Chitabu cha Kahano
107
(Zabuli 107-150)
Lutogo kwa Nguluwi yanojile
1 “Mlonje malumbo kwa Mkulu Nguluwi kwa vila heye ka yanojile,
kwa vila igano lya kwimilila lya heye lyangikala mazuwa gose.”
2 Mlonje ahyo hemwe womgomboligwe na Mkulu Nguluwi,
wanhu wawele nakawalohola kulawa kwa wang'honyo.
3 Nakawakungajizani kulawa isi za chijenzi,
kulawa kolilawilaga isanya na kolizinjilaga isanya,
kulawa kasikazini na kusini.
4 Wamwenga nawalubaluba hela kuli chiwala,
kuno wolemwela kuufichila muji wa kikala.
5 Nawona nzala na ng'halu,
nawagozola ng'hatu.
6 Kuli kugaya kwa hewo nawamlilila Mkulu Nguluwi,
naye nakawalohola kuli magazo ga hewo.
7 Nakawalongoza kuli nzila igoloche,
mbaka nawaufichila muji wa kikala.
8 Mlonje malumbo kwa Mkulu Nguluwi kwa igano lya kwimilila lya heye,
kwa chiwalo cha vinduzanduza navyoyawaditile wanhu.
9 Kanguwanwezaga wawele na ng'halu,
na wawele na nzala kanguwagutizaga ganojile.
10 Wamwe nawekala kuli jiza na uchiwa,
wanweng'hwa kuli magazo na minyololo,
11 kwa vila nawabelenhuka malajizo ga Nguluwi,
na kuubeza ulonzi wa Nguluwi Yawele Kuchanya.
12 Nawali watochile lukami kwa mijito jing'ang'ale,
nawagwa, hakuwele na wa kuwatanza.
13 Kuli kugaya kwa hewo nawamlilila Mkulu Nguluwi,
naye nakawalohola kuli magazo ga hewo.
14 Nakawalavya kuli jiza na uchiwa,
minyololo ja hewo nakajibenanga.
15 Mlonje malumbo kwa Mkulu Nguluwi kwa igano lya kwimilila lya heye,
kwa chiwalo cha vinduzanduza navyoyawaditile wanhu.
16 Heye kangubenaga na kuchumula lwizi lwa shaba,
na kutemanga fito za chuma.
17 Kwa upoka, wamwe nawadita gehile,
nawagazika kwa chiwalo cha wihe wa hewo,
18 nawachizudila chilyo cheng'ha,
nawali habehi kubagama.
19 Kuli kugaya kwa hewo nawamlilila Mkulu Nguluwi,
naye nakawalohola kuli magazo ga hewo.
20 Kwa ulonzi wa heye nakawalohola,
nakawalohola leka waleche kudumigwa.
21 Mlonje malumbo kwa Mkulu Nguluwi kwa igano lya kwimilila lya heye,
kwa chiwalo cha vinduzanduza navyoyawaditile wanhu.
22 Wamlavile nhambiko za kulonga malumbo,
wasimile madito ga heye kwa nzimbo za kusangalala.
23 Wamwenga nawali mmajendo kuli bahali kwa meli,
na kukola mijito ja hewo mumo kuli bahali.
24 Nawagona madito ga Mkulu Nguluwi,
mbuli za kububuwaza zoyaditile ako.
25 Nakalajiza, nakambuza chivuluvumbi chikulu,
nachitoza kuchanya nhigu ya bahali.
26 Nawatozigwa kuchanya kuli ulanga, hamba hasi kuli mazi menji,
uzidahe wa hewo naumalila kuli mbuli ayo.
27 Nawatigasika na kuzebeduka kota wagalile,
uwanzi wa hewo weng'ha wa kuli mazi nauwamalila baho.
28 Kuli kugaya kwa hewo nawamlilila Mkulu Nguluwi,
naye nakawalohola kuli magazo ga hewo.
29 Nakachidita chila chivuluvumbi chikulu chisindamale,
nayo nhigu naileka.
30 Aho nawasangalala kwa kuwa na kusindamala,
nakawafichiza kuli bandali iwele nawali woluta.
31 Mlonje malumbo kwa Mkulu Nguluwi kwa igano lya kwimilila lya heye,
kwa chiwalo cha vinduzanduza navyoyawaditile wanhu.
32 Mumtogole kuli nhing'hano ya wanhu,
na kuli chitala cha wasekulu.
33 Nguluwi nakagalula nzanda ziwa kugunuche,
nzasa nakazidita zikale ng'hatu.
34 Misanga jiwele na mboto nakajidita jiwe misanga jiwele na mwino,
kwa chiwalo cha wihe wa wenyeng'haye wake.
35 Nakagalula kugunuche nakuwa mizimbo ja mazi,
na isi ng'havu naziwa nzasa za mazi.
36 Nakawahilika ako wawele na nzala,
nawo nawazenga muji na kikala ako.
37 Nawalima migunda na kunyala mizabibu,
nawabeta mbena kwa winji.
38 Nakawatambichiza wanhu wa heye nawonjezeka,
na winji wa migongolo ja hewo nawonjezeka.
39 Hamba lowapunguche na lowawele ng'hochele,
kwa kuditilwa vibi na kugazigwa na masinzo,
40 nakawabeza wakulu wowawagazile,
nakawazungulusa kuchiwala kokuwele haduhuli nzila.
41 Ila nakawalohola walingugana utanzi kuli magazo ga hewo,
nakonjeza nhanzi za hewo kota vilundo vya ming'holo.
42 Watanganiche howoyona mbuli ayo wosangalala,
ila wehile weng'ha woditigwa wanyamalile.
43 Wawele na luhala wejese kwa chiwalo cha mbuli azi,
wejese kwa chiwalo cha igano lya kwimilila lya Mkulu Nguluwi.