141
Kulanda kwa kugana kwamilwa
(Zabuli ya Daudi.)
1 Ndangukuchema, gwa Mkulu Nguluwi,
uye himahima kunhanza.
Uhulichize lizi lya heni mhela hondikuchema.
2 Kulanda kwa heni ukubochele kota ubani,
hondikwinula moko ga heni kwa hegwe ung'hunde kota nhambiko ya matinazo.
3 Gwa Mkulu Nguluwi, uwamile mlomo wa heni,
uwiche wamizi kuli lwizi lwa mlomo wa heni.
4 Undemeze ndeche kuluta kudita gehile,
ndeche kihanza na madito gehile,
ndeche kilumba na wanhu walingudita gehile,
ne kuwa hamwe kuli mnvina za hewo.
5 Munhu yawele na hachi yanhowe,
ndo mbuli ya isungu,
na yang'hanuchile, ndo mafuta kumutwi kwa heni.
Mutwi wa heni hauweza kuilema mbuli ayo.
Ila kulanda kwa heni mazuwa gose, ndo kwa chiwalo cha hewo kuleka wihe.
6 Wakulu wa hewo howohondigwa kuli mitalawe,
ndo wovizela kota ulonzi wa heni nawali goya.
7 Mizeje jawo josambalulwa kuli mlomo wa chilaga
kota munhu vyoyalingulima na kukatula misanga.
8 Ila heni ndangitumbila kwa hegwe, gwa Mkulu Nguluwi, Mkulu wa heni,
ndangubilimila kwa hegwe leka unyamile, uleche kundeka kwihile.
9 Unyamile na midiwa jowambichile,
kugwilizwa na wanhu wehile.
10 Wehile wagwilizwe kuli midiwa jawo,
mhela hondikola kwa kikala goya.