3
Wamoabu wangubelenhuka
1 Yeholamu, mwana wa Ahabu, nakawa mndewa wa Isilaeli kuli Samaliya, kuli mwaka wa kumi na nane wa ulongozi wa Yehoshafati, mndewa wa Yuda. Nakalongoza kwa miyaka kumi na mili.
2 Yeholamu nakadita gehile hali Mkulu Nguluwi, ila haiwele kota mhaza wa heye na mayake vyowaditile. Nakosa izengo lya Baali liwele nalizenjigwa na mhaza wa heye.
3 Ila halechile gehile kota mndewa Yeloboamu, mwana wa Nebati, yawele nakawambuza Waisilaeli kudita gehile.
4 Lelo Mesha, mndewa wa Moabu, nayali yodima ming'holo milume. Chila mwaka nayali yolavya kodi kwa mndewa wa Isilaeli ming'holo myana lachi imwe na sufu ya ming'holo milume lachi imwe.
5 Ila Ahabu loyabagame ako Isilaeli, mndewa wa Moabu nakambelenhuka mndewa wa Isilaeli.
6 Ahyo mhela awo mndewa Yeholamu nakoka kulawa Samaliya na kukungajiza wamizi weng'ha wa Isilaeli, yawele goya kuluta kitowa ngondo.
7 Nakahilika kahi usenga awu kwa Yehoshafati, mndewa wa Yuda, “Mndewa wa Moabu nakambelenhuka heni. Ndaze, koluta hamwe na heni kitowa na Wamoabu?” Mndewa Yehoshafati nakedichila, “Ndoluta hamwe na hegwe. Heni ndo kota hegwe na wanhu wa heni ndo kota wanhu wa hegwe na falasi wa heni ndo kota falasi wa hegwe.”
8 Yehoshafati nakauza, “Ndaze, towatowa kwa kukolela nzila yachi?” Yeholamu nakedichila, “Kwa kukolela kuli chiwala cha Edomu.”
9 Ahyo Yeholamu, mndewa wa Isilaeli nakoka hamwe na mndewa wa Yuda na mndewa wa Edomu. Lowawele kuli majendo kwa mhela wa mazuwa saba, wamizi nawesilwa mazi kwa chiwalo cha hewo na migongolo ja hewo.
10 Aho mndewa wa Isilaeli nakauza, “Ndaze, Mkulu Nguluwi nakatukungajiza tweng'ha wandewa wadatu leka yatuwiche mmoko mwa mndewa wa Moabu?”
11 Mndewa Yehoshafati nakauza, “Ndaze, haduhu mloli yoneche wa Mkulu Nguluwi hano, leka tumuuze Mkulu Nguluwi kwa kukolela heye?” Chilongozi yumwe wa Yeholamu, mndewa wa Isilaeli, nakedichila, “Elisha, mwana wa Shafati, ka hano. Nayali chitumagwa wa Eliya.”
12 Yehoshafati nakalonga, “Ayo ndo mloli wa kukomya.” Hamba wandewa awo wadatu, wawele ndo mndewa wa Isilaeli na Yehoshafati na mndewa wa Edomu, nawaluta kwa Elisha ako Isilaeli.
13 Elisha nakamuuza mndewa wa Isilaeli, “Ndina choni na hegwe? Ulute kwa waloli wa mhaza wa hegwe na wa mayako.” Mndewa wa Isilaeli nakedichila, “Hebu, kwa vila Mkulu Nguluwi ndo yatuchemile hamwe hetwe wandewa wadatu leka yatuwiche mmoko mwa Wamoabu.”
14 Elisha nakalonga, “Ndangukomya, kota Mkulu Nguluwi Yawele na Mong'ho vyoyalingikala na yondilingumkolela mijito, wone haiwele kwa lutogo lombele nalo kwa goloko wa hegwe Yehoshafati, mndewa wa Yuda, hanji ndahalechile kijesa kuwala hegwe.
15 Ila lelo ngalile yalingutowa ching'weleng'wele.” Nawamigalila yalingutowa ching'weleng'wele. Yula munhu vyoyawele yotowa ching'weleng'wele, mong'ho wa Mkulu Nguluwi naumuyila Elisha,
16 nakalonga, “Mkulu Nguluwi kangulonga hino, ‘Mbawe misimo chila honhu hali ibindi,
17 kwa vila Mkulu Nguluwi kangulonga kota hamuweza kuyona mbeho ne nhonya, ila ibindi ali lyomema mazi, namwe monwa hamwe na misenga ja hemwe na migongolo ja hemwe jinji.’
18 Ila kwa Mkulu Nguluwi mbuli ayi ndo ndodo hela na kowapa ludali lwa kuwasumya wanhu wa Moabu.
19 Mousumya chila muji uwele na ngome na chila muji ukulu. Molitema chila igodi lilingulela mafuza na kudinya nzasa zeng'ha za mazi na kuwifya chila mgunda unojile kwa kuumemeza maganga.”
20 Mitondo lufuku, habehi na mhela wa kulavya nhambiko, mazi nagachililika kulawa ubanzi wa Edomu na kumema hali isi yeng'ha.
21 Wamoabu lowahuliche kota wala wandewa wadatu nawoya kitowa na hewo, wanhu weng'ha wasongolo na wasekulu, wawele na mong'ho wa kuhola vinhu vya kitowela ngondo, nawachemigwa na kuwichigwa goya kuli mbaka kwa chiwalo cha kitowa ngondo.
22 Lowenuche lufuku, isanya nalyali lipulika mchanya mwa ago mazi. Wamoabu wawele kuli ubanzi wa keli nawagona mazi madung'hu kota danda.
23 Wamoabu nawalonga, “Yila ndo danda. Wala wandewa wowa nawetowa na kidumula singo hewo kwa hewo. Lelo tuche kuhola vinhu vya hewo.”
24 Ila Wamoabu lowafichile kuli kambi ya Isilaeli, wanhu wa Isilaeli nawawatowa Wamoabu mbaka nawabilima. Waisilaeli nawaivaba isi na kuwadumula singo Wamoabu.
25 Nawajiwifya miji na chila munhu nakatoza iganga kuli chila mgunda unojile mbaka migunda najigubikwa kwa maganga. Nawazidinya nzasa zeng'ha na kulitema chila igodi lilingulela mafuza. Kili-haleseti ndo muji uliyeka uponile na lukanzi lwake. Ila wanhu wawele na mhembeyo nawauzunguluta na kuutowa kota vyowajiditile miji jiyage.
26 Mndewa wa Moabu loyonile kota ngondo nayali ing'ang'ale, nakawahola wanhu miya saba wawele na mipanga leka wafyele hali wamizi na kumfichila mndewa wa Edomu, ila nawalemwela.
27 Ahyo nakamhola mwanage, mlelwa wa heye wa mwaluko, yawele yahawele mndewa honhu ha heye, nakamlavya leka yawe nhambiko ya kulakazwa mchanya mwa lukanzi lwa muji. Nakwali na ng'halazi ng'hulu kuwala Isilaeli. Ahyo Waisilaeli nawauleka muji awo na kuhiluka kuli isi ya hewo.