20
Kulanda kusumya
(Kwa yalingwaluchiza kwimba. Zabuli ya Daudi.)
Mkulu Nguluwi yakwidichile houwa kuli magazo,
itagwa lya Nguluwi wa Yakobo likwamile.
Yakuhilichile utanzi kulawila mng'handa mwa heye,
yakutanze kulawa chidunda cha Siyoni.
Yazikumbuchile ndolendole za hegwe zeng'ha,
yazikunde nhambiko za hegwe za kulakazwa.
Yakupe goulingugana mnhumbula ya hegwe,
yazidite mbuli za hegwe zeng'ha zikulutile goya.
Totowa luchenze kwa chiwalo cha kusumya kwa hegwe,
tokwinula bendela kulipa ukulu itagwa lya Nguluwi wa hetwe.
Mkulu Nguluwi yakwenezele kulanda kwa hegwe kweng'ha.
 
Ndanguvizela kota Mkulu Nguluwi komtanza mndewa yambakalize mafuta,
komwidichila kulawa mng'handa mwa heye kilanga,
kwa moko wa heye wa kudilo komdita yasumye ng'hatu.
Wanji wangitumbila mituka ja hewo ja kitowela ngondo,
wanji wangitumbila falasi wa hewo.
Ila hetwe twangitumbila Mkulu Nguluwi, Nguluwi wa hetwe.
Hewo wochikwang'wala na kugwa,
ila hetwe tokwima nzinzili.
 
Umdite mndewa yasumye, gwa Mkulu Nguluwi!
Utwidichile hotukulanda!