16
1 Aho ndo ulonzi wa Mkulu Nguluwi naumuyila Yehu, mwana wa Hanani, kumuwala Baasha.
2 “Nandikwinula hegwe Baasha kulawa kuli nhimbwisi na kukudita uwe chilongozi wa wanhu wa heni Isilaeli, ila nakuwinza nzila za Yeloboamu na kuwambuza wanhu wa heni Isilaeli kudita gehile na kunzudiza kwa gehile ga hewo.
3 Lelo, ndokudumya hegwe Baasha hamwe na ivyazi lya hegwe na ndoliditila ivyazi lya hegwe kota vyondiliditile ivyazi lya Yeloboamu na Nebati, mwanage.
4 Mibwa jowalya wanhu wa hegwe wawele wobagama kuli muji na videje vyowa na chilyo kulawa kwa wala wawele wobagama kuli migunda.”
5 Madito ganji ga Baasha na ludali lwa heye, nagandichigwa kuli chitabu cha kukumbuchila kwa wandewa wa Isilaeli.
6 Hamba Baasha nakabagama, nakatiligwa ako Tilisa. Ela, mwanage nakalongoza honhu hake.
7 Mzidi wa ago, ulonzi wa Mkulu Nguluwi nawuya kukolela mloli Yehu, kwa Baasha hamwe na ivyazi lya heye, kwa chiwalo cha wihe weng'ha woyauditile hali Mkulu Nguluwi. Baasha nakamzudiza Mkulu Nguluwi kwa kudita kota Yeloboamu na kahi kwa kulidumya ivyazi lya Yeloboamu.
Ela kangulongoza Isilaeli
8 Kuli mwaka wa makumi meli na sita wa ulongozi wa Asa mndewa wa Yuda, Ela mwana wa Baasha, nakawa mndewa wa Isilaeli. Naye nakalongoza ako Tilisa kwa miyaka mili.
9 Simuli, yumwe wa vitumagwa wa heye, yawele nayali chilongozi wa nusu ya mituka ja heye ja ngondo, nayali yochijesa kumditila vibi Ela. Mhela awo Ela nayali Tilisa yogala kuli ng'handa ya Alisa, munhu yawele nayali mkulu wa ng'handa ya chiundewa ako Tilisa,
10 lelo Simuli nakenjila mgati, nakamtowa na kumkopola. Hamba nakalongoza honhu ha heye. Nawali mwaka wa makumi meli na saba wa ulongozi wa Asa, mndewa wa Yuda.
11 Simuli loyaluche kulongoza, nakawakopola wanhu weng'ha wa ivyazi lya Baasha, hamlechile mlume ne yumwe wa ivyazi lya heye ne yula wa goloko wa heye.
12 Ahyo Simuli nakalidumya ivyazi lyeng'ha lya Baasha kwa kiwhana na ulonzi wa Mkulu Nguluwi ulonjigwe kukolela mloli Yehu.
13 Mbuli azi nazikoleka kwa chiwalo cha gehile goyaditile Baasha na Ela, mwanage. Nawamzudiza Mkulu Nguluwi, Nguluwi wa Isilaeli, kwa kudita gehile na kuwambuza wanhu wa Isilaeli wadite gehile kwa jimalukolo ja milungu ja hewo.
14 Madito ganji ga Ela, nagandichigwa kuli chitabu cha kukumbuchila kwa wandewa wa Isilaeli.
Simuli kangulongoza Isilaeli
15 Kuli mwaka wa makumi meli na saba wa ulongozi wa Asa, mndewa wa Yuda, Simuli nakalongoza ako Tilisa kwa mhela wa mazuwa saba. Wamizi nawali wawichile kambi ya hewo habehi na Gibetoni, muji wa Wafilisti.
16 Lowahuliche kota Simuli nayali yamditile mndewa mbuli yihile na kumkopola, zuwa lilyo kuno wawele kuko kuli kambi, nawamuwika Omuli, mkulu wa wamizi leka yawe mndewa wa Isilaeli.
17 Aho ndo Omuli na Waisilaeli weng'ha wawele hamwe na heye nawoka Gibetoni na kuuzunguluta muji wa Tilisa.
18 Simuli loyonile kota muji nauzungulutwa, nakenjila kuli ngome ya ng'handa ya chiundewa na nakailakaza kwa chiluli na kidumya yuye mumo mgati.
19 Mbuli ayi naikoleka kwa chiwalo cha gehile goyaditile hali Mkulu Nguluwi, nakadita kota vyoyaditile Yeloboamu na kuwambuza wanhu wa Isilaeli wadite gehile.
20 Madito ganji ga Simuli na kubelenhuka koyakuditile, nagandichigwa kuli chitabu cha kukumbuchila kwa wandewa wa Isilaeli.
Omuli kangulongoza Isilaeli
21 Lelo, wanhu wa Isilaeli nawebagula vilundo vili. Chilundo chimwe nachilumba na Tibuni, mwana wa Ginati, leka yawe mndewa na chilundo cha keli nachilumba na Omuli.
22 Hamba wanhu wa chilundo chilumbile na Omuli nachali na mong'ho kusinda chila chilumbile na Tibuni, mwana wa Ginati. Ahyo Tibuni nakabagama, Omuli nakawa mndewa.
23 Kuli mwaka wa makumi gadatu na umwe wa ulongozi wa Asa, mndewa wa Yuda, Omuli nakawa mndewa wa Isilaeli, naye nakalongoza kwa mhela wa miyaka kumi na mili, miyaka sita ja mwaluko kuli ajo kumi na mili, nakalongoza Tilisa.
24 Nakagula chidunda cha Samaliya kwa kilo makumi saba za sendi kulawa kwa munhu yumwe yalinguchemigwa Shemeli. Nakazenga muji mchanya mwa chidunda acho. Muji awo nakauchema Samaliya kwa kiwhana na Shemeli, itagwa lya munhu wa mwaluko yawele na chidunda acho.
25 Omuli nakadita gehile hali Mkulu Nguluwi, nakadita gehile ng'hatu kupuluta wala wamlongole.
26 Nakawinza nzila zeng'ha za Yeloboamu, mwana wa Nebati na kuli gehile ga heye, gawele nakawambuza Waisilaeli wadite. Ahyo, nawamzudiza Mkulu Nguluwi, Nguluwi wa Isilaeli kwa kujifugamila jimalukolo ja milungu.
27 Madito ganji ga Omuli na ludali lwa heye, nagandichigwa kuli chitabu cha kukumbuchila kwa wandewa wa Isilaeli.
28 Hamba Omuli nakabagama na kutiligwa ako Samaliya. Ahabu, mwanage nakalongoza honhu ha heye.
Ahabu kangulongoza Isilaeli
29 Kuli mwaka wa makumi gadatu na nane wa ulongozi wa Asa, mndewa wa Yuda, Ahabu mwana wa Omuli nakawa mndewa wa Isilaeli. Naye nakalongoza ako Isilaeli kuno yawele Samaliya kwa mhela wa miyaka makumi meli na mili.
30 Ahabu nakadita gehile hali Mkulu Nguluwi kusinda wandewa weng'ha wamlongole.
31 Hanga nayali yawinzile nzila za Yeloboamu, mwana wa Nebati, Ahabu nakadita wihe ng'hatu kwa kumhesa Yesebeli, mhinza wa Etibaali, mndewa wa Wasidoni. Naye nakaluka kumkolela mijito na kumfugamila Baali.
32 Nakazenga honhu ha kulavila nhambiko na ng'handa kwa chiwalo cha Baali, yila yaizenjile ako Samaliya.
33 Ahabu kahi nakazenga izengo lya Ashela na kudita mbuli nyinji za kumzudiza Mkulu Nguluwi, Nguluwi wa Isilaeli, kusinda vyowaditile wandewa weng'ha wawele nawamlongola.
34 Kuli mhela wa ulongozi wa Ahabu, Hieli Mbeteli, nakaizenga kahi Yeliko. Kota ulonzi wa Mkulu Nguluwi vyoulonjile kwa kukolela Yoshua, mwana wa Nuni, Abilamu mwana wa mwaluko wa Hieli, nakabagama mhela wa kwaluchiza misisi ja muji wa Yeliko. Hamba Segubu, mwana mdodo wa Hieli, nakabagama kahi mhela wa kuwika lwizi lwa muji awo.