5
Makanyo galinguwala ung'hondwa
1 Msongolo wa heni, uhuliche luhala lwa heni,
uwiche goya ikutu uhulichize malanguso ga heni,
2 leka wamule goya,
na mlomo wa hegwe ubatilile uwanzi.
3 Mlomo wa mdala mng'hondwa ndo unona kota hanombwa,
ulonzi wa heye ndo ulobwanika kusinda mafuta,
4 ila kuli kuduma ndo wa usungu kota nhungwi,
wangutema kota ipanga linoleche banzi zeng'ha.
5 Nzayo za heye zangulutila hanyi kuli kubagama,
kangujenda kuli nzila ya kuluta kuli isi ya wabagame.
6 Halingijesa kuwala nzila ya ukomu,
nzila za heye ndo za kulubaluba, havizelele.
7 Lelo hemwe wasongolo wa heni, mnyhulichize,
mleche kusemwa ulonzi wa mlomo wa heni.
8 Mziwiche nzila za hemwe kutali na mdala kota ayo,
mleche kuhejelela kuli lwizi lwa ng'handa ya heye.
9 Mleche kujeza kuwapa wanji lutogo lwa hemwe,
na miyaka ja hemwe kwa yawele na nhumbula yihile,
10 wajenzi waleche kigutiza kwa lufufu lwa hemwe,
leka vinhu vyeng'ha vyompatile kwa kukola mijito, vileche kuluta kwa wajenzi.
11 Kuduma kwa ukomu wa hemwe molombocheza,
mhela ng'huli za hemwe hozidumigwa.
12 Aho molonga, “Ndaze vyondikuzudile kuzapigwa,
na kubeza makanyo mnhumbula mwa heni.
13 Sihulichize lizi lya walangusa wa heni,
ne kuwawichila goya ikutu wandanguse.
14 Lelo nda habehi kudumigwa ng'hatu,
hali wanhu wa Nguluwi.”
15 Mchewako ndo kota izimbo lya mazi ganojile.
Unwe mazi ga izimbo lya gwegwe baho.
16 Lekachoni nzasa za hegwe ziwichigwe kutali,
na nzanda za mazi mnzila?
17 Azo ndo za gwegwe baho,
uleche kuwahanza wanhu wanji.
18 Nzasa ya hegwe itambichizwe,
usangalale kwa chiwalo cha mchewako youmuholile louwele msongolo.
19 Ndo kanoga kota ibala, kangujenda goya kota chifuno.
Mhambaga ya heye ikugalile kusangalala chila mhela,
ugale mazuwa gose na matombo ga heye.
20 Msongolo wa heni, lekachoni nakubatigwa ng'hatu na mdala mng'hondwa?
Lekachoni nakumkumbatila mmhambaga mdala wa mlume yunji?
21 Ukumbuchile nzila za munhu za hazelu hali Mkulu Nguluwi,
heye kangona chila chinhu choyalingudita munhu.
22 Mwihe kangugwilizwaga kwa wihe wa heye yuye,
kangubatigwa kwa ng'weso za gehile ga heye yuye.
23 Kangubagama kwa kuleka kuhulichiza,
kangudumigwa kwa chiwalo cha upoka wa heye.