146
Lutogo kwa Nguluwi mlohozi
1 Mumtogole Mkulu Nguluwi.
Umtogole Mkulu Nguluwi, gwa nhumbula ya heni.
2 Ndomtogola Mkulu Nguluwi kuli ukomu wa heni weng'ha,
ndomwimbila Nguluwi wa heni mhela weng'ha hondichikala.
3 Mleche kitumbila kuli wakulu wa isi,
hewo ndo wanhu hela, hawoweza kulohola.
4 Munhu hoyolavya lweselo lwa heye lwa kuduma,
kanguhiluka kuli nhimbwisi nakoyalawile,
na aho mijito ja heye jeng'ha joyajiwichile goya jangwajililaga.
5 Nakatambichizwa munhu yalingutanzigwa na Nguluwi wa Yakobo,
munhu yawichile kitumbila kwa heye kwa Mkulu Nguluwi, Nguluwi wa heye,
6 yavilumbile ulanga na isi,
bahali na vyeng'ha viwele mumo.
Heye kangibatililaga kulagana kwa heye mazuwa gose.
7 Heye kanguwapaga walingubunzwa hachi zawo,
Mkulu Nguluwi kanguwapaga chilyo wawele na nzala.
Mkulu Nguluwi kanguwapaga wanweng'hwa kilejeha.
8 Mkulu Nguluwi kanguwagubulaga meho wohambe walole.
Mkulu Nguluwi kanguwenulaga walinguduliswa.
Mkulu Nguluwi kanguwaganaga wanhu watanganiche.
9 Mkulu Nguluwi kanguwamilaga wajenzi,
kanguwatanzaga wadala wafililwe na walume wawo na walekwa,
ila kangwajilizaga nzila ya wehile.
10 Mkulu Nguluwi kangulongoza mazuwa gose,
Nguluwi wa hegwe, gwa Siyoni, ka mndewa wa lulelo lweng'ha.
Mumtogole Mkulu Nguluwi.