17
Isi ya nhanzi ya Manase ako kolizinjilaga isanya
Wanhu wa nhanzi ya Manase, Manase yawele ndo mlelwa wa mwaluko kwa Yusufu, nawo nawapegwa honhu ha hewo. Makili mlelwa wa mwaluko wa Manase na nayali mhaza wa Gileadi. Makili nakapegwa miji ja Gileadi na Bashani, mina nayali muwanzi wa kitowa ngondo. Wanji wasigale wa nhanzi ya Manase nawapegwa honhu ha hewo kota vyoziwele ng'holo za hewo. Ng'holo azo nazali zila za Abieseli na Heleki na Asilieli na Shekemu na Hefeli na Shemida, awo weng'ha nawali walelwa walume wa Manase mwana wa Yusufu.
Ila Selofehadi mwana wa Hefeli, mwana wa Gileadi, mwana wa Makili, mwana wa Manase, hawele na wana walume, ila nayali na wahinza yeka, nawo nawali Mahila na Noa na Hogula na Milika na Tilisa. Wahinza awo nawamuyila mtambika Eleasali na Yoshua mwana wa Nuni na vilongozi wayage, nawawalonjela, “Mkulu Nguluwi nakamlonjela Musa yatugawile kwa hetwe isi iwe ya hetwe kota vyowalinguwagawila walume wa nhanzi ya hetwe.” Lelo kwa malajizo ga Mkulu Nguluwi, Yoshua nakawapa honhu ha hewo kota vyoyawapele walume wa nhanzi ya hewo. Ahyo, nhanzi ya Manase nawapegwa honhu kumi, hamwe na isi ya Gileadi na Bashani iwele ubanzi uyage wa lwanda lwa Yolodani, kwa vila wahinza wa Manase nawagawilwa honhu ha hewo kota vyowagawilwe walume wa nhanzi ya hewo. Isi ya Gileadi nawapegwa walelwa wanji wa Manase.
Mbaka wa nhanzi ya Manase nawaluchila Asheli na kuluta mbaka Mikimetati kolilawilaga isanya mwa Shekemu, hamba mbaka awo naulutilila kusini kuza kuli isi ya wanhu wa Eni-tapua. Isi ya Tapua nayali ya Manase, ila muji wa Tapua uwele kuli mbaka wa Manase, nawali wa walelwa wa Efulaimu. Mbaka awo naulutilila kuli chikolola cha Kana. Miji jiwele kusini mwa Kana, najali ja Waefulaimu hanga ja kuko kuli miji ja Manase. Kahi mbaka naukola kasikazini mwa chikolola na kumalila kuli bahali ya Mediteleniyani. 10 Nhanzi ya Efulaimu nayali ubanzi wa kusini na Manase nayali ubanzi wa kasikazini, mbaka wa hewo nawali bahali ya Mediteleniyani. Isi ya hewo naifika mbaka Asheli ubanzi wa kasikazini na kwenela mbaka Isakali ubanzi wa kolilawilaga isanya. 11 Vivila kuli isi ya nhanzi ya Isakali na nhanzi ya Asheli, nhanzi ya Manase naipegwa miji ja Beti-sheani na Ibuleamu hamwe na vijiji vyake na wanhu wa miji ja Doli na Eni-doli na Taanaki na Megido hamwe na vijiji vyake na kahi imwe ya kadatu ya Nafati. 12 Ila walelwa wa Manase hawawezile kuwawinga wanhu wa miji ajo, lelo Wakanaani nawalutilila kikala amo. 13 Hamba Waisilaeli vyowawele na mong'ho ng'hatu, hawawezile kuwawinga ila nawawadita wawe wakola mijito.
14 Wanhu wa nhanzi ya Yusufu nawamlutila Yoshua, nawamlonjela, “Lekachoni nakutugawila honhu hamwe hela ha isi iwe ya hetwe, hanga Mkulu Nguluwi nakatutambichiza na kutudita tuwe wenji ng'hatu?” 15 Yoshua nakawalonjela, “Wone mwa wenji ahyo na isi ya vidunda vya Efulaimu haihega kwa hemwe kikala aho kahi, lelo mlute kuchihulo kuli isi ya Wapelisi na ya Walefayi, mkateme migodi kwa chiwalo cha kuwika goya honhu ha kikala hemwe.” 16 Nawo nawamlonjela, “Kukomya, isi ayi ya vidunda haihega kwa hetwe, kwa vila Wakanaani weng'ha walingikala kuli ibindi na wala weng'ha walingikala Beti-sheani hamwe na vijiji vyake na wala walingikala kuli ibindi lya Yesileeli, wawele na mituka ja chuma.”
17 Lelo Yoshua nakawalonjela walelwa wa Yusufu, iwele ndo nhanzi ya Efulaimu na Manase, “Kukomya, hemwe muwa wenji na muwele na ludali lukulu. Hainoga mpegwe honhu hamwe hela, 18 ila kahi isi ya vidunda yowa ya hemwe. Hanga sambi ndo chihulo, motema migodi na kuidita iwe ya hemwe, isi yeng'ha kulawila ubanzi awu mbaka uyage. Mowawinga Wakanaani, hanga wana mituka ja chuma na wana ludali.”