6
Solomoni kanguzenga ng'handa ya Nguluwi
(2 Mihela 3)
1 Kuli mwaka wa miya zine na makumi nane kulawa Waisilaeli lowalawile kuli isi ya Misili, kuli mwaka wa kane wa ulongozi wa mndewa Solomoni kuli Isilaeli, kuli mwezi wa Sifu, uwele ndo mwezi wa keli, Solomoni nakaluka kuzenga ng'handa ya Mkulu Nguluwi.
2 Ng'handa ayo iwele mndewa Solomoni nakazenga kwa chiwalo cha Mkulu Nguluwi, nayali na ulefu wa mita makumi meli na saba na ugazi wa mita tisa na wimo wa mita kumi na zidatu na nusu kuluta kuchanya.
3 Chituka cha kumwando nachali na ulefu wa mita tisa, kwa kiwhana na ugazi wa ng'handa ya Nguluwi na honhu halawilile kumwando kwa ng'handa ayo nahali na ulefu wa mita zine na nusu.
4 Nakaiwichila mitubuli migazi kwa mgati na mizisili kwa kunze.
5 Nakagongomanya vihengo vya hafungo kuizunguluta ng'handa ya Nguluwi yeng'ha kwa wimo wa milingo jidatu kuluta kuchanya, vihengo avyo navibatililwa na ng'hanzi za ng'handa na za honhu helile.
6 Ilingo lya hasi nalyali na ugazi wa mita mbili na lobo na ilingo liyage nalyali na ugazi wa mita mbili na lobo zidatu na ilingo lya mchanya ng'hatu nalyali na ugazi wa mita zidatu. Milingo ajo najali jilivinji kwa ugazi, kwa vila Solomoni nayali yapunguze lukanzi lwa kunze kuzunguluta ng'handa, leka boliti za kwegamila ng'handa vibatane na lukanzi.
7 Mhela wa kuzenga ng'handa ya Nguluwi, maganga gahongoligwe hela ndo nagakola mijito ajo, hakuwele na nyundo ne liwago ama chinhu choneche cha chuma chiwele nachihulikwa kuli honhu aho ha kuzenga ng'handa ya Nguluwi.
8 Lwizi lwa kwinjilila kuli ilingo lya hasi nalwali ubanzi wa kusini mwa ng'handa ya Nguluwi, chikwinilo nachiluta kuli ilingo lya hagati na kulawa aho nachiluta mbaka kuli ilingo lya kadatu.
9 Ahyo, Solomoni nakazenga ng'handa, naimala. Chinduwiko cha ng'handa nachali chigongomanyigwe kwa boliti na mbawo za mielezi.
10 Mndewa Solomoni nakazenga vihengo kuizunguluta ng'handa ya Nguluwi yeng'ha. Wimo wa chila chihengo nawali mita mbili na lobo na navyali vilumbile na ng'handa kwa boliti za mielezi.
11 Mhela awo, ulonzi wa Mkulu Nguluwi naumuyila Solomoni,
12 “Kuwala ng'handa ayi youlinguzenga, wone kowinza mzilo wa heni na kibatilila malajizo ga heni na malanguso ga heni, kwa kukolela hegwe ndokweneza kulagana kwa heni kondilagane na mhaza wa hegwe, Daudi.
13 Ndochikala hali Isilaeli na siwaleka wanhu wa heni, Isilaeli.”
14 Ahyo, Solomoni nakazenga ng'handa ya Nguluwi na kusinda.
Vinoligo vya ng'handa ya Nguluwi
15 Nakazigubika ng'hanzi zake za mgati kwa mbawo za mielezi, nakaziwika kuli ng'hanzi kulawa hasi ha ng'handa mbaka kuli chinduwiko na kuhagubika hasi ha ng'handa ya Nguluwi kwa mbawo za mibeloshi.
16 Chihengo cha mgati chilinguchemigwa honhu helile, nachizenjigwa kuli honhu ha kumbele ha ng'handa. Nachali chizenjigwe kwa mbawo za mielezi kulawa hasi mbaka kuli chinduwiko na ulefu wake nawali mita tisa.
17 Chihengo chikulu chiwele kumwando kwa honhu helile, nachali na ulefu wa mita kumi na nane.
18 Ng'handa ya Nguluwi kwa mgati nayali inoligwe kwa kiwhana na mayungu na uluwa ubawule. Chila chinhu nachali cha mielezi, hakuwele na iganga liwele nalyoneka.
19 Mgati mwa ng'handa ya Nguluwi nakagongomanya honhu helile ha mgati, kwa chiwalo cha kuliwika isanduku lya Ilagano lya Mkulu Nguluwi.
20 Honhu helile ha mgati nahali na ugazi wa mita tisa na ulefu wa mita tisa na wimo wa mita tisa. Honhu aho nahali hagubikwe kwa zahabu inojile na nakagongomanya honhu ha kulavila nhambiko kwa mbawo za migodi ja mielezi na kuhagubika kahi kwa zahabu inojile.
21 Solomoni nakahagubika honhu ha mgati ha ng'handa ya Nguluwi kwa zahabu inojile na nakawika migasi ja zahabu kulawa ubanzi umwe mbaka uyage uwele kumwando mwa honhu helile, hawele nahagubikwa kwa zahabu.
22 Ng'handa yeng'ha nakaigubika kwa zahabu inojile na honhu ha kulavila nhambiko kuli honhu helile kahi nakahagubika kwa zahabu inojile.
23 Hali honhu helile nakavigongomanya vilumbigwe vili viwele na mabawa kwa mbawo za mizeituni, chila chilumbigwe nachali na wimo wa mita zine na nusu.
24 Kuli chila ibawa lya chilumbigwe chiwele na mabawa, nalyali na ulefu wa mita mbili na lobo, lelo ulefu kulawa kuli kuduma kwa ibawa limwe mbaka kuduma kwa ibawa liyage nawali mita zine na nusu.
25 Chilumbigwe chiyage chiwele na mabawa nachali na ulefu wa mita zine na nusu, vilumbigwe vyeng'ha vili navyali na vipimilo vivila na ukulu wuwula.
26 Wimo wa chila chilumbigwe chiwele na mabawa nawali mita zine na nusu.
27 Nakaviwika vilumbigwe avyo viwele na mabawa mgati mwa honhu helile ha ng'handa ya Nguluwi, mabawa ga vilumbigwe avyo nagali gagonzoligwe. Ibawa lya chilumbigwe chimwe nalyali lidoliza lukanzi lumwe, kuno ibawa lya chilumbigwe chiyage nalidoliza lukanzi luyage na mabawa ganji ga vilumbigwe avyo nagating'hana na kidoliza hagati ha chihengo.
28 Nakavigubika kwa zahabu vila vilumbigwe viwele na mabawa.
29 Mchanya mwa chila lukanzi lwa ng'handa ya Nguluwi nakunoligwa kwa kuhongoligwa vilumbigwe viwele na mabawa na migodi ja michikichi na uluwa ulingubawula.
30 Hanyi ha vihengo vyeng'ha vya mgati na vya kunze mwa ng'handa ya Nguluwi, nakahagubika kwa zahabu.
31 Hali honhu ha kwinjilila kuli chihengo cha mgati ng'hatu, nakagongomanya lwizi mili ja mbawo za mizeituni jiwele na wimo na fulemu zilingoneka ziwele na nzingo zihano.
32 Kuli lwizi ja mbawo za mizeituni nakanoliga kwa kuhongola vilumbigwe viwele na mabawa na migodi ja michikichi na uluwa ulingubawula, hamba nakagubika vinoligo avyo kwa zahabu.
33 Nakagongomanya kahi fulemu ziwele na nzingo zine kwa migodi ja mizeituni, kwa chiwalo cha lwizi mili ja chihengo chikulu.
34 Nakwali na lwizi jilinguweza kigonzola jigongomanyigwe kwa mbawo za mibeloshi na chila lwizi nalwali na bawaba zilinguweza kibina kuli chila ubanzi mchanya mwa lwizi luyage.
35 Kuli lwizi ajo, nakahongola vilumbigwe viwele na mabawa na migodi ja michikichi na uluwa ubawule, nakajinoliga goya kwa zahabu.
36 Nakazenga lugagala lwa mgati, luwele ng'hanzi zake nazali za misitali jidatu ja maganga gahongoligwe na msitali umwe wa boliti za mielezi.
37 Msisi wa ng'handa ya Mkulu Nguluwi nawali uzenjigwe kuli mwaka wa kane na mwezi wa Sifu.
38 Kuli mwaka wa kumi na umwe, mwezi wa Buli, uwele ndo mwezi wa nane, ng'handa ya Nguluwi nayali isindile kuzenjigwa. Nakaizenga ng'handa ayo kwa miyaka saba.