20
1 Divai yangigalaga kubeza na ujimbi wangigalaga kilewa,
yoneche yalingugala kahela luhala.
2 Kuzudila ng'hatu kwa mndewa ndo kota isimba lilingubuma,
yalingumzudiza kangukuwika kikala kwa heye hali honhu hehile.
3 Ndo mbuli inojile kiwika kutali na kilewa,
wapoka ndo walingilewa.
4 Mgata hambe yalime mhela wa kulima,
mhela wa mbena kopala, ila hopata choneche.
5 Majesa ga munhu nagavisigwa kota mgati ng'hatu mwa mazi menji,
ila munhu yawele na luhala kogadeha kulawa amo.
6 Wanhu wenji wangidayilaga kuwa wawele na igano lya kwimilila,
ila yalingukundigwa wa kukomya kakohi?
7 Wone yatanganiche yekale kwa kugoloka,
wanage wotambichizwa.
8 Mndewa yanojile hoyokalisa kulavya utaguso,
kanguyugululaga gehile geng'ha kwa meho ga heye.
9 Whaani yojeza kulonga, “Ndiiyeliza nhumbula ya heni,
ndahela gehile?”
10 Mizani ja uhadi na vipimilo vya uhadi,
vyeng'ha ndo izudizo kwa Mkulu Nguluwi.
11 Mwana kanguzelekaga kwa kiwhana na vyoyawele,
wone madito ga heye ndo ganoga na nagagoloka.
12 Ikutu lilinguhulika na iziho lilingulola,
vyeng'ha vili nakavidita Mkulu Nguluwi.
13 Uleche kugana kuwasa hela leka uleche kuwa mzunwa,
uwe meho nagwe kowa na chilyo chinji.
14 “Hainojile, hainojile,” yalingugula kangung'ung'utaga,
ila wone yoche kangitogolaga nakapunguzilwa beyi.
15 Hana zahabu na winji wa maganga ga sendi nyinji,
ila cha kutanza ng'hatu ndo ulonzi wa luhala.
16 Wone munhu yelahe hali hegwe kota komuwichila lehani mjenzi,
uhole ivalo lya heye,
leka yalipe sendi kwa vila nakamuwichila lehani ayo mjenzi.
17 Chilyo chilinguya kwa uhadi ndo chinona,
ila hamba changuwaga kota sangalaza kumlomo.
18 Kuwika goya mbuli, kwangukolekaga kwa kulongasa hamwe,
wone kwangugana kwaluka kitowa ngondo,
yangulapigwa kubochela majesa kulawa kwa wanji.
19 Yalinguheha hambe yavise chinhu,
ahyo wiwiche kutali na munhu yalinguhabuka.
20 Yalingumpanjila mhaza wa heye ama mayake,
lumuli lwa ukomu wa heye lozimigwa kota chenje kuli jiza totolo.
21 Uhalizi wuyile himahima mwaluko,
wahela utambichizo kuli kuduma.
22 Uleche kulonga, “Ndohilusa wihe wonditilwe.”
Witumbile kwa Mkulu Nguluwi naye kokulohola.
23 Mizani ya uhadi ndo izudizo kwa Mkulu Nguluwi,
na vipimilo vyohavikundigwe havilingumnojeza.
24 Majendo ga munhu gangulongozwaga na Mkulu Nguluwi,
munhu koweza ndaze kuizela nzila ya kuluta?
25 Ndo idiwa kwa munhu kuchiwika chinhu chiuyeng'ha himahima,
hamba kijesa kahi kuwala chilaho cha heye.
26 Mndewa yawele na luhala kanguwayugululaga wehile,
kanguwagazaga ne isungu.
27 Muhe wa munhu ndo chenje cha Mkulu Nguluwi,
kangupugajizaga nhumbula ya munhu mbaka mgati ng'hatu.
28 Igano lya kwimilila na kukundigwa vyangumwamilaga mndewa,
ulongozi wa heye wangukangazwa kwa igano lya kwimilila.
29 Lutogo lwa wasongolo ndo mong'ho wa hewo,
kunoga kwa wasekulu ndo mbuliza.
30 Mitowa jilingulumiza ndo mikwandi ja kusa wihe,
ng'hobwa zangwelizaga nhumbula mbaka mgati ng'hatu.