☰ 1 Wandewa 11
11
Solomoni kangumbelenhuka Nguluwi
1 Mndewa Solomoni nakawagana lukami wadala wa chijenzi. Mhinza wa Falao na wadala wa Wamoabu na Waamoni na Waedomu na Wasidoni na Wahiti. 2 Wadala awa nawalawa kuli wanhu wa isi iwele Mkulu Nguluwi nayali yawalonjele Waisilaeli, “Mleche kuhola wadala kulawa kwa hewo nawo waleche kuhola kwa hemwe, kwa vila wadala awo wogalula nhumbula za hemwe kwa milungu ja hewo.” Ila Solomoni nakalutilila kuwagana. 3 Mndewa Solomoni nayali na wache miya saba, weng'ha nawali wahinza wa wandewa na waha miya zidatu. Wadala awo nawamwajiliza. 4 Mndewa Solomoni vyoyawele yolutilila kuwa sekulu, wache wa heye nawagalula nhumbula ya heye na kulutila kuli milungu, hawele wa kukundigwa kwa Mkulu Nguluwi, Nguluwi wa heye kota vyoiwele nhumbula ya Daudi, mhaza wa heye. 5 Solomoni nakamfugamila Ashitaloti, mlungu wa chidala wa Wasidoni na Milikomu, yawele nayali izudizo lya Waamoni. 6 Ahyo, Solomoni nakadita wihe hali Mkulu Nguluwi, hamuwinzile goya Mkulu Nguluwi kota vyoyaditile Daudi, mhaza wa heye. 7 Mchanya mwa chidunda chiwele kolilawilaga isanya mwa Yelusalemu, Solomoni nakazenga honhu ha kufugamila kwa chiwalo cha Kemoshi, izudizo lya Wamoabu na kwa mlungu Moleki, izudizo lya Waamoni. 8 Nakadita hihyo kwa wache wa heye wa chijenzi weng'ha, wawele nawafunyiza ubani na kulavya nhambiko kwa milungu ja hewo.
9 Lelo, Mkulu Nguluwi, Nguluwi wa Isilaeli, nakamzudila Solomoni, kwa vila nayali yamlechile Mkulu Nguluwi, Nguluwi wa Isilaeli, hanga nayali yamlawile mala mbili. 10 Hanga nayali yamlemeze Solomoni yaleche kujiwinza milungu, ila Solomoni hauhulichize mzilo wa Mkulu Nguluwi. 11 Ahyo Mkulu Nguluwi nakamlonjela Solomoni, “Kwa vila ahi ndo vyouwele na nakulema kibatilila ilagano lya heni na malajizo ga heni, ndikomya ndokusukula awo undewa wa hegwe na kumha yumwe wa wawele hali ulongozi wa hegwe. 12 Ila, kwa chiwalo cha Daudi, mhaza wa hegwe, sidita mbuli ayi mhela wa ukomu wa hegwe, ila ndowusa undewa awo kulawa kwa mwanago. 13 Ila siuhola undewa weng'ha kulawa kwa heye, ila ndomha mwanago nhanzi imwe kwa chiwalo cha Daudi, chitumagwa wa heni na kwa chiwalo cha Yelusalemu, muji uwele nandiuhagula.”
Wang'honyo wa Solomoni
14 Hamba Mkulu Nguluwi nakamdita Hadadi wa lukolo lwa mndewa wa Edomu, yawe mng'honyo wa Solomoni. 15 Aho hamwande, mhela Daudi loyawele yochitowa na Waedomu, Yoabu mkulu wa wamizi wa Daudi, nayali yalutile kuwatila Waisilaeli wakopoligwe, loyawele ako nakawakopola walume weng'ha wawele nawali ako Edomu. 16 Yoabu na Waisilaeli weng'ha nawekala ako kwa myezi sita mbaka lowasindile kuwadumya walume weng'ha wa ako Edomu. 17 Ila Hadadi, yawele nayali msongolo lukami, nakabilimila Misili na wamwe wa Waedomu wawele nawali vitumagwa wa mhaza wa heye. 18 Hadadi na wayage nawaluka majendo kulawa Midiani nawaluta Palani. Nawawahola walume wamwe kulawa Palani, nawaluta nawo mbaka Misili, kwa Falao mndewa wa Misili, yawele nayali yampele Hadadi ng'handa na isi na chilyo. 19 Falao nakanojezwa ng'hatu na Hadadi mbaka nakamha mlamugwe, yawele ndo mdodo wa mche wake, leka yaholeche na Hadadi. Mche wa Falao nayali yochemigwa Tapenesi. 20 Mdodo wa Tapenesi nakampondela Hadadi mwana yachemigwe Genubati. Genubati nakalolelwa na Tapenesi kuli ng'handa ya chiundewa ya Falao. Nakekala ako hamwe na wana wa Falao. 21 Ila Hadadi loyawele Misili na loyahuliche kota Daudi na Yoabu nawali wabagame, nakamlonjela Falao, “Ung'hundize ndute kuli isi ya heni.” 22 Falao nakamuuza, “Kwahela choni aha mbaka kwangugana kuhiluka kuli isi ya hegwe?” Hadadi nakamwidichila, “Haduhu, ila ung'hundize ndute.”
23 Nguluwi nakamwinula mng'honyo yunji wa Solomoni, Lesoni mwana wa Eliyada, yawele nayali yambilime mkulu wa heye, mndewa Hadadeseli wa Soba. 24 Daudi loyasindile kukopola ako Soba, Lesoni nakakungajiza na kwaluchiza chilundo cha walinguboka, heye Lesoni nakawa chilongozi wa hewo. Lelo, nawaluta Damasiko na kikala ako na kumdita Lesoni yawe mndewa wa Damasiko. 25 Lesoni nayali mng'honyo wa Isilaeli kuli mhela weng'ha wa ulongozi wa Solomoni, nakamtunya ng'hatu Solomoni kota Hadadi vyoyamtunyile. Lelo, Lesoni nakailongoza Alamu na nayali mng'honyo wa Isilaeli.
Kubelenhuka kwa Yeloboamu
26 Yeloboamu mwana wa Nebati, Mwefulaimu wa Seleda, chitumagwa wa Solomoni, yawele mayake yafililwe na mlume wa heye, nayali yochemigwa Seluwa, nakambelenhuka mndewa. 27 Achi ndo chiwalo cha kubelenhuka ako. Mndewa Solomoni nayali yazenjile Milo na nayali yadinyile honhu hawele mwanzi kuli lukanzi lwa muji wa Daudi, mhaza wa heye. 28 Lelo, Yeloboamu nayali yazidahe ng'hatu. Solomoni vyoyamonile msongolo ayo vyoyalingukola mijito ja heye, nakamhagula yawe chilongozi wa mijito ja heye ja kukola lupichi kuli ng'handa ya Yusufu. 29 Zuwa limwe, Yeloboamu loyawele kuli majendo kulawa Yelusalemu, mloli Ahiya wa Shilo naketing'hana na heye mnzila, kuno Ahiya yavalile ikanzu linyale. Weng'ha awa weli nawali waliyeka kuli migunda, 30 baho du, Ahiya nakalivula ivalo lya heye linyale, nakalidega kuli vihande kumi na vili. 31 Hamba nakamlonjela Yeloboamu, “Uhole vihande kumi kwa chiwalo cha hegwe, kwa vila Mkulu Nguluwi, Nguluwi wa Isilaeli kangulonga hino, ‘Ulole, ndahabehi kuudega undewa na kuwusa mmoko mwa Solomoni na kukupa hegwe nhanzi kumi.’ 32 Ila kwa chiwalo cha chitumagwa wa heni Daudi na muji wa Yelusalemu, muji uwele nandiuhagula hali nhanzi zeng'ha za Isilaeli, kowa na nhanzi imwe. 33 Ndodita ahyo kwa vila Solomoni nakandeka, nakajifugamila milungu ja chijenzi. Ashitaloti mlungu wa chidala wa Wasidoni na Kemoshi, mlungu wa Wamoabu na Milikomu, mlungu wa Waamoni. Halutile kuli nzila za heni leka kudita gagoloche hali heni ne kibatilila mizilo na malajizo ga heni kota Daudi, mhaza wa heye, vyoyaditile. 34 Ila siwusa undewa weng'ha kulawa mmoko mwa Solomoni, nandimdita yawe chilongozi mazuwa geng'ha ga kikala kwa heye kwa chiwalo cha Daudi, chitumagwa wa heni, yondimhagule na yawele nakabatilila malajizo na mizilo ja heni. 35 Ndowusa undewa kulawa mmoko mwa mwanage na kukupa hegwe nhanzi kumi. 36 Ndomha mwanage nhanzi imwe leka Daudi, chitumagwa wa heni yawe na lulelo lulingulongoza mazuwa gose kuli Yelusalemu, muji uwele nandiuhagula leka kuliwika itagwa lya heni. 37 Ila, kuwala hegwe Yeloboamu, ndokudita uwe mndewa wa Isilaeli na kolongoza kota vyoulingugana. 38 Wone kodita chila chinhu chondikulajiza na kuluta kuli nzila za heni na kudita gawele ga hachi hali heni kwa kibatilila mizilo ja heni na malajizo ga heni kota vyoyaditile Daudi, chitumagwa wa heni, ndowa hamwe na hegwe. Ndoudita undewa wa hegwe wime nzinzili kota vyondiuditile undewa wa Daudi na ndokupa isi ya Isilaeli. 39 Ndowagaza walelwa wa Daudi kwa chiwalo cha gehile ga Solomoni, ila haiwele mazuwa gose.”
40 Kwa chiwalo acho, Solomoni nakajeza kumkopola Yeloboamu, ila Yeloboamu nakabilimila Misili kwa Shishaki, mndewa wa Misili, nakekala ako mbaka Solomoni loyabagame.
Kubagama kwa Solomoni
(2 Mihela 9:29-31)
41 Mbuli zinji za Solomoni na geng'ha goyaditile na luhala lwa heye, nagandichigwa kuli chitabu cha madito ga Solomoni. 42 Solomoni nakailongoza isi yeng'ha ya Isilaeli kwa mhela wa miyaka makumi gane, yawele Yelusalemu. 43 Hamba Solomoni nakabagama, nakatiligwa Yelusalemu, muji wa Daudi, mhaza wa heye. Lehoboamu, mwana wa Solomoni, nakalongoza honhu ha heye.
☰