13
Honhu hawele hang'hali kubochigwa
1 Mhela awu Yoshua nayali yalalile ng'hatu, Mkulu Nguluwi nakamlonjela, “Hegwe lelo kulala na kwa sekulu wa miyaka minji, hang'hali honhu ha isi nyinji haholigwe.
2 Honhu aho ndo isi yeng'ha iponile kubochigwa, isi yeng'ha ya Wafilisti na isi yeng'ha ya Wageshuli,
3 kulawa lwanda lwa Shiholi luwele ako kolilawilaga isanya mwa Misili mbaka kuli mbaka wa Ekiloni ubanzi wa kasikazini, isi ilingulonjigwa kota ndo ya Wakanaani. Kahi hambochile isi ya wandewa wahano wa Wafilisti wawele wolongoza Gasa na Ashidodi na Ashikeloti na Gati na Ekiloni na kahi hambochile isi ya Waavi.
4 Kahi ndo ubanzi wa kusini kuwele na isi yeng'ha ya Wakanaani na Meala iwele ya Wasidoni mbaka Afeki kuli mbaka wa Waamoli
5 na honhu ha Wagebali na honhu heng'ha ha Lebanoni ako kolilawilaga isanya, kulawa Baali-gadi hasi ha chidunda cha Helimoni mbaka Lebo-hamati
6 na wanhu weng'ha walingikala honhu ha vidunda viwele kwaluchila Lebanoni mbaka Misilefoti-maimu iwele wanhu wa ako ndo Wasidoni. Heni Nguluwi, ndowawinga wanhu wa isi azo hali Waisilaeli. Nagwe kowagawila hela honhu ha isi azo kota vyondikulajize.
7 Kozigawa isi azo kwa uhalizi kwa nhanzi tisa na nusu ya nhanzi ya Manase.”
Isi ya kolilawilaga isanya mwa Yolodani
8 Nhanzi ya Lubeni na Gadi na nusu iyage ya nhanzi ya Manase nazali zigawilwe isi iwe ya hewo iwele kolilawilaga isanya mwa lwanda lwa Yolodani, kota Mkulu Nguluwi vyoyamlajize Musa, chitumagwa wa heye.
9 Honhu ha hewo nahali kwaluchila Aloeli hafungo ha ibindi lya Alinoni na muji wula uwele hagati ha ibindi na isi yila yeng'ha ya ibalalika lya Medeba mbaka Diboni,
10 hamwe na miji ja mndewa Sihoni wa Waamoli, yalongoze ako Heshiboni kuli mbaka wa Waamoni,
11 hamwe na isi ya Gileadi na honhu ha Wageshuli na Wamaakati na chidunda cheng'ha cha Helimoni na isi yeng'ha ya Bashani mbaka Saleka
12 na undewa weng'ha wa Ogu kuli Bashani, yumwe wa Walefayi wasigale, nayalongoze ako Ashitaloti na Edileyi. Musa nayali yawasumile awo weng'ha na kuwawinga.
13 Ila Waisilaeli nawalemwela kuwawinga Wageshuli na Wamaakati, ahyo wangikala hali Waisilaeli mbaka lehano.
14 Musa hawagawile wanhu wa nhanzi ya Walawi isi yoneche iwe ya hewo. Ila nhambiko zowamlavile Mkulu Nguluwi, Nguluwi wa Isilaeli kwa chiluli, azo ndo nazali uhalizi wa hewo, kota Mkulu Nguluwi navyoyamlajize Musa.
15 Musa nakawapa uhalizi wa isi wanhu wa nhanzi ya Lubeni kota vyoziwele ng'holo za hewo.
16 Nayali kwaluchila Aloeli hafungo ha ibindi lya Alinoni na muji uwele kuli hagati ha ibindi alyo hamwe na isi yeng'ha ya ibalalika lya Medeba.
17 Nayali kahi hamwe na Heshiboni na muji wake weng'ha uwele hali honhu hawele na ibalalika, hawele ndo Diboni na Bamoti-baali na Beti-baali-meoni
18 na Yahasa na Kedemoti na Mefaati
19 na Kiliataimu na Sibuma na Seleti-shahali, ako kuchidunda chido chiwele kuli ibindi
20 na Beti-peoli na kuli viduliko vya vidunda vya Pisiga na Beti-yeshimoti,
21 mina ndo miji jeng'ha ja kuli ibalalika na isi yeng'ha ya mndewa Sihoni wa Waamoli, yawele yalongoze ako Heshiboni. Musa nayali yamsumile ayo Sihoni hamwe na vilongozi wanji wawele hali ulongozi wa heye, vilongozi wa Midiani nawali Evi na Lekemu na Suli na Huli na Leba, ndo nawalongoze isi yila.
22 Waisilaeli kahi nawamkopola Balaamu, mwana wa Beoli, nayawele mlaguzi.
23 Kuli mbaka wa isi ya nhanzi ya Lubeni ubanzi wa kolizinjilaga isanya, nakwali lwanda lwa Yolodani. Miji na vijiji avyo ndo uhalizi wowagawilwe wanhu wa nhanzi ya Lubeni, kota vyoziwele ng'holo za hewo.
24 Musa nakawapa uhalizi wa isi wanhu wa nhanzi ya Gadi kota vyoziwele ng'holo za hewo.
25 Honhu aho nahali Yaseli na miji jeng'ha ja Gileadi na nusu ya isi ya Waamoni mbaka Aloeli iwele kolilawilaga isanya mwa Laba,
26 na kwaluchila Heshiboni mbaka Lamati-misipa na Betonimu na kulawa Mahanaimu kuli mbaka wa Debili,
27 na miji jiwele kuli ibindi lya Beti-halamu na Beti-nimula na Sukoti na Safoni na isi yeng'ha iponile ya mndewa Sihoni wa Heshiboni. Honhu aho nahali ubanzi wa kolilawilaga isanya mwa lwanda lwa Yolodani hawele habakane na ubanzi wa kusini mwa bahali ya Kineleti.
28 Miji na vijiji avyo ndo navyowapegwe wanhu wa nhanzi ya Gadi viwe vya hewo kota vyoziwele ng'holo za hewo.
29 Kahi Musa nakawapa uhalizi wa isi nusu ya nhanzi ya Manase kota vyoziwele ng'holo za hewo.
30 Honhu aho nahali kwaluchila Mahanaimu na isi yeng'ha iwele ya mndewa Ogu ako Bashani, hamwe na miji makumi sita ja Yaili
31 na nusu ya Gileadi na Ashitaloti na Edileyi, najali miji jiwele hasi ha chilongozi yumwe wa mndewa Ogu wa Bashani. Honhu aho nawapegwa nusu ya walelwa wa Makili mwana wa Manase, kota vyoziwele ng'holo za hewo.
32 Awu ndo uhalizi uwele Musa nayaugawile kuli isi za mibalalika ja Moabu, kumwambu mwa lwanda lwa Yolodani na Yeliko kuli ubanzi wa kolilawilaga isanya.
33 Ila Musa haipele nhanzi ya Lawi honhu ha isi hawe ha hewo, mina nakawalonjela kota uhalizi wa hewo ndo Mkulu Nguluwi, Nguluwi wa Isilaeli.