11
Yoshua kangumsumya Yabini
1 Mndewa Yabini wa muji wa Hasoli loyahuliche mbuli azo, nakahilika usenga kwa mndewa Yobabu wa Madoni na mndewa wa Shimuloni na mndewa wa Akishafi
2 na kwa wandewa wawele kuli vidunda vya kasikazini na Alaba nayali kusini mwa Kineleti na kuli ibalalika na Nafoti-doli kuli ubanzi wa kolizinjilaga isanya.
3 Nawahilika usenga kahi kwa Wakanaani wa ubanzi wa kolilawilaga isanya na kolizinjilaga isanya, wawele ndo Waamoli na Wahiti na Wapelisi na Wayebusi wawele wochikala kuli isi ya vidunda na kwa Wahivi hasi ha chidunda cha Helimoni kuli isi ya Misipa.
4 Lelo walawa weng'ha na wamizi wa hewo. Nawo nawali wenji kota sangalaza za kugunuche hamwe na mituka minji ja falasi na falasi wenji ng'hatu.
5 Wandewa awa weng'ha nawelumba na kuwika kambi ya hewo kuli Mazi ga Melomu leka wetowe na Waisilaeli.
6 Mkulu Nguluwi nakamlonjela Yoshua, “Uleche kuwadumba awo, mina mitondo mhela kota awu, ndowakopola weng'ha kwa kuwawika mmoko wa Waisilaeli. Hemwe modumula midanha ja falasi awo na kulakaza mituka ja hewo kwa chiluli.”
7 Lelo baho du Yoshua hamwe na wamizi wa heye weng'ha nawalawila kuli nzasa ya Melomu na kuwatowa.
8 Mkulu Nguluwi nakawawika mmoko mwa Waisilaeli, na hewo nawawatowa na kuwawinga mbaka Sidoni Ng'hulu na Misilefoti-maimu, mbaka ubanzi wa kolilawilaga isanya kuli ibindi lya Misipa. Waisilaeli nawawatowa na kuwakopola weng'ha.
9 Yoshua nakadumula midanha jeng'ha ja falasi wa hewo na kulakaza mituka ja hewo kwa chiluli, kota Mkulu Nguluwi vyoyamlajize.
10 Yoshua loyawele yohiluka, nakauhola muji wa Hasoli. Nakamkopola mndewa wake. Hasoli nawali muji ukulu wa undewa wa isi azo zeng'ha.
11 Hamba nakaulakaza muji wa Hasoli kwa chiluli na kuwakopola kwa ipanga wanhu wake weng'ha, hamlechile ne munhu yumwe.
12 Miji jeng'ha ja wandewa wa hewo na wandewa wake weng'ha, Yoshua nakawahola na kuwatowa kwa ipanga na kuwadumya ng'hatu, kota vyoyalajizwe na Musa, chitumagwa wa Mkulu Nguluwi.
13 Ila Waisilaeli hawajilakaze miji jiwele jizenjigwe kuli mahame, ila wula muji wa Hasoli uwele Yoshua nakaulakaza.
14 Waisilaeli nawahola vinhu vyeng'ha vyowabochile na migongolo ja muji awo, ila nawawakopola wanhu wake weng'ha na hawamlechile ne munhu yumwe.
15 Mzilo awu nakapegwa Musa, chitumagwa wa Mkulu Nguluwi. Musa nakamlajiza Yoshua yawele nakaukolela mijito. Yoshua nakeneza chila mbuli iwele Mkulu Nguluwi yoyamlajize Musa.
Isi zibochigwe na Yoshua
16 Yoshua na wamizi wa heye nawaiboka isi yeng'ha kulawa kasikazini mbaka kusini. Nawaboka honhu ha vidunda na honhu heng'ha ha Negebu na honhu heng'ha ha Gosheni na isi ya ibindi na isi ya Alaba na kuli vidunda vya Isilaeli na honhu hake hawele na ibalalika,
17 nakawahola na kuwakopola wandewa weng'ha wa isi ayo kwaluchila chidunda cha Halaki habehi na Seili mbaka Baali-gadi kuli ibindi lya Lebanoni, kusini mwa chidunda cha Helimoni.
18 Yoshua naketowa ngondo na wandewa awo weng'ha kwa mhela winji.
19 Kuduhuli muji nauditile uhanyisi wa kikala goya na Waisilaeli, ila Gibeoni hela, kuwele nawekale Wahivi. Waisilaeli nawajiboka miji jiyage jeng'ha kwa kitowa ngondo.
20 Nayali kota vyoyaganile Mkulu Nguluwi yuye kuzidita nhumbula za wanhu wa isi azo ziwe zigagadale leka wetowe. Nakagana waleche konelwa isungu ila wadumigwe. Ndo Mkulu Nguluwi vyoyamlajize Musa.
21 Mhela awo, Yoshua nakaluta na kuwakopola Waanaki wawele wochikala kuli isi ya vidunda ako Hebuloni na Debili na Anabu, isi yeng'ha ya vidunda vya Yuda na Isilaeli. Yoshua nakawakopola wanhu awo hamwe na kujiwifya miji ja hewo.
22 Haduhuli munhu wa nhanzi ya Anaki nayaponile kuli isi ya Isilaeli, wanji nawapona kuli miji ja Gasa na Gati na Ashidodi.
23 Lelo Yoshua nakawapa isi yeng'ha iwe ya hewo kwa chiwalo cha gala geng'ha Mkulu Nguluwi vyoyamlajize Musa. Yoshua nakawapa Waisilaeli iwe uhalizi wa hewo, wegawile kuli nhanzi ya hewo. Hamba isi yeng'ha nayali na kikala goya ne ngondo.