143
Kulanda utanzi
(Zabuli ya Daudi.)
1 Uhulichize kulanda kwa heni, gwa Mkulu Nguluwi.
Uwiche goya ikutu lya hegwe kwa chiwalo cha kulanda kwa heni kwa isungu.
Kwa chiwalo cha kukundigwa na kutanganika kwa hegwe, unyidichile.
2 Uleche kunhagusa kwa kung'ang'ala, heni chitumagwa wa hegwe,
kwa vila haduhu yoneche yawele mkomu, yawele yatanganiche hali hegwe.
3 Wang'honyo wa heni nawambinza,
nawangwisa ng'hatu,
nawambika kuli jiza kota munhu yabagame katali.
4 Ngozola ng'hatu,
nhumbula ya heni naizilika kwa chiwalo cha kudumba.
5 Ndangugakumbuchila mazuwa ga katali,
ndangijesa kwa chiwalo cha mijito ja hegwe jeng'ha,
ndangulola mijito jikoligwe kwa moko ga hegwe.
6 Ndangugolola moko ga heni kulanda,
nhumbula ya heni ina ng'halu na hegwe kota isi ng'havu.
7 Gwa Mkulu Nguluwi, unyidichile himahima,
kwa vila nangozola ng'hatu.
Uleche kivisa kutali na heni,
leka ndeche kuwa kota wala walingudulika kuli isi ya wabagame.
8 Mitondo undajile igano lya kwimilila lya hegwe,
kwa vila nandikuwichila kitumbila kwa heni.
Undanguse vyoilinguganigwa kudita,
kwa vila ndangukugalila nhumbula ya heni.
9 Gwa Mkulu Nguluwi, undohole kulawa kwa wang'honyo wa heni,
kwa vila kwa hegwe ndangubilimila kikala goya.
10 Undanguse kweneza vyoulingugana,
kwa vila hegwe ndo Nguluwi wa heni.
Muhe wa hegwe unojile undongoze kuli nzila inojile.
11 Kwa chiwalo cha itagwa lya hegwe, Mkulu Nguluwi, uwamile ukomu wa heni,
umbuse kuli magazo kwa chiwalo cha kutanganika kwa hegwe.
12 Kwa chiwalo cha igano lya kwimilila lya hegwe, uwakopole wang'honyo wa heni,
uwadumye weng'ha walingumbunza,
kwa vila heni nda chitumagwa wa hegwe.