itubuli,
kulawa kumbele mwa ipaziya nakalila,
‘Lekachoni mutuka wa heye wangukawila?
Lekachoni lizi lwya mutuka haluhulikwe?’
29 Wadala wa heye wawele na nyhala nawamwidichila.
Ena, mayake Sisela nayali yochijesa,
30 ‘Ndaze, hawawele na vinhu kulawa kuli ngondo na kigawila,
mpogozi mdala yumwe ama weli kwa chila mlume?
Kwa Sisela nguwo zeng'ha zowapatile kuli ngondo, nguwo za lanji za vilivinji,
nguwo za kunoliga,
kahi nguwo za lanji zilivinji za kunoliga banzi zeng'ha mbili,
kuli singo ya heni.’
31 “Wabagame wang'honyo wa hegwe weng'ha, gwa Mkulu Nguluwi.
Ila wala walingukugana wawe kota isanya hala holilawa kwa mong'ho wake.”
Isi nayali na kikala goya kwa miyaka makumi gane.