26
1 Hailingukundigwa kumtogola mpoka,
kudita ahyo ndo kota seluji kuli mhela wa chipalangule,
ama nhonya kuli mhela wa mbena.
2 Kota chideje chimwenga ama mbayuwayu wohambe waduliche,
na kahi upanjilo ulihela chiwalo, haumfika.
3 Ng'hobwa za ngozi kwa falasi na chihande cha chuma kwa kulilongoza idogowi,
na ng'hobwa kwa mgongo wa mpoka.
4 Uleche kumwidichila mpoka kwa upoka,
leka uleche kiwhana na heye.
5 Umwidichile mpoka kota vyoulinguganigwa upoka wa heye,
yaleche kiwona kota ka yawele na luhala lukami.
6 Kumlajiza mpoka kuhilika usenga,
ndo kota kitema na kusa magulu ama kipalila magazo.
7 Nhelo kumlomo mwa mpoka,
ndo kota magulu ga chete galinguninila.
8 Kumha lutogo mpoka,
ndo kota kuwoha iganga kuli mhembeyo.
9 Mpoka yalingujeza kutumiya nhelo,
ndo kota yagalile yalingujeza kusa liwa mmoko.
10 Munhu yalingumhola mpoka ama yoneche yalingukola leka yamkolele mijito,
ndo kota yalingutowa msale yalingumlumiza chila munhu.
11 Mpoka yalinguuhiluchila upoka wa heye chila mhela,
ndo kota libwa lilingulya cholidechile.
12 Kwangumona munhu yalingidaya kota kana luhala?
Ndangukulonjela, fola mpoka kusinda ayo.
13 Mgata kangulongaga, “Hana isimba mnzila!
Hana isimba kuli nzila ng'hulu!”
14 Kota vila lwizi lulinguzunguluta kuli vibatililo vyake,
ndo hihyo kwa mgata mchanya mwa chinhanda cha heye.
15 Mgata kanguwikaga moko wa heye kuli luhelo lwa chilyo,
ila kangutokaga lukami mbaka kangulemwela kwinula moko wa heye kuhilika kumlomo.
16 Mgata kangiwonaga kota kana nyhala,
kusinda wanhu saba walinguweza kwidichila kwa luhala.
17 Yalingiyinjiza kuli kilewa hakuwele kwa heye,
ndo kota munhu yalingugabata makutu ga libwa lilingukola.
18 Kota yawele na luweje yalingudawalila vyenje,
ama misale ja kubagama,
19 ndo hihyo vyoyawele munhu yalingumhada yowalingikalasa habehi,
hamba yalonje, “Nandali ndilonga hela.”
20 Ne ngodi, chiluli changuzimaga,
ne yalinguheha, kilewa kwangumalaga.
21 Kota vila makala ama ngodi vyanguchidita chiluli kwaka,
ndo yalingugana kilewa vyoyalingonjezaga kilewa.
22 Ulonzi wa munhu yalinguheha ndo kota chilyo chinojile,
chiwele changudulikaga du mbaka mmunda.
23 Kota lanji ilingupulika iwele naibakalizwa kuli chisaye,
ndo vyouwele ulonzi unojile uwele na kunuwila kwihile.
24 Yalinguwazudila wanji kangivisaga kwa ulonzi wa mlomo wa heye,
ila mnhumbula mwa heye kanguwaga na uhadi.
25 Hanga ulonzi wa heye wowa unojile, uleche kumkunda,
kwa vila mnhumbula mwa heye nakumema izudizo.
26 Hanji kouvisa wihe wa heye,
ila kunuwila kwa heye kwihile kozeleka kwa wanhu weng'ha.
27 Yalingumbawila myage ikulubila, kangwinjilaga yuye,
yalingulikundujiza iganga kwa myage, lyomhiluchila yuye.
28 Yalingulonga udesi kanguwazudilaga awo walingulumizwa na heye,
naye yalingutogola kwa udesi kangigalaga kuwifya.