15
Goloko wa Nguluwi
(Zabuli ya Daudi.)
Gwa Mkulu Nguluwi, whaani yoweza kikala kuli ihema lya hegwe?
Whaani yoweza kikala mchanya mwa chidunda cha hegwe chelile?
 
Ndo munhu yalingikala ne nongwa,
mhela weng'ha kangudita gatanganiche,
yalingulonga ga kukomya kulawa mnhumbula,
ndo munhu yohambe yahehe wanhu,
yohambe yamditile gehile myage,
ne kumvilizila munhu yowalingikalasa habehi,
ndo munhu yalinguwabeza walinguwabunza wayao,
ila kanguwahulichiza wala walingumdumba Mkulu Nguluwi,
ndo munhu yohambe yagalamule chilaho cha heye hanga hamba chowifya mbuli za heye,
yohambe yaziche sendi ya heye kwa kugana mzidi ng'hatu,
ne kubochela chinhu kwa chiwalo cha kumbunza yalihela nongwa.
 
Munhu yalingudita ago, hotigasika.