23
Ulonzi wa kuduma wa Yoshua
1 Vyojipulute mihela minji, Mkulu Nguluwi nakawapa Waisilaeli kikala goya kulawa kwa wang'honyo wa hewo nzingo zeng'ha. Mhela awo Yoshua nayali sekulu wa miyaka minji.
2 Yoshua nakawachema Waisilaeli weng'ha hamwe na wasekulu na vilongozi na walamuzi na wang'hangala wa hewo, nakawalonjela, “Sambi heni ndiwa sekulu wa miyaka minji.
3 Hemwe mona mbuli zeng'ha ziwele Mkulu Nguluwi, Nguluwi wa hemwe, zoyawaditile wanhu wa isi azi zeng'ha kwa chiwalo cha hemwe. Mkulu Nguluwi, Nguluwi wa hemwe ndo yawatowanile.
4 Isi zeng'ha ziponile kuzisumya na zila ndizisumile ndiwapani ziwe uhalizi wa nhanzi za hemwe, kulawa Yolodani mbaka kuli bahali ya Mediteleniyani, ubanzi wa kolizinjilaga isanya.
5 Mkulu Nguluwi, Nguluwi wa hemwe, kowosa hali hemwe na kuwawinga ng'hatu, namwe moihola isi ya hewo kota vila Mkulu Nguluwi, Nguluwi wa hemwe, vyoyawelahile.
6 Ahyo, muwe mwimile nzinzili ng'hatu kuli kibatilila geng'ha gandichigwe kuli chitabu cha malajizo ga Musa, mleche kugaleka ne hado.
7 Mleche kihanza na wanhu wa isi azo wasigale hali hemwe. Mleche kujichema milungu ja hewo na mleche kilaha kwa matagwa ga milungu ja hewo na mleche kujikolela mijito na kujifugamila.
8 Ila mumibate Mkulu Nguluwi, Nguluwi wa hemwe kota vyomditile mbaka lehano.
9 Mina Mkulu Nguluwi nakaziwinga hali hemwe isi ng'hulu ziwele na mong'ho, kuduhuli munhu yoneche yoweza kuwalemeza hemwe mbaka lehano.
10 Munhu wa hemwe yumwe hela koweza kuwabilimisa wang'honyo elufu, kwa vila Mkulu Nguluwi, Nguluwi wa hemwe kanguwatowanila hemwe kota vyoyelahile.
11 Lelo muwe milolela ng'hatu kuli kumgana Mkulu Nguluwi, Nguluwi wa hemwe.
12 Mina, wone mumleche Nguluwi na kihanza na wanhu wa isi azo wasigale hali hemwe, wone mohesa kwa hewo na hewo wohesa kwa hemwe,
13 mvizele kota Mkulu Nguluwi, Nguluwi wa hemwe, holutilila hebu kuwawinga wanhu wa isi azo hali hemwe, ila gowa ngwamo na idiwa kwa hemwe. Wowa kwa hemwe kota ng'weso ya kuwazapilani na miwa ja kuwahoma mmeho mbaka aho homuwifigwa kulawa kuli isi ayi inojile iwele Mkulu Nguluwi, Nguluwi wa hemwe, kawapani.
14 “Sambi, mhela wa heni wa kubagama kota vyoiwele kwa wanhu wa isi yeng'ha, wa habehi. Ila hemwe mweng'ha mvizela ng'hatu mnhumbula za hemwe na kuli muhe wa hemwe kota kuli kulagana kweng'ha kunojile kuwele Mkulu Nguluwi, Nguluwi wa hemwe nakawalahila, kuduhuli ne limwe liwele halyenele. Geng'ha genela kota vila vyoyelahile.
15 Ila wone kota vila Mkulu Nguluwi, Nguluwi wa hemwe, vyoyeneze kulagana kweng'ha kunojile koyawalonjele, baho du koweza kuwegalilani gehile geng'ha mbaka yawadumye weng'ha kulawa kuli isi ayi inojile yawapele.
16 Wone mobena ilagano lya Mkulu Nguluwi, Nguluwi wa hemwe, lyoyawalajize mlibate, wone moluta kujikolela mijito milungu jinji na kujifugamila, lelo ng'halazi ya Mkulu Nguluwi yokwaka hali hemwe, namwe modumigwa himahima kulawa kuli isi ayi inojile yawapele.”