109
Kung'ung'uta kwa munhu kuli magazo
(Kwa yalingwaluchiza kwimba. Zabuli ya Daudi.)
1 Uleche kunyamalila,
gwa Nguluwi ndilingukutogola.
2 Wanhu wehile na wahadi wangunhowa,
wangulonga udesi kwa heni.
3 Wangulonga wihe kwa heni,
na kunhowa ne nongwa.
4 Hanga nandiwagana, nawandonjeleza,
ila nandiwalandila.
5 Wanguhilula wihe honhu ha kunoga kwa heni,
na kuzudila kwa igano lya heni.
6 Umuwiche mtagusa mwihe kwa mng'honyo wa heni,
na yalingumlonjeleza heye yamhiliche kuli chitala.
7 Hoyotagusigwa yafichigwe na nongwa,
kulanda kwa heye kuwazigwe kota nongwa yinji.
8 Mazuwa ga ukomu wa heye gawe machefu,
munhu yunji yahole mijito ja heye ja kulongoza.
9 Wana wa heye wawe walekwa,
na mamo wa wana awo yawe yafililwe na mlume.
10 Wana wa heye wawe wolubaluba na kulandalanda,
wawinjigwe kuli mahame ga ng'handa za hewo.
11 Yalingumdai chinhu yasukule lufufu lwa heye lweng'ha,
na wajenzi wahole vinhu vyoyapatile kwa chituguti cha heye.
12 Hawe haduhu munhu wa kumonela isungu,
ama kuwalolela wana wa heye walekwa.
13 Walelwa wa heye weng'ha wabagame,
itagwa lya heye lisemwigwe kuli lulelo lulinguya.
14 Mkulu Nguluwi yaukumbuchile wihe wa wasekulu wa heye,
gehile ga mayake galeche kusigwa hebu.
15 Mkulu Nguluwi yakumbuchile gehile ga hewo mazuwa gose,
ila hewo wawo wasemwigwe muisi.
16 Mwihe ayo hajesile ng'hatu kuwa na isungu,
ila nakawabunza wazunwa na walihela chinhu
na ng'hochele mbaka kubagama.
17 Heye kanguganaga kuwapanjila wanhu,
kupanjila kumfiche heye yuye.
Hambe yawaganile wanji utambichizo,
lelo, yaleche kuwa na utambichizo.
18 Kwa heye kupanjila ndo kota kuvala nguwo,
lelo, kupanjila ako kumdodeze kota mazi,
kwinjile kuli mizeje ja heye kota mafuta.
19 Kupanjila kumgubiche kota nguwo,
kumzungulute mazuwa gose kota isali.
20 Mkulu Nguluwi yawahilusile kota ahyo wanhu walingundonjeleza,
ena, hewo walingulonga gehile kwa heni.
21 Gwa Mkulu Nguluwi, Mkulu wa heni,
unhanze kwa lutogo lwa itagwa lya hegwe,
undohole kwa winji wa igano lya kwimilila lya hegwe.
22 Heni mzunwa na ndilihela chinhu,
nandilumizwa mbaka mnhumbula mwa heni.
23 Ndangwajilila kota isisila lya matinazo,
nanyhusigwa kota ndede mlukuli.
24 Mafugamilo ga heni ndo ng'hochele kwa chiwalo cha kwesela kulya,
ndipona na mizeje na ngozi.
25 Ndiwa munhu wa kubezigwa hela na wanhu,
howombona wangutigasaga vitwi vya hewo kwa kubeza.
26 Unhanze, gwa Mkulu Nguluwi, Nguluwi wa heni,
undohole kwa winji wa igano lya kwimilila lya hegwe.
27 Uwalajile wanhu kota ago ndo madito ga hegwe,
hegwe, gwa Mkulu Nguluwi, nakudita ahyo.
28 Wanguweza kumhanjila, ila hegwe konhambichiza,
walingunhowa wabasigwe soni, nani chitumagwa wa hegwe ndosangalala.
29 Walingundonjeleza wavalizwe soni,
wegubiche soni ya hewo kota igolole.
30 Ndolonga malumbo ng'hatu kwa Mkulu Nguluwi kwa lizi,
ndomtogola hali chilundo cha wanhu,
31 kwa vila heye kangumlewelaga mzunwa,
kangumloholaga mhela hoyotagusigwa.