5
1 Wandewa weng'ha wa Amoli wawele wochikala hafungo mwa kolizinjilaga isanya mwa Yolodani na wandewa weng'ha wa Wakanaani wawele habehi na bahali ya Mediteleniyani, lowahuliche kota Mkulu Nguluwi nakakaza mazi ga lwanda lwa Yolodani kwa chiwalo cha Waisilaeli mbaka howalochile, nawatweguka, nawali walihela nhumbula zikangale ne hado kwa kitowa na Waisilaeli.
Kwinjila ikumbi kwa Waisilaeli ako Giligali
2 Mhela awo, Mkulu Nguluwi nakamlonjela Yoshua, “Ugongomanye vilimbo vya maganga leka waluche kahi chihendo cha kuwenjiza ikumbi Waisilaeli.”
3 Lelo Yoshua nakagongomanya vilimbo avyo vya maganga na kuwenjiza ikumbi Waisilaeli ako Gibeati-haalaloti.
4 Chiwalo cha Yoshua kuwenjiza ikumbi Waisilaeli ndo achi, Waisilaeli weng'ha walume walawile Misili wawele wawezile kuluta kuli kitowa ngondo, weng'ha nawabagama kuli majendo kuchiwala lowalawile Misili.
5 Awo weng'ha walawile Misili nawali wenjile ikumbi, ila wala weng'ha wapondigwe mmajendo ako kuchiwala woyile kulawa Misili, nawali wang'hali kwinjila ikumbi.
6 Waisilaeli nawaluka majendo kwa mhela wa miyaka makumi gane kuchiwala na walume weng'ha wawele wawezile kuluta kuli kitowa ngondo, nawabagama kwa vila hawachihulichize choyalonjile Mkulu Nguluwi. Mkulu Nguluwi nayali yawalahile wanhu awo kota hawoyona isi ayo iwele na mboto nakawalahila wasekulu wa hewo kota kowapa lulelo lwa hewo.
7 Ahyo, nawali wana wa wanhu awo wawele Mkulu Nguluwi nayali yowalolela wakule honhu ha hewo, awo ndo Yoshua yawenjize ikumbi, kwa vila nawali hawenjile ikumbi mhela wula wonawali mmajendo kuchiwala.
8 Walume wa nhanzi zeng'ha lowenjile ikumbi, wanhu weng'ha nawekala hali honhu ha hewo ako kuli kambi mbaka vyowaponile.
9 Hamba Mkulu Nguluwi nakamlonjela Yoshua, “Lehano ndiwoselani yila soni ya Misili.” Ahyo honhu aho hanguchemigwa Giligali mbaka lehano.
10 Waisilaeli vyowawele wawichile kambi ako Giligali, nawadita mnvina ya Pasaka matinazo kuli zuwa lya kumi na zine lya mwezi kuli ibalalika lya Yeliko.
11 Zuwa lila loimalile mnvina ya Pasaka, nawalya mibumunda johajiwichigwe usaso na nyhule zikalanjigwe kulawa kuli mbena za isi ayo.
12 Lelo kulawila zuwa alyo Waisilaeli hawadile mana kahi. Kwaluchila mhela awo Waisilaeli nawalya mbena za isi ya Kanaani.
Yoshua na chilongozi wa wamizi wa Mkulu Nguluwi
13 Zuwa limwe Yoshua vyoyawele habehi na muji wa Yeliko, baho du nakamona munhu yumwe yemile kumwando kwa heye yawele na ipanga mmoko mwa heye. Yoshua nakamlutila, nakamuuza, “Ndaze, hegwe kwa myetu ama kwa mng'honyo wa hetwe?”
14 Heye nakamlonjela, “Hebu, heni nda chilongozi wa wamizi wa Mkulu Nguluwi, sambi mbuya.” Yoshua nakenamiza hasi na kumfugamila, hamba nakamuuza, “Mkulu wa heni, kwangugana heni chitumagwa wa hegwe ndite choni?”
15 Ayo chilongozi wa wamizi wa Mkulu Nguluwi nakamlonjela, “Uvule makwamba ga hegwe, mina honhu howimile ndo helile.” Yoshua nakadita ahyo.