105
Nguluwi na wanhu wa heye
(1 Mihela 16:8-22)
1 Mlonje malumbo kwa Mkulu Nguluwi, mliwikule itagwa lya heye,
muwazelese wanhu weng'ha madito ga heye.
2 Mumwimbile heye, mumwimbile heye lutogo,
msimile madito ga heye ga kububuwaza.
3 Lutogo kwa itagwa lya heye lyelile,
nhumbula za walingumpala Mkulu Nguluwi zisangalale.
4 Mpale Mkulu Nguluwi na mong'ho wa heye,
Mumhejelele Mkulu Nguluwi mazuwa gose.
5-6 Hemwe walelwa wa Abulahamu chitumagwa wa heye,
hemwe wana wa Yakobo, yahaguligwe wa heye,
mkumbuchile madito ga heye ga kububuwaza goyaditile,
vinduzanduza vya heye na nhaguso zoyazilavile.
7 Heye ndo Mkulu Nguluwi, Nguluwi wa hetwe,
nhaguso za heye za muisi yeng'ha.
8 Heye kangulikumbuchilaga ilagano lya heye mazuwa gose,
kangwenezaga kulagana kwa heye kwa lulelo elufu.
9 Kangubatililaga ilagano lyoyaliditile na Abulahamu
na ilagano lyoyamlahile Isaka.
10 Nakamtawizila Yakobo kulagana kwa heye kota ndo ilajizo,
na Isilaeli kota ndo ilagano alyo lya mazuwa gose.
11 Nakalonga, “Ndowapani isi ya Kanaani,
nayo yowa uhalizi wa hemwe.”
12 Lowawele wachefu na walinguwazika,
na wajenzi kuli isi ya Kanaani,
13 nawalubaluba kulawa honhu hamwe mbaka hayage,
isi imwe mbaka yinji.
14 Ila Nguluwi hakundile ne munhu yawabunze,
kwa chiwalo cha hewo nakawang'hanuchila wandewa,
15 “Mleche kuwadoliza wabakalizwe mafuta wa heni,
mleche kuwalumiza waloli wa heni.”
16 Nguluwi nakambuza lufemba kuli isi ya hewo,
nakawifya chilyo cha hewo cheng'ha.
17 Ila nakawalongolezela munhu yumwe,
Yusufu yawele yaguzigwe kuli upogozi.
18 Nawamuwopa magulu kwa minyololo
na ngwamo ya chuma kuli singo,
19 mbaka choyalonjile Yusufu vyochenele,
ulonzi wa Mkulu Nguluwi naulajila kota Yusufu nakakomya.
20 Mndewa wa Misili nakalajiza yadoholigwe,
chilongozi wa wanhu wa isi nakamlechela yelejehe.
21 Nakamuwika yalongoze undewa wa heye
na mkulu wa lufufu lwa heye lweng'ha,
22 yawalongoze vilongozi wa heye vyoyalingugana,
na kuwalangusa wasekulu wa heye luhala.
23 Aho ndo Isilaeli nakenjila Misili,
kwa vila Yakobo nayali mjenzi kuli isi ya Hamu.
24 Mkulu Nguluwi nakawadita wanhu wa heye waponde lukami,
nakawapa mong'ho kusinda wang'honyo wa hewo.
25 Nakawadita Wamisili wawazudile wanhu wa heye,
nawawaditila vibi vitumagwa wa heye.
26 Hamba nakamlajiza Musa chitumagwa wa heye,
nakamlajiza na Aluni yahaguligwe wa heye.
27 Nawadita ulajilo wa Nguluwi hali Wamisili,
vinduzanduza kuli isi ya Hamu.
28 Nguluwi nakegala jiza mchanya mwa isi,
Wamisili nawalema kuuhulichiza ulonzi wa heye.
29 Nakagalula mazi ga nzanda za hewo nagawa danda,
nakazikopola somba za hewo zeng'ha.
30 Mibula najiivaba isi ya hewo,
mbaka ng'handa ya mndewa naimema jijo.
31 Nguluwi nakalonga, navyuya vilundo vya ng'honzi
na sewe kuli isi ya hewo yeng'ha.
32 Nakagalula nhonya ya hewo iwe nhonya ya maganga
iwele na lumwemwesa kuli isi ya hewo yeng'ha,
33 nakajiwifya mizabibu na mitini ja hewo,
nakabena migodi ja isi ya hewo.
34 Nguluwi nakalonga na nzije nazilawila,
ndede maelufu zohambe ziwaziche,
35 nazijigubika mizuchila jeng'ha kuli isi,
najilya mbena za hewo zeng'ha.
36 Nakawakopola walelwa wa mwaluko kuli isi ya hewo,
walelwa wa mwaluko wa Wamisili.
37 Hamba nakawalavya wanhu wa Isilaeli kuli isi,
nawoka na sendi na zahabu za Wamisili,
haduhu ne munhu yumwe wa hewo yekwang'wale.
38 Wamisili nawasangalala kuka kwa hewo,
kwa vila nawali wakabuswe kwa chiwalo cha hewo.
39 Nguluwi nakawika ng'hungugu kota chigubiko mchanya wa wanhu wa heye
na chiluli leka yawalangazile nechilo.
40 Nawalanda naye nakawegalila ng'hwale,
nakawagutiza ibumunda kulawa kilanga.
41 Loyatulile italawe mazi nagalawa,
kota lwanda nagakola kuli chiwala.
42 Nakakumbuchila kulagana kwa heye kwelile,
koyampele Abulahamu chitumagwa wa heye.
43 Lelo nakawalavya wanhu wa heye kuli isi kwa kusangalala,
wahaguligwe wa heye nawatowa luchenze lowalawile.
44 Nakawapa isi za wanhu wanji,
na migunda ja wenyeng'haye,
45 leka wanhu wa heye wahulichize mizilo ja heye,
na kuwinza malajizo ga heye.
Yatogoligwe Mkulu Nguluwi.