9
Nguluwi kangumlawila Solomoni lwa keli
(2 Mihela 7:11-22)
1 Mndewa Solomoni loyasindile kuzenga ng'handa ya Mkulu Nguluwi na ng'handa ya chiundewa na ng'handa zinji zoyaganile kuzenga,
2 Mkulu Nguluwi nakamlawila kahi Solomoni kota vyoyamlawile kula Gibeoni.
3 Mkulu Nguluwi nakamlonjela, “Nanyhulika kulanda kwa hegwe hali heni, ahyo nandiiwika iwe chiuyeng'ha ng'handa ayi youizenjile kwa kuliwika itagwa lya heni amo mazuwa gose. Meho ga heni na nhumbula ya heni vyowa amo mazuwa gose.
4 Wone nagwe ufugamile heni kwa nhumbula igoloche na kukundigwa kota mhaza wa hegwe Daudi vyoyaditile na kudita geng'ha gondikulajize kwa kibatilila mizilo ja heni na malajizo,
5 ndochidita chigoda cha hegwe cha undewa chiwe nzinzili mchanya mwa Isilaeli mazuwa gose, kota vyondimlonjele Daudi, mhaza wa hegwe, ndilonga, ‘Huweza kuwa ulihela munhu wa kikalisa kuli chigoda cha hegwe cha undewa cha Isilaeli.’
6 Ila houbelenhuka ama wanago howobelenhuka na kuleka kumbinza na kuleka kibatilila mizilo ja heni na malajizo ga heni na wone moluta kujikolela mijito na kujifugamila milungu,
7 lelo, ndowalavya wanhu wa Isilaeli, kulawa kuli isi ayi yondiwapele na ndodita hihyo du kuli ng'handa ayi yondiiwichile chiuyeng'ha kwa chiwalo cha itagwa lya heni. Isilaeli yowa chinhu cha kubezigwa hali wanhu wa isi zeng'ha.
8 Ng'handa ayi yobomoka na kuwa mahame. Chila yalingukola habehi kotinuka na kutigasa mutwi na wouza, ‘Lekachoni Mkulu Nguluwi nakadita ahi kuli isi ayi na kuli ng'handa ayi?’
9 Wanhu wokwidichila, ‘Kwa vila nawamleka Mkulu Nguluwi, Nguluwi wa hewo, yawalavile wasekulu wa hewo kulawa kuli isi ya Misili, lelo nawawa hamwe na milungu kwa kujikolela mijito na kujifugamila. Ahyo Mkulu Nguluwi nakawegalila kubagama aku hali hewo.’ ”
Solomoni kangumha Hilamu miji makumi meli
(2 Mihela 8:1-2)
10 Kuli kuduma kwa miyaka makumi meli, miyaka jiwele Solomoni nakazenga zila ng'handa mbili, ziwele ndo ng'handa ya Mkulu Nguluwi na ng'handa ya chiundewa,
11 mndewa Solomoni nakamha Hilamu, mndewa wa Tilo, miji makumi meli kuli mkowa wa Galilaya, kwa vila ayo Hilamu nayali yampele Solomoni mbawo za migodi ja mielezi na mibeloshi na zahabu kota vyoyaganile.
12 Ila Hilamu vyoyalawile Tilo na kuluta kujona miji ajo joyapegwe na Solomoni, Hilamu nayali hajiganile miji ajo.
13 Lelo, Hilamu nakamuuza Solomoni, “Mng'holozangu, ndo miji jachi aji joumhele?” Acho ndo chiwalo cha kujichema miji ajo Kabuli, itagwa lilinguchemigwa kulawa mhela awo.
14 Hilamu nayali yamgalile mndewa Solomoni zahabu kilo elufu zine na miya imwe.
Mijito jinji ja Solomoni
(2 Mihela 8:3-18)
15 Ahi ndo mndewa Solomoni vyoyawaditile wanhu wakole mijito kwa lupichi kwa chiwalo cha kuzenga ng'handa ya Mkulu Nguluwi na ng'handa ya chiundewa na Milo na lukanzi lwa Yelusalemu na Hasoli na Megido na Geseli.
16 Geseli ndo muji uwele Falao, mndewa wa Misili, nayali yaubochile na kuulakaza kwa chiluli na kuwakopola Wakanaani, wenyeng'haye wake. Hamba mhinza wa Falao loyaholeche na Solomoni, mndewa wa Misili nakamha mhinza wa heye muji awo wa Geseli leka uwe ndolendole ya kuholeka kwa heye.
17 Lelo, Solomoni nakauzenga kahi muji wa Geseli na Beti-holoni ya hasi
18 na muji wa Baalati na Tamali, muji uwele kuli chiwala kuli isi ya Yuda
19 na miji jake jeng'ha ja ng'hano na miji kwa chiwalo cha mituka ja heye na kwa chiwalo cha falasi wa heye na choneche choyaganile kuzenga kuli Yelusalemu na Lebanoni na kuli honhu heng'ha hoyalingulongozwa na mndewa Solomoni.
20 Wanhu weng'ha wasigale hali Waamoli na Wahiti na Wapelisi na Wahivi na Wayebusi, wano weng'ha hawawele Waisilaeli,
21 wawele ndo walelwa wa hewo waponile kuli isi, wawele Waisilaeli nawalemwela kuwakopola weng'ha, Solomoni nakawadita wawe wapogozi, kota vyoiwele kuli mhela wula.
22 Ila hali Waisilaeli, Solomoni hamditile munhu ne yumwe yawe mpogozi. Nawali wamizi na vilongozi wa heye na wakulu wa wamizi wa heye na wakulu wa mituka ja heye ja kubulunwa na wakwina falasi wa heye.
23 Nakwali kahi na wang'hangala walingulolela mijito ja mndewa Solomoni. Wang'hangala miya zihano na makumi gahano nawali wowalolela wanhu walingukola mijito.
24 Ila mhinza wa Falao nakaluta kuli muji wa Daudi na kwinjila kuli ng'handa ya chiundewa, iwele Solomoni nayali yamzenjele. Hamba Solomoni nakazenga Milo.
25 Solomoni nakalavya nhambiko za kulakazwa na nhambiko za kikala goya mala zidatu kwa mwaka, mchanya mwa honhu ha kulavila nhambiko hoyahazenjile kwa chiwalo cha Mkulu Nguluwi, yofunyiza ubani hali Mkulu Nguluwi hamwe na nhambiko azo, ahyo nakasinda kuzenga ng'handa ya Mkulu Nguluwi.
26 Mndewa Solomoni nakagongomanya meli nyinji ako Esioni-gebeli, habehi na Eloti iwele hafungo ha Bahali ya Shamu, kuli isi ya Edomu.
27 Mndewa Hilamu nakawalajiza vitumagwa wa heye, walingwendesa meli wa heye kukola mijito kuli meli azo hamwe na vitumagwa wa mndewa Solomoni.
28 Nawenula majendo mbahali kuluta isi ya Ofili na kigala zahabu kilo elufu kumi na zine kulawa ako, ziwele nawamha mndewa Solomoni.