7
Gideoni kanguwasumya Wamidiani
1 Hamba, Yelubaali, yawele ndo Gideoni na wanhu weng'ha wawele hamwe na heye, nawoka lufuku ng'hatu, nawawika kambi ya hewo habehi na nzasa ya Halodi. Kambi ya Wamidiani nayali ubanzi wa kasikazini, kuli ibindi, habehi na chidunda cha Mole.
2 Mkulu Nguluwi nakamlonjela Gideoni, “Wanhu wano wowawele hamwe na hegwe ndo wenji ng'hatu kwa heni kuwawika Wamidiani kuli moko mwa hewo, leka Waisilaeli waleche kidaya na kulonga kota moko ga hewo wawo ndo gawalohole.
3 Lelo ulute, ukawikule mbuli ayi kuli makutu ga wanhu wano na kulonga kota munhu yoneche yalingudumba na kukakama, yahiluche kaye natwe tochikala hano kuli chidunda chino cha Gileadi. Aho ndo wanhu elufu makumi meli na mbili (22,000) nawahiluka, nawapona wanhu elufu kumi (10,000).”
4 Mkulu Nguluwi nakamlonjela Gideoni, “Wanhu wano wang'hali wenji lukami. Wahiliche kuli lwanda nani ndowajeza ako kwa chiwalo cha hegwe. Hamba yula yondikulonjela hegwe, ‘Ayu koluta hamwe na hegwe,’ ayo koluta hamwe na hegwe. Yula munhu yondikulonjela, ‘Ayu hambe yalute hamwe na hegwe,’ ayo holuta hamwe na hegwe.”
5 Lelo nakawahilika wanhu kuli lwanda. Mkulu Nguluwi nakamlonjela Gideoni, “Chila munhu yojeza mazi kwa umiyango wa heye kota vyoliditaga libwa, munhu ayo komuwika hafungo, chila munhu yofugama kunwa mazi, naye komditila hihyo.”
6 Wanhu wanwele mazi kwa kuhilika moko ga hewo kuli milomo ja hewo na kumyanga kota libwa, nawali wanhu miya zidatu, ila wanhu wanji weng'ha nawanwa mazi kwa kufugama.
7 Mkulu Nguluwi nakamlonjela Gideoni, “Ndowalohola hemwe mweng'ha kukolela wanhu wano miya zidatu wanwele mazi kota mibwa na ndowawika Wamidiani kuli moko ga hegwe, ila wanhu wanji weng'ha waleche woche chila munhu yalute haluga hake.”
8 Lelo Gideoni nakahola chilyo cha hewo na mhalamhanda za hewo, hamba nakawalaga wanhu weng'ha wa Isilaeli, chila munhu kuli ihema lya heye, ila nakapona na wanhu miya zidatu. Kambi ya Wamidiani nayali ubanzi wa hasi, kuli ibindi.
9 Nechilo, Mkulu Nguluwi nakamlonjela Gideoni, “Uche, uduliche na ulute kuli kambi ya hewo na kuwatowa, mina ndiwawika kuli moko ga hegwe.
10 Ila wone kodumba, uduliche na Pula chitumagwa wa hegwe.
11 Nagwe kohulika vyowolonga, hamba moko ga hegwe gowichigwa goya kitowa ngondo.” Aho ndo Gideoni nakadulika hamwe na chitumagwa wa heye Pula mbaka kowawele wamizi wa kambi ya Wamidiani.
12 Wamidiani na Waamaleki na wanhu wa kolilawilaga isanya, nawali kuli ibindi, nawali wenji kota nzije na ngamiya wa hewo nawali wenji lukami kota sangalaza za mhwani.
13 Gideoni loyafichile, nakwali na munhu yumwe nayawele yomsimila myage kulota kwa heye, yolonga, “Lole, ndota hino, ibumunda lya shayili naligwa kuli kambi ya Wamidiani, nalifika kuli ihema limwe, nalitowa lukami ihema mbaka ihema naligwa, luu.”
14 Myage nakamwidichila yolonga, “Mbuli ayi yowa ipanga lya Gideoni, mwana mlume wa Yoashi, munhu wa Isilaeli. Nguluwi nakawawika mmoko mwa Gideoni, Wamidiani na wamizi weng'ha wawele kuli kambi.”
15 Lelo Gideoni naloyahuliche kulota ako na kutang'hula kwake, nakamfugamila Nguluwi. Nakahiluka kuli kambi ya Waisilaeli na kulonga, “Mwinuche, kwa vila Mkulu Nguluwi nakawawika wamizi wa Wamidiani kuli moko ga hemwe.”
16 Hamba nakawawika wala wanhu miya zidatu kuli vilundo vidatu, nakawapa mhalamhanda na mibuli jilihela mazi na vyenje mgati mwa mibuli ajo.
17 Nakawalonjela, “Mlole, mkadite kota heni vyondilingudita londifika kuli mwiso wa kambi.
18 Londipemba mhalamhanda, heni na weng'ha wawele hamwe na heni, namwe mpembe mhalamhanda za hemwe banzi zeng'ha za kambi, kuno mtowa iyowe, ‘Ayi ndo kwa chiwalo cha Mkulu Nguluwi na Gideoni.’ ”
19 Lelo Gideoni na wala wanhu miya imwe wowawele hamwe na heye, nawafika mwiso wa kambi, mwaluko mwa mhela wa hagati ha nechilo, mhela lowawele wagaluse wamizi wa hewo kuli kambi, nawapemba mhalamhanda za hewo, nawabena vihandevihande jila mibuli jiwele mmoko mwa hewo.
20 Hamba vila vilundo vidatu navipemba mhalamhanda na kubena mibuli. Nawebata vyenje vya hewo kuli moko ga hewo ga kumoso na zila mhalamhanda za hewo kuli moko ga hewo ga kudilo leka wapembe. Nawatowa iyowe, “Ipanga ndo lya Mkulu Nguluwi na Gideoni.”
21 Nawema chila yumwe honhu ha heye kuzunguluta kambi banzi zeng'ha, wamizi weng'ha kuli kambi nawabilima na kutowa iyowe.
22 Wanhu wa Gideoni nawapemba mhalamhanda za hewo, naye Mkulu Nguluwi nakawadita Wamidiani wekopole hewo kwa hewo kuli kambi. Waponile nawabilima mbaka Beti-shita kulutila Selela, mbaka kuli mbaka wa Abeli-Mehola, habehi na Tabati.
23 Walume wa Isilaeli nawali weting'hane kulawa nhanzi za Nafutali na Asheli na Manase, nawawawinga Wamidiani.
24 Hamba Gideoni nakalajiza wasenga kuli isi yeng'ha ya vidunda vya Efulaimu, yolonga, “Lelo mduliche kwa Wamidiani, mkawalemeze Wamidiani waleche kufika kuli mazi ga lwanda lwa Yolodani mbaka Beti-bala.” Lelo walume weng'ha wa Isilaeli nawaluta kwamila mazi ako Beti-bala na lwanda lwa Yolodani na kuwalemeza waleche kuloka.
25 Nawawebata wala wakulu weli wa Wamidiani, Olebu na Seebu. Nawamkopola ayo Olebu bahala kuli italawe lya Olebu. Ayo Seebu nawamkopola hala hawele na honhu ha Seebu ha kukamila divai, hamba nawawawinga Wamidiani. Vitwi vya Olebu na Seebu nawavigala kwa Gideoni kumwambu mwa lwanda lwa Yolodani.