148
Vilumbigwe vyeng'ha vimtogole Nguluwi
1 Mumtogole Mkulu Nguluwi.
Mumtogole Mkulu Nguluwi kulawa kilanga,
mumtogole kulawa ako kuchanya ng'hatu.
2 Mumtogole, hemwe wahilisi wa heye weng'ha,
mumtogole, hemwe wamizi wa heye weng'ha wa kilanga.
3 Mumtogole hemwe isanya na nyelezi,
mumtogole hemwe nhondwe zeng'ha zilingupulika.
4 Mumtogole hemwe ulanga wa kuchanya,
na mazi gawele kuchanya mwa ulanga.
5 Vyeng'ha vilitogole itagwa lya Mkulu Nguluwi,
kwa vila heye nakalajiza na vyeng'ha navilumbigwa.
6 Nakaviwika honhu hawo mazuwa gose,
kwa mzilo uwele hauweza kugaluswa.
7 Mumtogole Mkulu Nguluwi kulawa muisi,
hemwe mizoka ja mbahali na mgati ng'hatu mwa bahali, mumtogole.
8 Mumtogole hemwe lumwemwesa na nhonya ya maganga na seluji na ng'hungugu,
mbeho ya nhigu ilingweneza mzilo wa heye.
9 Mumtogole hemwe vidunda vikulu na vidunda vidodo,
migodi ja mafuza na vihulo.
10 Mumtogole hemwe migongolo ja kisolo na ja kufujigwa,
vilumbigwe vyeng'ha vilingutambala na videje vyeng'ha.
11 Mumtogole hemwe wandewa na wanhu wa isi zeng'ha,
wang'hangala na vilongozi weng'ha muisi.
12 Mumtogole hemwe wasongolo na wahinza,
wasekulu weng'ha na wana kahi.
13 Mweng'ha mlitogole itagwa lya Mkulu Nguluwi,
kwa vila itagwa lya heye yaliyeka lyangwinuligwa,
ukulu wa heye wa kuchanya ng'hatu mwa isi na ulanga.
14 Nakawagalila mong'ho wanhu wa heye,
kuhulichizwa kwa wanhu weng'ha walingukundigwa,
wanhu wa Isilaeli yawaganile.
Mumtogole Mkulu Nguluwi.