10
Nhelo za Solomoni
1 Azi ndo nhelo za Solomoni.
Msongolo yawele na luhala ndo usangalalo kwa mhaza wa heye,
ila msongolo yasowile luhala ndo masinzo kwa mayake.
2 Ng'hano ilingulawa kuli nzila zihile haiwele inojile,
ila kutanganika kwangumloholaga munhu kulawa kuli kubagama.
3 Mkulu Nguluwi halinguwalekaga watanganiche wawe na nzala,
ila kangulemaga maya ga wehile.
4 Ugata wangwambuza uzunwa,
ila moko ga munhu ga kikangaza gangigalaga lufufu.
5 Yawele na luhala kangukungajizaga mhela wa mbena,
kuwasa mhela wa kubeta ndo soni.
6 Yatanganiche kangigalilaga utambichizo heye yuye,
ila mlomo wa mwihe wanguvisaga wihe.
7 Watanganiche wokumbuchilwa kwa utambichizo,
ila wehile wosemwigwa ng'hatu.
8 Yawele na luhala mnhumbula kanguhulichizaga mizilo,
ila yula mpoka yalingulosoka kodumigwa.
9 Yalingikala kwa kugoloka kangikalaga goya,
yalingwajiliza kikala kwa heye kozeleka.
10 Yalingukonyeza kwa kunuwila kwihile kangwambuzaga magazo,
ila mpoka yalingulosoka kodumigwa.
11 Mlomo wa yatanganiche ndo nzasa ya ukomu,
ila mlomo wa mwihe wanguvisa kilewa.
12 Kuzudila kwangwambuzaga kilewa,
ila igano lyangugubikaga gehile geng'ha.
13 Kumlomo kwa munhu yawele na kuvizela kuna luhala,
ila wapoka wozapigwa ng'hobwa kumgongo.
14 Wawele na luhala wanguulolelaga uwanzi,
ila kulosoka kwa mpoka kwangigalaga kudumigwa himahima.
15 Lufufu lwa yawele na lufufu ndo ngome ya heye,
uzunwa wa mzunwa wangumgalilaga kudumigwa.
16 Chonolo cha munhu yanojile ndo ukomu,
ila mwihe kangudumaga kuli gehile.
17 Yalingukunda kukanyigwa kangulutila kuli ukomu,
ila yalingulema, kangwajilila.
18 Yalingumzudila yunji kwa uviso ndo mdesi,
yalingumvilizila munhu ka mpoka.
19 Kodita gehile wone kolonga lukami,
ila yawele na luhala kunguulemeza mlomo wa heye.
20 Ulonzi wa munhu yatanganiche ndo kota sendi inojile,
majesa ga munhu mwihe hagalingutanza choneche.
21 Ulonzi wa munhu yatanganiche wanguwatanza wanhu wenji,
ila wapoka wangubagama kwa vila wahela nyhala.
22 Utambichizo wa Mkulu Nguluwi ndo ulingigala lufufu,
kikangaza kwa munhu hambe konjeze choneche.
23 Kwa wapoka, kudita wihe ndo kota mdawalo,
ila wawele na nyhala wangusangalalaga kwa chiwalo cha luhala.
24 Choyalingudumba mwihe ndo chompata,
ila choyalingugana yatanganiche ndo choyopegwa.
25 Chivuluvumbi changukolaga na mwihe kangwajililaga,
ila yatanganiche kanguwichigwa nzinzili mazuwa gose.
26 Kota vyoiwele sichi kuli mizino ama iyosi kuli meho,
ndo vyoyawele mgata kwa mkulu wa heye.
27 Kumdumba Mkulu Nguluwi kwangonjezaga ukomu,
ila miyaka ja wehile jowa michefu.
28 Kitumbila kwa yatanganiche kwangumalilaga kuli usangalalo,
ila kubeteza kwa mwihe kwangudumilaga hihi hela.
29 Mkulu Nguluwi ndo ngome ya wagoloche nhumbula,
ila walingudita gehile wodumigwa.
30 Watanganiche hawokusigwa hebu muisi,
ila wehile hawochikala kuli isi.
31 Mlomo wa yatanganiche wangulavya mbuli za luhala,
ila umyango wajilile wodumuligwa ng'hatu.
32 Milomo ja watanganiche janguvizela galingukundigwa,
ila ja wehile jangulongaga wihe hela.