Malachi
Chilongole
Chitabu achi china uloli wa Malachi. Itagwa ali Malachi kwa Chiebulaniya lina mana ya “Msenga wa heni.” Kwa chiwalo achi, wasomile wangukunda kota Malachi ndo ulonzi ulinguwala mijito ja munhu honhu ha itagwa. Lyangutumika kulonga kuwala mloli kwa nzila ayo kuli 2:7. Uloli wa kuli chitabu achi nawali kwa chiwalo cha wanhu wa Isilaeli lowahiluche kulawa kuli isi ya chijenzi ako Babuloni na lowasindile kuzenga ng'handa ya Mkulu Nguluwi.
Usenga wa Malachi una kitwanza hali Nguluwi na wanhu wa Isilaeli. Kuli kitwanza ako, Nguluwi kangulajila ndaze Waisilaeli vyohawawele wakukundigwa kwa kudita mbuli kota kwa kulavya nhambiko zihile (1:8) na kuhesa wadala walingujifugamila jimalukolo (2:11). Ila nakwali na Waisilaeli wachefu wawele nawamgalamchila Mkulu Nguluwi kulawa kuli gehile ga hewo. Usenga wa Malachi wangulonga kota zuwa lya utaguso wa Mkulu lyahalyuyile. Kuli zuwa alyo, watanganiche wosangalala, ila wehile wolakazwa.
Gali mgati
1. Sula ya 1:1 ndo chilongole chilinguwala uloli wa Malachi.
2. Sula ya 1:2 mbaka 3:18 zina mbuli zilinguwala kitwanza hali Nguluwi na wanhu wa Isilaeli.
3. Sula ya 4 yanguwikula kuwala kuya kwa zuwa lya utaguso wa Mkulu.
1
1 Ulonzi wa Mkulu Nguluwi naumuyila Malachi yawalonjele Waisilaeli.
Mkulu Nguluwi kanguwagana Waisilaeli.
2 Mkulu Nguluwi kangulonga, “Nandiwagana hemwe.” Ila wanhu wa Isilaeli wanguuza, “Nakutugana ndaze?” Mkulu Nguluwi kanguwedichila, “Ndaze, Esau hawele mng'holoze Yakobo? Nandimhagula Yakobo,
3 ila nandimlema Esau, nani nandividita vidunda vya heye viwe uchiwa na uhalizi wa heye nandijilechela mikanhu.”
4 Esau, yawele ndo Edomu, kangulonga, “Hanga natuhondigwa, togazenga kahi mahame.” Ila Mkulu Nguluwi Yawele na Mong'ho kangulonga hino, “Woweza kugazenga kahi, ila ndogabomola. Wochemigwa wanhu wa isi yihile, mazuwa gose wa kuli ng'halazi ya heni Mkulu Nguluwi.”
5 Hemwe homgona ago kwa meho ga hemwe, movizela na kulonga, “Ukulu wa Mkulu Nguluwi naupuluta kuli mbaka ja isi ya Isilaeli.”
Mkulu Nguluwi kanguwang'hanuchila watambika
6 Mkulu Nguluwi Yawele na Mong'ho kanguwalonjela hino hemwe watambika mlingumbeza, “Mwana kangumhulichizaga mhaza wa heye na chitumagwa kangumdumbaga mkulu wa heye. Wone heni nda mhaza wa hemwe, lekachoni hamlingunyhulichiza? Wone heni nda Mkulu wa hemwe, lekachoni hamlingundumba? Mwanguuza, ‘Natukubeza ndaze?’
7 Mwangumbeza kwa kundavila nhambiko ya chilyo chohambe chikundigwe hali honhu ha kulavila nhambiko ha heni. Ila hemwe mwanguuza, ‘Natukuzudiza ndaze?’ Mwangunzudiza kwa kuhazudila honhu ha heni ha kulavila nhambiko.
8 Homndavila nhambiko ya igongolo lyohambe lilole ama chete ama lilingutamika, ndaze, awo hauwele wihe? Ndaze, chilongozi konojezwa ama kokuditila ganojile wone komha ndolendole ya igongolo kota alyo? Heni Mkulu Nguluwi Mbele na Mong'ho, nandonga.”
9 Ahyo lelo hemwe watambika mumlande Nguluwi leka yatonele isungu. Wone mwangumlavila ndolendole kota azo, ndaze, kowakunda hemwe?
10 Mkulu Nguluwi Yawele na Mong'ho kangulonga, “Nandali ndigana ng'hatu wone yahawele na munhu yumwe hali hemwe, yawele yahahindile lwizi ja ng'handa ya heni leka mleche kubwina chiluli chohambe chitanze chinhu hali honhu ha kulavila nhambiko ha heni! Silingunojezwa na hemwe na sizikunda nhambiko za hemwe zomlingundavila.
11 Wanhu wa isi zeng'ha kulawa kolilawilaga isanya mbaka kolizinjilaga isanya, wangulitogola itagwa lya heni na chila honhu wangufunyizila heni ubani na kundavila nhambiko zilinguganigwa, kwa vila itagwa lya heni Mkulu Nguluwi Mbele na Mong'ho, lyangutogoligwa hali wanhu wa isi zeng'ha.
12 Ila mwangulidita itagwa lya heni libezigwe kwa kijesa kota chisaga cha heni choweza kuditigwa chiwe chikokomoche na chilyo chake nachibezigwa.
13 Mwangumbeza kwa kulonga, ‘Mbuli azi nazitudita tutoche ng'hatu.’ Mwangungalila nhambiko za migongolo jomjipatile kwa kuboka ama jiwele vyete ama jilingutamika. Ndaze, mbochele nhambiko azo kulawa kwa hemwe? Heni Mkulu Nguluwi Mbele na Mong'ho, ndanguuza.
14 Yapanjilwe munhu yoneche yalingujeza kunyhada, yalingulagana kwa chilaho kota kongalila nhambiko ya igongolo ilume liwele goya kulawa kuli chilundo cha heye cha migongolo, ila kangundavila nhambiko ya igongolo lilumile. Ulole, heni nda mndewa mkulu na wanhu wa isi zeng'ha wangundumba. Heni Mkulu Nguluwi Mbele na Mong'ho, nandonga.”